Dili, 01 Outubru 2024 (Media Democracia)- Plan International hamutuk ho Joven, Labarik Feto ho diversidade husi grupu ka organizasaun 10, lansa kampaña ho naran “Unite For Peace” hodi komemora Loron Internasional ba Labarik Feto, liuhusi kampaña globál ne’e atu fó inspirasaun ba públiku bele involve hodi foti asaun no haburas dame.
Iha konferénsia imprensa ne’e reprezentante Country Director Plan International Timor-Leste, Brand Ambasadór ba foinsa’e ho diversidade, KayOlo Sword Gusmão, hatete iha loron internasionál ba labarik feto tinan 2024 ne’e Plan International hamriik fó solidariedade ba labarik feto sira ne’ebé moris iha konflitu no risku klimátika iha mundu.
“Liuhusi unidade ba dame ita bele halakon impaktu ne’ebé aat husi konflitu ba labarik-feto no labarik-mane sira iha mundu ba asaun konkreta no koletiva, ita bele prevene risku klimatika. Plan International Timor-Leste sei kontinua no haforsa kampaña “Unite for Peace-Hamutuk ba Dame” iha programa influensia parseiru ne’ebé forte.” Hatete Ambasador ba foinsa’e, KayOlo Sword Gusmão
Nia hatutan dadaun ne’e Plan International Timor-Leste husu ho asaun imediata hodi suporta labarik-feto, labarik-mane no ema sivil hotu ne’ebé loron-loron sempre hasoru perigu konflitu no risku klimatika nian.
“Ami nia rekomendasaun ba labarik-feto sira ne’ebé afeita makas liu durante konflitu, dezastre no risku klimatika nian. Problema ida ne’e tenke hapara ho asaun konkreta liuhusi governu, doadór no sosiedade sivil, ba ita hotu tenke prevene konflitu no reduz risku klimatika ne’ebé akontese iha rai laran.” Hatutan Ambasador
Iha komunikadu imprensa ne’e Plan International husu ba lideransa hotu iha Timor-Leste, governu, doadór no sosiadade sivil, tenke tau atensaun imediata, liu-liu Timor-Leste inklui mundu tomak hodi proteje labarik-feto sira ne’ebé iha konflitu no risku klimatika nia laran ligadu ho asaun sira hanesan ne’e.
“Implementa imediata no hahú diskusaun kona-ba pás no objetivu iha liberdade ba nafatin hodi asegura labarik-feto no foinsa’e sira nia lian hanesan nesesidade espesifiku sira kada planu no asaun tenke responde hodi foti asaun koletiva no urjente ba risku klimatika ne’ebé boot iha Timor-Leste no mundu.” Nia husu
Nai salienta liután apoiu edukasaun ne’ebé seguru no inkluzivu ba labarik no foinsa’e sira, inklui alokasaun finansiamentu ba implementasaun deklarasaun eskola seguru no aproximasaun aprendizajen alternativa bainhira eskola sira taka.
Atu asegura labarik-feto, labarik-mane no joven sira atu asesu ba ai-han, bee no uma mahon, servisu ba sobrevivente violénsia sira sai prioridade, inklui ba labarik-feto no joven feto sira, atu asegura asesu ba jestaun kazu ne’ebé komprensivu, saúde seksuál no reprodutiva, apoiu psiko-sosial no reabilitasaun.
“Hametin ekonomia lokál no fó oportunidade empregu nian ba labarik-feto, labarik-mane no joven sira bele iha opsaun ne’ebé adekuadu, rekoñese sira nia nesesidade oioin. Nune’e durante selebrasaun loron internasional ba labarik feto tinan 2024, sei realiza aktividade oioin ho objetivu atu fó atensaun konkreta hodi haburas konsiénsia.” Nia salienta
Atu esplika kle’an liután relasiona ho selebrasaun loron internasionál ba labarik feto ka “International Girld Day” sei realiza atividade ne’e kona-ba lansamentu kampaña Unite For Peace /Hamutuk ba Dame”, Girls Take Over ka labarik feto asume pozisaun, labarik feto ho labarik feto atu diskute nai ulun sira sei responde, lansa video tik tok “Hamutuk ba Dame” husi foinsa’e no labarik feto koalia iha “TV no media” sei lansa video badak kona-ba mudansa klimátika hodi hasa’e konsiénsia públiku nian.
Reportajen : Estefania
Foto : Estefania