Dili 02 Outubru 2024 (Media Democracia)- União Europeia apoiu finanseiru ba Rede Feto Timor-Leste atu realiza konferénsia munisípiu feto nian. RFTL sei halo konsultasaun ho feto sira iha Timor laran tomak, kona-ba promove igualdade jéneru no hakbiit feto iha Timor-Leste. Ideia sira ne’e sei hatama dokumentu polítiku ida hanaran Plataforma Asaun Feto Timor-Leste, ne’ebé utiliza hodi rejista no monitoriza komprimisiu atinjimentu promosaun igualdade jéneru no hakbiit feto, sei lori servisu advokasia nian ba lei, polítika, sistema no programa governamentais nian.
Adjuntu Xefe Misaun União Europeia Timor-Leste, Christoph Sorg, hatete atividade konferénsia ne’e sei hala’o iha munisípiu hotu sei konklui iha Kongresu Nasionál Feto ba da-neen iha Dili. Partisipante sei inklui feto sira hosi setór oioin hanesan agrikultura, edukasaun, empreendedorizmu, saúde, polítika no asosiasaun feto sira nian husi nivel aldeia, postu nomos kapitál munisípiu.
“Durasaun ba konferénsia loron rua iha kada munisípiu no inklui aprezentasaun rezultadu monitorizasaun plataforma asaun, diskusaun grupu iha área temátiku ualu hanesan Justisa, Edukasaun, Saúde, Ekonomia no Empregu, Polítika no Vida Públika, Inkluzaun Sosiál, Ambiente no Mudansa Klimátika, Integrasaun Jéneru nomos halo identifikasaun no hili delegada feto hodi partisipa iha kongresu nasionál.” Dehan Christoph Sorg, Adjuntu Xefe Misaun União Europeia iha Timor-Leste.
Nia esplika liutan katak, Rede Feto Timor-Leste nu’udar rede organizasaun ne’ebé servisu hodi promove igualdade jéneru no hakbi’it feto liuhusi advokasia, rede servisu, fortalesimentu instituisaun no harii kapasitasaun. Rede Feto hamahan iha organizasaun membru hamutuk 46 ne’ebé 27 sei ativu iha prestasaun servisu no halo advokasia iha munisípiu.
“Ami orgullu halo parseriu ho Rede Feto iha luta ne’ebé la’o daudaun ba igualdade jéneru no empoderamentu feto iha Timor-Leste. Tenke konsulta regulár ba feto sira iha reprezentasaun ne’ebé luan, atu informa sira nune’e mós bele hetan informasaun. Xave importante husi luta ida ne’e sosiedade sivíl nia monitorizasaun ba dezempeñu governu nian no hadi’ak sosiedade sivíl nia advokasia. Rede Feto ho nia membru sira iha pozisaun ideál atu hala’o knaar ne’ebé importante.” Hatutan Christoph Sorg
Iha sorin seluk , Prezidente Konsellu Diretoria Rede Feto Timor-Leste, Zelia Fernandes, hatutan Uniaun Europeia nia suporta, hanesan ami nota ona katak UE, iha kompromisu forte tebes ba asuntu promosaun igualdade jéneru no empoderamentu feto nian liuhusi apoiu oioin.
“Hanesan Inisiativa Spotlight, empoderamentu feto no advokasia ba asuntu direitu feto. Ami ho kontente atu hatete katak apoiu husi UE signifikativu tebes ba Konferénsia Munisipal Feto iha munisípiu 13, ne’ebé sei hala’o durante semana neen no pontu importante husi konferénsia ne’e mak Kongresu Nasionál Feto nian.” Dehan, Prezidente Konsellu Diretoria Rede Feto Timor-Leste, Zelia Fernandes
Nia hatutan kontente tebes bainhira hetan apoiu finanseira husi União Europeia ne’ebé ho laran luak hodi fó apoiu mai Rede Feto ba realizasaun konferénsia munisípal Feto Timor-Leste ba too kongresu nasional Feto Timor-Leste ninian
“Rede Feto Timor-Leste sente kontente tebtebes tanba iha momentu ne’ebé difisil ona mai Rede Feto atu hetan apoiu hodi organiza koferénsia munisípal Feto Timor-Leste ho nune’e UE nia reprezentante mai aproxima rede feto atu halo diskusaun oinsá mak bele apoiu.” Nia hatutan
Esplika liután agradese ba União Europeia nia suporta hodi halo Konferénsia Munisípal no nasional ba feto Timor-Leste ne’e suporta ho orsamentu hamutuk $131 Miliaun Euro ital, ba Rede Feto hodi Finansia Konferensia Munisipal iha Munisípiu (12) inklui RAEOA sei too kongresu nasional ba Feto Timor-Leste nian. União Europeia fó apoiu ba Rede Feto Timor-Leste komesa husi independensia mai too agora hodi tau matan feto Timor-Leste.
Reportajen : Nelfiano
Foto : Estefania