KONSEITU MÍDIA HAFOIN UKUN-AN

HAKEREK NAIN ARTIGU KONSEITU MÍDIA HAFOIN UKUN-AN  HO NARAN DOMINGAS DA SILVA GONÇALVES

Ukun-rasik an nu’udar dalan úniku ne’ebé eskolla husi populasaun sívil no intelektual polítika sira. Prosessu lubuk ida sai hanesan istorikamente Povu Timor-Leste ida ne’e nian, hahú husi Koloniál Portugeza (1515-1975), hafoin  Okupasaun Indonézia (1975-1999). Periodu wain mak Kolonialista no Invazor sira hela iha Timor ho diversas Istória, kontrolu sistema administrativa, konflitus internus, konflitu étniku no tribál oioin, violasaun direitus umanus, torturasaun, persegisaun, Masakre sira, represaun brutál, ema barak servisu hanesan atan, laiha direitu partipasaun, laiha liberdade expresaun no laiha liberdade imprensa.

Hahalok sira husi kolonialista no Invazor sira laiha ona justisa sosiál, dame, liberdade no hamate identidade no kultura Timor-Leste nian ho aspetu oioin, situasaun no kondisaun hirak ne’e sai hanesan artikulasaun ida hodi fó biban ba Timor oan sira reziste hasoru aktus Koloniál no invazor sira. Luta ba libertasaun akumula kamada oioin iha nasionál no dudu luta ne’e ba oin mak kompostu husi Frente Armada, Diplomata Klandéstina no Organizasaun oin-oin, inklui servisu Mídia nian mós involve an iha laran.

Formas krusiál sira iha luta ba libertasaun involve mós mídia, hodi hala’o nia papél nune’e espalla informasaun iha Nasionál, Internasionál No Rejionál kona-ba situasaun Polítika sosiál no abuzu direitus umanus sira. Hare’e ba kontekstualizasaun iha mundu modernu hakat daudaun ona ba post-modernu, ne’ebé dezenvolve an ho teknolójia ida ne’ebé avansadu tebes, liu-husi biban ida ne’e  formulasaun sira hanesan tuir mai ne’e  bele haree ho paradigma ida ne’ebé  kle’an: 1). Tamba sa mak Mídia nia papél iha luta ba libertasaun ne’e importante? 2). Oinsá mídia nia servisu iha sosiedade iha tempu passadu, prezente no Futuru? 3). Liberdade ba mídia Timor-leste to’o iha ne’ebé? 4). Sa difikuldade mak mídia no ajente Jornalista sira hasoru?, pontu hirak ne’e mak sai hanesan giaun ida atu análiza ba konseitu mídia hafoin ukun-an iha Timor-leste.

Mídia nu’udar konseitu ida ne’ebé illustra refere ba avaliasaun mídia oioin nia ezisténsia, nia impaktu publisidade sira. Análiza ba audénsia sira tuir nia segmentasaun hodi identifika alvu loloos husi mídia ida ne’ebé efeitivu, uza kanál apropriadu nune’e bele fornese informasaun kreadivél ba konsumidor sira. Diversifikasaun ba média ho nia kombinasaun (Televizaun, rádiu, jornal media online ka dijítal ) atu maksima liu tan efikásia komunikasaun nian iha retornu investimentu estratéjiku ba mídia sosiál.

Evoluisaun Mídia nia ezisténsia iha Timor-leste markadu ho períodu oioin ne’ebé  signifikativu tebes, reflete hanesan transformasaun polítika sosiál sira iha País ida ne’e. Antes 1975 kolonialista Portuguese Era Mídia limitadu loos, momentu ne’eba iha jornais no revista sira ne’e mak sai hanesan liberdade espresaun iha era restritiva ne’eba.

Depois okupasaun Indonézia Mídia enfrenta sensura maka’as, iha jornál, emissor husi rádiu atu halo propaganda polítika sosiál ba governasaun Indonézia,  entaun mídia iha tempu ne’eba laiha liberdade totál, halo sensura informasaun hotu ba realidade sosiál ne’ebé Timoroan sira hasoru.

