Likisa, 08 Outubru 2024 (Media Democracia) – Claudina dos Santos da Silva ho idade sanulu-resin-lima (15) husi Munisípiu Likisa Postu-Administrativu Maubara suku Gugoleo Aldeia Lanaba, daudaun ne’e hala’o prosesu aprendizajen iha eskola pre-sekundariu EBC 1 2 São Paulo II
Tuir Claudina dos Santos da Silva hateten, durante ne’e ba eskola sempre ho kareta tanba ho distansia ne’ebé dook maibé transporte ne’ebé loron-loron sira utilliza hodi fasilita tula ba eskola, kada estudante ida tenke hatama osan montante 6.00 dolar ba fulan ida nian
“Ha’u tama eskola iha oras tuku ida meudia entaun dadersan iha tempu ha’u tenke ajuda Mae fase bikan dasa rai no halo sasoro ba alin sira tanba maun ho bin sira mesak eskola iha tempu dadersan. Aleinde ne’e iha tuku sanulu ha’u tenke prepara hotu ona hahan meudia nian hafoin ba haris prepara ba eskola tanba ami aula komesa iha tuku 1.00 meudia no remata iha 5.00 lokraik, kareta ne’ebé lori ami ba eskola sai husi uma tuku 12.30 ne’ebé ami nunka tarde ba eskola karik kada fulan mak la hatama osan entaun ema labele tula ami ba mai eskola.” Dehan Claudina dos Santos
Nia hatutan iha prosesu aprendizajen nia laran sempre hasoru difikuldade oioin maske moris ho familia ne’ebé simples maibé nafatin esforsu aan hodi hasoru failansu hirak ne’e tanba iha futuru hakarak sai ema ne’ebé matenek.
“Ha’u iha mehi ne’ebé furak tebes tanba iha futuru hakarak sai dotora nune’e bele salva ema hotu nia vida liuhusi lala’ok servisu dotora nian iha ospital. Aleinde ne’e husi ohin ba oin tenke esforsu aan estuda lee no analiza tuir kbiit no forsa ne’ebé iha ho nune’e bele realza duni mehi ne’ebé ha’u hakarak iha futuru.” Dehan nia
Nia salienta liután katak durante ne’e sira moris ho vida agrikultura hodi fasilita ba nesesidade loro-loron nian, maske iha uma maunalin barak maibé liuhusi inan aman nia esforsu tomak bele fasilita ba saida mak sira presiza.
Atu esplika klean liután katak iha familia uma laran hamutuk nain hitu 7 mane nain tolu no feto nain haat no Claudina hanesan oan da haat husi bin nain rua no maun nain ida. Claudina nafatin esforsu ba eskola maske Inan- Aman vida agrikultor.
Reportajen : Nelfiano
Foto : Nelfiano