Dili 20 Setembru 2024 (Média Democracia) – Nelson Barros Pereira Xavier, nu’udar ativista pro-West Papua no pro-Palestina, ohin hetan kaer husi polisia hafoin simu bensa husi Papa Fransisco iha Katedral Dili Timor-Leste, tanba hatudu solidariedade ba Papua Osidental no Palestina liuhusi bandeira. Akontesimentu ne’e akontese iha dia 10 setembru
Iha entrevista ho ativista Nelson Barros Pereira Xavier hateten, Ohin tuku 5 madrugada ho balun sira ho defisiensia sira sai husi ADTL ba Katedral atu ba simu bensaun husi amu papa. Bainhira to’o iha Igreja Katedral mais ou menus tuku 6 ne’en dader no sira hamrik iha fatin ne’ebe ema prepara ona ba sira.
“Ami hein hela Amu Papa nia prezensa iha igreja katedral to’o tuku 8 hanesan ne’e, tanba amu papa sei vizita hela Almacista sira iha Bebonuk, entaun mosu iha ha’u nia hanoin ho simpatia ba maluk West-Papua no Palestine ne’ebé daudaun ne’e luta hela ba sira nia autodeterminasaun, labarik barak mate, lakon edukasaun, saude, alimentar no ema viola sira nia direitu umanus, ema trata sira hanesan dezumanu ho hahalok nasaun kolonialista sira nian. Entaun ho simpatidade ha’u hakarak fó ha’u nia solidariedade ba sira liuhusi prezensa papa nian ne’e bele fo bensaun ba sira.” Dehan nia
Ho kondisaun ne’ebé la permite tanba ema barak liu no surat tahan laiha entaun kuriosidade nia hakerek iha bandeira ne’ebé nia kaer ho liafuan West-Papua no iha Bandeira vatikanu ne’e nia hakerek Free west Papua Free Palestine no logo ida amu papa nian ne’e mak nia hakerek familia sira nia naran.
“Bainhira ha’u hakerek hotu tiha, amu papa seidauk mai iha katedral sei iha hela Bebonuk, depois intelejente sira hetan ha’u kaer hela entaun sira informa ba protokolu sira hodi mai hadau tiha bandeira ki’ik ne’ebé ha’u kaer. Depois sira asegura tiha bandeira ne’e no intelejente sira komesa foti ha’u nia foto subar ho hato’o ba Komandu, maibé ha’u nafatin iha laran, liu oras 1 hanesan ne’e amu papa mós to’o iha katedral, ho serimonia ka prezide atividade igreja nian hotu, amu papa sai mai liuhusi ami ema ho defisiensia no maluk balun ne’ebé moras sira ne’e hodi fó bensaun.” Nia informa
Nia salienta bainhira Amu Papa fila husi katedral, intelejente sira no polisia sira tama ba, nune’e polisia sira barak no ida mak husu ba intelejente ne’e dehan nia mak ne’e ka! no intelejente ne’e hatan sim. Hafoin ida ne’e sira lori nia ba kantor, hodi halo investigasaun nune’e nia mós koopera ho polisia hodi lao ba sae kareta.
“Ha’u atu sae kareta hetan presaun psikolojia husi polisia sira, no sira uza terminolojia la dignu hodi dehan sorte o la normal, normal karik o mi kedas-an. No lori ha’u ba iha kantor nafatin hetan agresaun non-fiziku sira nafatin hasai liafuan Alizadu, la normal, milisia, no Islam. Nune’e sira kontinua halo investigasaun ba ha’u, iha faze primeiru hotu depois muda ba segundu ne’e hotu tan no sira dehan mai ha’u katak loos ona ita-boot bele fila, kazu ne’e ami halo identifikasaun hotu ona, ami lori ba Ministeriu Publiku mak o ba hatan.” Nia esklarese
Tuir Cesario da Silva, Koordenador Asosiasaun Organizasaun Ema ho Defisiensia (ADTL), ne’ebé marka prezensa iha ne’ebá durante kapturasaun, asaun ne’e reprezenta violasaun ba liberdade espresaun.
“Iha situasaun ida-ne’e nu’udar ema ho defisiénsia sira, ita mós iha liberdade atu espresa ita-nia-an iha ita-nia dalan rasik. Buat ne’ebé Nelson halo la’ós hahalok-aat ba ema ida, maibé hatudu ninia solidariedade ba iha Papua no Palestina. Nelson nia espresaun la fó impaktu ba seguransa nasaun ka eventu ne’e nian.” Cesario hateten liahirak ne’e hafoin entrevista liuhusi WhatsApp.
Entertantu Nelson Barros Pereira Xavier hanesan ema ho difisiensia-ain no iha sentimentu solidariedade ba papua ho palestina, nune’e liuhusi vizita Sua Santidade Papa Francisco iha Timor-Leste nia hakarak atu husu bensaun husi Amu Papa ba west Papua no palestina
Reportajen : Domingas
Foto : Domingas