Iha tempu ne’ebá Jornalista na’in lima (5) ne’ebé orijen husi nasaun Australia atu halo dokumentasaun ba akontesementu iha Timor-Leste hanesan: 1).Greg Shackleton 2). Gary Cunningham 3). Tony Stewart no 4). Brian Peters 5)Malcolm Rennie, atu halo kobertura ba invazaun Indonésia nian, hetan oho husi tropa sira iha Balibo no kontinua oho mós ho jornalista sira seluk to’o termina Timor nia ukun-an. Jornalista sira nia mate ne’e nu’udar simboliza risku ba reporter sira halo kobertura ba konflitu sira hasoru no importánsia ba liberdade imprensa, lembransa moruk ida ne’e mak servisu jornalizmu nian, tan de’it hakarak hetan  justisa no transparénsia iha profisaun.

Valor signifikativu husi mídia sai hanesan Investigasaun Justisa sosiál, ho papél jornalista nian iha terrenu hodi halo divulgasaun ba informasaun sira husi ema nia moris, halo ema nia moris dependénsia liu ba midia no plataforma sosiál, kompara ho tempu uluk, ema  utiliza mídia no plataforma sosiál menus liu, iha tempu ida agora ema dezenvolve teknolójia ne’e lao lais loos,tuir sosiolójikamente umanu nian.

Ezisténsia Mídia sosiál  mak mídia ida ne’ebé kria espasu ba ema atu hala’o nia atividade sira liu-husi internet ne’ebé permite utilizador sira atu propoin, halo interasaun, kolobarasaun no komunikasaun ba malu ho meius virtuál oioin, ho valor sira ne’ebé moris iha sosiedade nia le’et sai mosu ho formas étniku oioin, depende ba saida mak akontese no la’o iha mundu ohin loron, kulturalmente dezenvolvimentu mídia kada país diferente.

Mídia bele dehan hanesan rede ba apoiu iha ser sosiál, polítika no sosio-kulturál ho akontesimentu hirak ne’ebé  mosu iha realidade utilizadór uza mídia nu’udar alternativu ida hodi kria espasu ka espalla informasaun, liu-husi internet/Online ka kanál rádiu, televizaun, jornál, facebook, whatshApp, youtube no seluk tan ne’ebé determinadu.

Hafoin ukun-an dezenvovimentu mídia iha Timor-Leste avansadu loos tuir era modernizasaun nian, nune’e mídia sai hanesan pontu kulminante ida ba ema nia moris tanba mídia nu’udar konjuntu kanál komunikasaun ne’ebé transmite informasaun no konteúdu ba públiku. Ida-ne’e inklui jornál, revista, rádiu, televizaun, no mídia dijitál sira hanesan rede sosiál no blog. Mídia sosiál hala’o papél krusiál ida hodi forma opiniaun públika, habelar informasaun no promove kultura, tuir Shirky (2008) mídia sosiál no software sosiál mak ferramenta sira ne’ebé aumenta poténsia ba troka utilizadór, kolaborasaun no asaun kolektiva elementu hotu-hotu iha kuadru instituisionál no organizasaun.

Timor-Leste hare’e kresimentu diversidade iha mídia, ho publikasaun foun no plataforma dijitál sira ne’ebé mosu. Nu’udar Estadu  Direitu Demokrátiku, Soberania no Independente, ne’ebé muda husi estadu trazisaun UNTAET. Ho ida ne’e Timor-Leste  iha rasik sistema Jurídiku sira,  ne’ebé hanesan kontituisaun ne’ebé hanesan inan ba lei hotu iha estadu ida nian ( Lex Superior). Ligadu ba liberdade informasaun no komunikasaun sosiál nian ne’ebé iha nasaun ida ne’e hetan lejitimidade husi Konstituisaun iha Títulu II ko’alia kona-ba Direitu, Liberdade no Garantia ida-idak nian, hakerek  kedas iha artigu 40 no 41.

