Dili, 15 Abril 2025 (Média Democracia) – Centro Nasional Chega I.P (CNC) asina akordu servisu hamutuk ho Muzeu Memorial Munisípiu Manatutu nian, aleinde asina akordu ASH ho Munisípiu Manatutu dala uluk nian hafoin estabelese muzeu iha fulan kotuk, asina akordu ne’e hala’o iha edifisiu CNC Balide
Diretor Ezekutivu Centro Nasional Chega I.P (CNC) Hugu Maria Fernandes hateten, ohin selebra kontratu ba sevisu hamutuk hodi asina akordu Centro Nasional Chega entre Muzeu memorial Manatutu ne’ebé foin inagura iha fulan 03 marsu 2025.
“Ohin asina akordu Centro Nasional Chega I.P entre Muzeu Memorial Munisípiu Manatutu nian ne’ebé foin inagura iha fulan kotuk husi Ministru Administrasaun Estatal lori naran Primeru Ministru nian. Pasu tuir mai CNC atu kontinua fó apoiu ba muzeu refere nune’e bele funsiona tuir kna’ar instituisaun hanesan muzeu ida.” Dehan Diretor Ezekutivu Centro Nasional Chega I.P (CNC) Hugu Maria Fernandes
Nia hatutan asina akordu ida ne’e iha komponente importante rua, iha parte ida nian kona-ba apoiu finanseiru funsionamentu instituisaun nian ne’e signifika kobre osamentu operasionais ba muzeu memorial nian no parte daruak nian bele halo atividade sira, normalmente halo muzeu iha fatin seluk.
“Objetivu estabele muzeu ne’e atu mobiliza estudante no joven sira bele asesu. Iha parte seluk sira hahú peskiza hodi dokumenta memoria populasaun husi Munisípiu Manatutu nian ne’ebé akontese iha tempu pasadu. Servisu ida ne’e halo parseria hamutuk ho konsellu muzeu emorial Munisípiu nian ne’ebé kompostu husi Prezidente Autoridade Munisípiu Manatutu no Prezidente Konsellu Munisípal Konsellu Kompotentes Libertasaun no Reprezentante husi asosiasaun vitima.” Dehan nia
Nia salienta aleinde ne’e CNC iha mós nia divizaun prezervasaun memorilizasaun diretor Zalde no ekipa tomak diariamente sei halo komunikasaun ho jestor mozeu nian nune’e bele halo servisu hamutuk di’ak liután iha future.
Iha fatin hanesan Koordenador Gestor Muzeu memorial Munisípiu Manatutu, Adelino D. Soares, hateten, enkontru ida ohin ho objetivu atu selebra asina akordu CNC apoiu orsamentu ba Muzeu Memorial Munsípiu Manatutu.
“Asina akordu ida ne’e CNC apoiu finansiamentu ba Muzeu memorial Munisípiu Manatutu ho osan 14 mill, ita bolu dehan fortelesimentu instituisional nune’e bele reforsa muzeu morial iha Munisípiu Manatutu nian iha parte rua operasional nomos atividade seluk iha muzeu ne’e rasik.” Dehan Koordenador Gestor Muzeu memorial Munisípiu Manatutu, Adelino D. Soares
Nia hatutan atividade ne’ebé muzeu memorial sei implementa hanesan atividade ba vijita muzeu ba estudante no jeven ba publiku sira nune’e bele hatene kle’an liután istoria ne’ebé akontese iha tempu pasadu nian.
“Atividade seluk ne’ebé muzeu memorial sei halo mak atu identifika ba sitiu istoriku, hanesan fatin ida ne’ebé ita konsidera situ istoriku prizaun, fatin akontesementu ema mate barak no fatin seluk mak atu identifika fatin abrigu defeza ba tempu rezistensia nian, fatin hirak ne’e sei indentifika iha Munusípiu Manatutu ne’e rasik.” Dehan nian
Nia salienta iha parte seluk Muzeu Memorial Munisípiu Manatutu oinsa atu indentifika rekorda memoria hodi rekolla ba vitima sobrevivente ba konflitu pasadu nian husi 1975-1999 nune’e bele halo dokumentariu ruma hodi prezerva iha muzeu memorial nune’e publiku bele asesu.
Esplika liután orsamentu anual 14 mill ne’ebé CNC apoiu ba Muzeu Memorial Munisípiu Manatutu ba komponente rua funsionamentu operasionais no kustu opersaionais. Durante ne’e estabele ona muzeu memorial iha munispiu 5 Viqueque, Suai, Aileu, Bobonaro no Manatutu, sei estabele mós ba munisipiu seluk.
Reportajen : Nelfiano
Foto : Nelfiano