Dili, 19 Dezembru 2024 (Média Democracia) – João ho idade (78) husi Munisípiu Ainaro postu-Administrativu Maubise, atividade negósiu hanesan fa’an tabaku, bua, malus no ahu tuir estrada ninin nune’e hodi responde ba presiza loron-loron.
Tuir negosiante João hateten, durante tinan barak nia laran moris hanesan ema negosiante hodi halo atividade negosiu ki’ik hanesan fa’an bua, malus, ahu no tabaku, nune’e bele hetan osan ituan hodi sustenta ba nesesidade nian no presiza loron-loron.
“Maske ho idade ne’ebé boot ona maibé ha’u hakarak halo negósiu tanba liuhusi negósiu hanesan atividade ida ba ha’u, nune’e bele hadok-aan husi moras oioin halo ha’u sempre forsa nafatin karik tur de’it iha fatin ha’u sente isin lolon moras tanba la halo servisu ruma. Entaun ha’u deside kada semana ka fulan husi Ainaro tenke tun mai Dili hodi halo negósiu, nune’e bele hetan osan ituan hodi sustenda ba ha’u nia presiza.” Dehan João
Nia hatutan tan katak tabaku, malus, bua no ahu ne’ebé kada loron ema hola too $4.00 lae 7.00 dolar maibé haree mós sorte tanba tempu agora udan dalaruma sasan folin dalaruma la folin liu tanba kondisaun udan no sasan ne’ebé fa’an lao tuir dalan ninin de’it
“Sasan ne’ebé ha’u fa’an hola tutan fali husi ema seluk hanesan bua batan ida $15 dolar nune’e lori mai fa’an fali iha Dili kada kesak ida fa’an ba $0.50. tabaku hola iha plastik boot ida 8.00 dolar entaun lori mai bunkus fila-fali iha plastik ki’ik ida folin $0.50, malus ema fa’an futun tolu 1.00 dolar no ha’u fa’an fila-fali ida$0.50, ahu ema fa’an plastik ida $0.25, lori mai fa’a iha Dili plastik ida $0.50, sasan hirak ne’e hanesan ha’u nia toos bele ajuda ha’u lori buka moris ne’ebé loron tomak ha’u hetan osan too 10.00 dolar liu tanba ha’u tama sai bairu lao tuir dalan ninin karik ha’u sente kolen ona ha’u hetan fatin di’ak ruma tur hein de’it, nune’e ema lao ba mai bele hola ha’u nia sasan.” Dehan nia
Nia salienta durante halo atividade negósiu maske hetan osan ho rendimentu ne’ebé ki’ik maibé ida ne’e la sai problema naran katak kada loron tenke hetan netik osan oituan hodi sustenta ba presiza loron-loron nian
Esplika kle’an liután katak avo João maske ho idade ne’ebé boot maibé nafatin esforsu aan hodi halo negósiu tuir kbiit ne’ebé iha, nune’e bele hetan netik osan ituan hodi fasilita ba moris loron-loron nian, atividade negósiu ki’ik ne’ebé nia halo la sente kolen no baruk maibé nafatin iha esperansa hodi esforsu no luta hasoru dezafiu oioin.
Reportajen : Nelfiano
Foto : Nelfiano