Artigu 40 ( Liberdade ko’alia no informasaun ninian) númeru 1. Ema hotu-hotu iha direitu ba liberdade ko’alia ninian no direitu atu hetan informasaun ruma, no tan informasaun loloos nian. 2. Liberdade ko’alia no informasaun ninian labele hetan limitasaun husi sensura ruma. 3. Lei mak sei regula direitu no liberdade ne’ebé  temi-sai iha artigu ida ne’e, ho baze iha imperativu kona-ba respeitu ba lei-inan no respeitu ba ema ida-idak nia dignidade.

Baze legál ida ne’e sai sasukat no liberdade ba sidadaun se de’it iha diretu atu hetan informasaun, liberdade atu ko’alia informasaun laiha limitasaun lei de’it mak bele limita, labele halo sensura ruma ba ema nia informasaun se bainhira la kontra lei no ema ida nia dignidade.

Liu-husi biban ida ne’e mós ba sidadaun sira assesu informasaun hakarak ka lakoi tenke liu-husi mídia, hanesan rádiu, televizaun, imprime, online no seluk tan, iha situasaun polítika ohin loron podér polítika sira koko halo atuasaun ba mídia massa sira entaun hamate ona liberdade informasaun ne’ebé la efikásia ba sosiedade atu konsumu, informasaun ne’ebé sensivél, dala-ruma hetan sensura husi servisu jornalizmu ida ne’e lori todan bo’ot ba prinsípiu legalidade no viola lei-inan.

Oinsá bele garante mídia sosiál ida ne’ebé ho liberdade tuir baze legál, iha artigu 41 (Liberdade imprensa no komunikasaun sosiál nian) númeru 1. Iha garantia ba liberdade imprensa nian no ba meius seluk tan kona-ba komunikasaun sosiál. 2. Halo parte liberdade imprensa nian, liberdade ko’alia nian no hamoris/haki’ak jornalista sira, assesu ba fontes kona-ba informasaun, liberdade editoriál, protesaun ba independénsia no segredu profissionál no mós direitus atu halo jornál, publikasaun ninian no meius difuzaun selu-seluk. 3. Labele permite monopóliu iha meius komunikasaun sosiál. 4. Estadu hametin liberdade no independénsia no órgaun públiku kona-ba komunikasaun sosiál, husi podér polítiku no podér ekonómiku. 5. Estadu hametin ezisténsia ba servisu públiku ida ba rádiu no televizaun, ne’ebé sente livre, haree mós ba objetivu seluk, hanesan protesaun no divulgasaun kona-ba kultura no tradisaun RDTL nian, fó garantia ba ema ida-idak atu hatete nia hanoin rasik. 6. Estasaun emisora ba radiufuzaun no rádiu televizaun nian bele hala’o de’it  ho lisensa tuir lei.

Bazeia ba artigu 41 ida ne’e mak sai hanesan baze fudamentu ida ba liberdade imprensa no komunikasaun sosiál iha Timor-leste, hamoris/haki’ak jornalista sira atu buka fontes iha terrenu no iha protesaun direitu independente segredu iha profisaun, bandu parte sá de’it atu halo monopóliu ka polítiza komunikasaun, lei fó dalan atu hari’i estasaun sai hanesan instituisaun ida ne’ebé importante mak hetan lisensa husi lei ne’ebé  vigora ona iha estadu ida ne’e, tantu iha lei-inan (Lex Superior), diploma ministérial, dekretu lei ka iha Konsellu imprensa.

Aleinde ida ne’e iha mós lei internasionál ka Deklarasaun Universál Direitu Umanus nian, hakerek iha artigu 19 “ Ema hotu-hotu iha direitu ba liberdade atu iha opiniaun no hato’o nia opiniaun: direitu ida-ne’e inklui mós liberdade atu iha opiniaun ne’ebé laiha interferénsia, no atu buka, simu no hato’o informasaun no ideia sira husi média se de’it, no la hare’e ba rai-ketan”[1]. Lei internasionál ida ne’e atu fortifika lei nasionál ne’ebé iha ita nia konstituisaun artigu 9 ligadu mai iha artigu 23, mós lejitima konvensaun, tratadu akordu internasionál sira bele halo interpretasaun kona-ba direitu fundamental ne’ebé  iha konstituisaun rasik haruka.

