Dili, 18 Dezembru 2024 (Média Democracia) – Rosalino Vicente Cárceres de Carvalho idade sanulu resin-ualu (18), husi Aldeia cagamu, Suku Lako-mesak, Postu-Administrativu Laklo, Munisípiu Manatutu, dadaun ne’e hela iha Bebonuk. Remata Eskola Ensinu Secundário Santo António Manatutu villa, no desidi buka moris hodi ajuda família fa’an sasan iha Jardin Farol.
Rosalino Vicente haktuir katak, remata ona Ensino Secundáriu ekonomia lá sufisiente hodi kontinua iha universidade, nune’e nia deside fa’an sasan hodi ajuda família.
“Iha família uma laran ha’u iha maun-alin hamutuk na’in lima (5), feto rua no mane tolu, ha’u oan ba da-ikus nian. Ha’u moris mai ho familia simples ida no ha’u nia maun-alin sira harii uma kain hotu ona. Ha’u remata ona ha’u nia nivel sekundaria iha tinan 2024, planu atu kontinua maibé ekonomia mak la sufisiente atu bele kontinua ba nivel universitariu. Entaun ha’u deside buka moris hodi ajuda ha’u nia bin fa’an sasan iha Jardin Farol. Dader ha’u sempre ajuda ha’u nia bin iha uma laran oinsa atu bele prepara matabixu no aruma sasan sira ne’ebé atu ba fa’an. Ami sai husi uma tuku 08:30 hodi hein mikroleta, no lokraik fila iha oras tuku 07:00 liu. Sasan sira ne’ebé fa’an hanesan Kafe, Bee, Sigaru no seluk tan, sasan sira ho presu ne’ebé tuir komprador sira nia nesesidade. Rendimentu tama kada loron ida $15, $20, osan hirak ne’e ha’u nain mak zere hodi bele atende ba ami nia nesesidade loron-loron nian.” Dehan Rosalino Vicente iha Jardim Farol.
Nia esplika liután katak atividade loron-loron halo ne’e bele atende nesesidade loron-loron nian, bainhira hela iha sidade la buka moris oinsa bele hetan netik osan, lábele moe no baruk atu buka moris iha Sidade.
“Ha’u nia atividade loron-loron nian sempre ajuda nafatin ha’u nia bin iha negosiu kiik ida ne’e, dala ruma bin lori lao sasan sira ba fa’an iha dalan, ha’u mak sei tur hein fali sasan sira ne’ebé rai hela. Fofoun ha’u fa’an ha’u sei moe, maibé liutiha semana ida nia laran, komesa hatoman-aan ona la moe atu fa’an sasan. Se moris ne’e mak fa’an sasan moe oinsa bele hetan netik sentavus ruma atu bele responde netik ba moris loron-loron nian.” Dehan Nia
Nia salienta liután nafatin esforsu, badinas no lábele moe, tanba moris ne’e la fasil atu hetan netik sentavus balun. Planu ba oin hakarak atu kontinua iha nível Universitáriu maibé sei iha prosesu nia laran, fiar katak loron ida bele atinji mehi ne’ebé iha.
Reportajen : Tomas
Foto : Tomas