Lei Komunikasaun sosial iha Artigu 8 ne’ebé sita liberdade imprensa direitu jornalista sira nian hodi fo hatene labele sai objetu independensia tanba iha direitu hodi buka no hetan informasaun ne’ebé ba interese publiku no iha Artigu 19 iha Lei Komunikasaun sosial sita konaba direitu sira ne’ebé garantia kona-ba direitu jornalista hodi hetan dalan ba informasaun liuhusi eventu hotu-hotu ne’ebé nakloke ba ema tomak nomós ba jornalista sira hodi rekolha informasaun no garantia informasaun ne’e ba sosiedade sira, Iha Artigu 20 Lei Komunikasaun sosial ne’ebé define mos kona-ba dever jeral katak jornalista tenke sai ajente  kontrolu sosial.

Tendénsia entre mídia ohin loron barak liu, tanba mídia nia ezisténsia la ses husi  sosiál, ekonómia, kultural no polítika ne’ebé  la’o iha nasaun ida ne’e, mídia sai hanesan merkadu livre (Free Marketing), polítiku na’in sira mós aproveita mídia no dijitál ho meius komunikasaun sosiál hodi lansa propaganda polítika, insultu malu, kria informasaun hoax tuir versaun saida de’it mak sira hakarak nune’e bele atinje priveléjiu ne’ebé  sira  mehi.

Kontekstu Timor-Leste mídia barak polítiza husi versaun podér ekonómia no polítika, ida ne’e sai hanesan dezafius ba jornalista sira-nia  liberdade no kosumidor informasaun, iha notísia sensivél sira ne’ebé dala-ruma hetan sensura tan de’it repoter ida laiha direitu absoluta hodi hakerek krítiku, fó sai informasaun polítiku, korupsaun ho razaun ta’uk hetan represália. Iha mídia online nia númeru utilizadór ne’ebé bo’ot liu iha mundu, no mídia sosiál baibain uza atu halo interasaun sosiál ho funsaun mídia sosiál sira seluk (Tenia, 2017).

Bainhira ita hare’e didi’ak prátika iha mídia sira, iha tipu karakterístiku balun ne’ebe ita presiza nota no ita labele komprende sala informasaun sira bainhira mídia ida públiku, tipu sira hanesan: mídia konservativa, liberal no borjuis sira nian, dala-barak mídia hirak ne’e lansa informasaun halo sensura ba informasaun relevansia sira ne’ebé  akontense iha terrenu, tamba iha sira defende klasse ida minoria ne’ebé domina hela nasaun ne’e.

Ita uza métodu pirámida Thematic, Lead, Bridge, Body No Closse[2] hodi análiza ba iha artigu ka notísia ida ita bele hatene kle’an kona-ba notísia ida ho loloos, nune’e bele identifika mis information, dis information, hoax no fake information.

Kode Étika Jornalistika[3] ba sira ne’ebé hala’o atividade servisu hanesan jornalístika komprete an tuir kode Étika sanulu  (10) ne’ebé  vigora ona iha Concelho de Impresa, kada númeru Primeiru too iha Desimu ko’alia kle’an ona, defende sidadaun sira nia diretu atu assesu ba informasaun, fó faktus ho ezatidaun atu bele kombate formas sensura, evita aktus sira ne’ebé  bele halo ema seluk la konfortável ( Privasidade), defende no garante informasaun sira ba ema ne’ebé vulnerável no la halo diskrimisaun ba formas étniku saida de’it mak iha sosio-Polítika no Sosio-Kulturál.

Preokupasaun prinsipál balun ne’ebé ita identifika ka anota husi mídia no  jornalista sira iha Timor-lesste dala balun sira hasoru dezafiu sira hanesan tuir mai ne’e:

• Laiha liberdade imprensa ( sensura no auto-sensura)
• Presaun Polítika ( Interferénsia governu nian)
• Informasaun ne’ebé sala ( propagasaun notísia falsu)
• Karakteristiku limitadu ( Fundu la sufisiénte)
• Difikuldade asessu informasaun tranparénsia husi governu (limita jornalista atu halo investigasaun efetivu)
• Mudansa teknolójia ( la preparadu ho rekursu umanus hodi adapta an ho mudansa plataforma sosiál no kompetisaun mídia sosiál)

Dezafius hira ne’e ezije atensaun husi parte relevante sira, hanesan Secretário Estado Comunicações Social (SECOMS) no Conselho De Imprensa (CI) nune’e mós ho Asosiasaun jornalista sira ne’ebé iha Timor-Leste inklui sosiedade sívil atu assegura ambiénte ida ne’ebé favorável ba servisu jornalistiku nian iha ita nia nasaun, tamba ita hatene oras ne’e daudaun mídia no plataforma sosiál sira avansadu loos nune’e ita tenke garante no hametin mídia nia ezisténsia ida ho independénte no transparénsia iha Timor-leste nune’e hodi lansa informasaun ida ne’ebé tuir situasaun sosiál ne’ebé akontese kada loron.

Problema balun ne’ebé  jornalista enfrenta iha sosiedade no instituisaun rasik liga ho informasaun ne’ebé jornalista sira rekolla maske lei garante liberdade espresaun no liberdade imprensa, iha prátika protesaun ba jornalista sira bele fraku. Faktus balun hatudu ona bainhira jornalista sira ba halo kobertura iha terrenu hetan impedimentu husi governu, sosiedade, ajente instituisaun públiku no privadu sira, to’o balun hetan detensaun husi PNTL no balun ba hatan iha Tribunál rekursus.

Dala-ruma jornalista sira mós hetan intimidasaun tan de’it atu halo investiga assuntu polémika sira bele hasoru ameasa, violénsia no asédiu sexual iha públiku, ka hetan mal-trata husi instituisaun sira no ema ne’ebé koko atu hamonu reputasaun mídia no jornalista nian.

Seraque dezafius ka difikuldade ne’ebé ajente jornalista sira hasoru se lo’os mak bele hamri’ik hodi defende no garante sira-nia liberdade  imprensa ka informasaun? Tansá ita presiza servisu hamutuk ho sosiedade sívil ka Assosiasaun Jornalizmu no parte Relevante sira  nian hodi hare’e kona-ba Mídia iha Timor?, hare’e ba problema sira ne’ebé jornalista sira sempre hasoru, durante ne’e maske iha lei-inan no lei oan sira au mezmu tempu lei espesífiku ba jornalizmu nian mós iha atu garante no proteje maibé la forte iha prátika.

Iha formas servisu hotu ita presiza assosiasaun ida hodi apoiu ba jornalizmu no mídia sira, atu nune’e iha assosiasaun refere toma konta ba nia servisu sira hanesan; Advokásia, formasaun no Workshop, kria rede apoiu, rekursus no finansiamentu, edukasaun no sensilizasaun públika, defenza direitu jornalizmu nian. Ba pontu interesante hirak ne’ebé mensiona ona, bele organiza sosiedade sira hodi halo advokasaun nune’e bele fó presaun ba governu atu garante liberdade imprensa no espresaun.

Kria programa ne’ebé efikásia sai hanesan mentória ba jornalista sira bele komprende kle’an kona-ba téknika jornalizmu, étika, verifikasaun faktu no ferramenta ba jornalista sira atu bele iha esperénsia profisionál iha kareira servisu. Aleinde ida ne’e tenke kria rede apoiu hodi halo kolaborasaun servisu nune’e bele halo kobertura ba assuntu sosiál no direitus umanus.

La naton de’it iha parte sira hanesan mensiona ona iha paragráfu antes, presiza mós parte governu hanesan (SECOMS) tenke servisu hamutuk ho CI nomós servisu hamutuk ho parte relevante sira liga ho komunikasaun sosiál, atu apoiu finansiamentu no materiál sira ba mídia ida-idak ho independénsia. Hasa’e edukasaun no sensibilizasaun públiku nia le’et ho identifika fonte sira ne’ebé konfiável ka importánsia iha área jornalizmu nian.

La’os de’it buat baibain maibé presiza mós halo defeza direitu jornalizmu nian tuir prinsípiu legalidade ne’ebé iha fó asisténsia legál ba jornalista ida-idak atu hala’o nia profisaun iha mundu jornalizmu, atu jornalista refere labele hetan persegisaun, violasaun, prosessu legál ruma ne’ebé la justu, asédiu sexual, abuzu sexual iha instituisaun atu bele promove liberdade imprensa no liberdade espresaun tuir dalan legál justu, serteza no benéfisiu.

Funsaun husi parte interessante sira hanesan SECOMS nia funsionamentu mak halo regulasaun ba mídia sira iha Nasionál (Timor-Leste), fiar ka responsável atu regula atividade servisu husi mídia no garante katak sira funsiona tuir lei no padraun  sira ne’ebé estabele ona liu-husi dalan legalidade. Servisu hirak  ne’e relativu mós ho Conselho de Imprensa (CI), atu halo fizkalizasaun no monitórizasaun hanesan orgaun ne’ebé superviziona prátika jornalístika no garante padraun étika iha mídia sira ne’ebé estabelese ona iha Timor-Leste.

Hafoin halo análiza ba mídia iha Timor-leste ne’ebé dezenvolve an hela tuir mundu modernizasaun hakat ba post-modernizasaun, utilizadór mídia sosiál iha Timor-leste kompara ho tempu kolonialista no Invazor nian direfente lo’os. Ohin loron mídia sosiál nu’udar elementu ida husi ema nia moris, ligadu ba prinsípiu legalidade iha estadu ida ne’e garante tebes liberdade imprensa no komunikasaun sosiál, dala-ruma iha implementasaun fraku tebes nune’e bele lori todan ida ba mídia no servisu jornalista sira atu dezenvolve an.

Jeralmente utilizasaun iha mídia Timor-leste maioria, maibé iha polítika nasionál mak la dezenvolve ho di’ak iha parte balun mós ita hare’e menus rekursus umanus no fasilidade sira atu fornese ba estasaun mídia sira ne’ebé hari’i ona bele mós falla iha finansiamentu hodi halo jestasaun ba servisu komunikasaun sosiál nian iha Timor-leste, maske instituisaun espesífiku kona-ba mídia iha ona verbalmente polítika mak la oferese oportunidade sufiénte hodi dezenvolve mídia ka plataforma sosiál sira ne’e.

Mudansa mídia iha ukun-an ida ne’e lori ita ba hare’e papél servisu sira ne’ebé relevante ho assuntu ne’ebé ita toka ba, atu bele garante kualidade no verdade informasaun sira iha mídia: 1. Tebes ka lae SECOMS no CI hala’o nia papel komplementár hodi promove ka garante liberdade imprensa no komunikasaun sosiál iha Timor-leste?,  2. Tamba sa mak mídia no ajente jornalista sira iha Timor-leste sei hasoru problema ka dezafius sira ligadu ho servisu komunikasaun sosiál?,  3. Sa polítika ida mak governu no parseria sira tenke halo hodi garante liberdade imprensa no direitu informasaun iha Timor?

Referénsia:

            Ho saida mak hakerek ona iha leten, mak eleborador foti referénsia sira atu halo fundamenta tan ba koñesimentu ka esperénsia sira ne’ebé mak hakerek ona, atu halo di’ak liu-tan mak referénsia sira hanesan tuir mai ne’e:

Dokumentu:

• Konstituisaun Repúblika Demokrátika Timor-Leste ( K-RDTL)
• Deklarasaun Unversál Direitu Umanus nian
• Kode Étika Jornalístika (CI) “www.conselhoimprensa.tl”

Livru:

• A. A Shahab ( Cara mudah Menjadi Jurnalis).

Jornál:

• Kartini, K., et al. “Teori dalam penelitian media.” Jurnal Edukasi Nonformal (2022).

[1] Deklarasaun Unversál Direitu Umanus nian

[2] Drs. A. A Shahab ( Cara mudah Menjadi Jurnalis)” halaman 95”

[3] Kode Étika Jornalístika (CI) “www.conselhoimprensa.tl”