Dili, 23 Setembru 2024 (Média Democracia) – Komunidade no sarani Timor-Leste ho sentimentu triste halo despedida ikus ho Sua Santidade Papa Francisco iha dalan ninin. Despedida ne’e iha loron 11 de setembru 2024
Lúcia Perreira ho sentimentu triste espresa, durante tinan 35 nia laran Timor-Leste hein prezensa Sua Santidade Papa Francisco tanba ne’e iha momentu vizita ne’e maske loron manas nia nafatin tur hein iha dalan ninin.
“Durante ne’e ita hein Amu Papa nia prezensa iha ita-nia rain ho tinan naruk tebes maibé ho grasa Maromak nian ohin loron nia bele mai to’o iha Timor, maske loron manas maibé nafatin pasénsia tur iha loron manas hodi haree Santu Padre.” Dehan Lúcia Perreira ba Jornalista Média Democracia iha Timor Lodge, Comoro Dili
Ho matan been nia deklara katak sente triste tebes tanba iha minutu balun de’it Santu Padre atu husi Timor-Leste.
“Ha’u sente triste tebes tanba Amu Papa atu fila ona hodi hala’o nia misaun iha rai seluk, sente hanesan mehi de’it durante loron tolu ne’e, laran dodok los maibé ho orasaun de’it bele reza ba Papa atu bele isin di’ak no vida naruk hodi hala’o misaun iha mundu.” Nia dehan
Nia dehan iha loron ikus ne’e maske loron manas nafatin firme iha dalan ninian hodi tur hein Sua Santidade atu simu bensaun ikus.
“Ohin loron ikus Papa atu husik hela ita hotu tanba ne’e ohin dader ha’u mai tur hein iha ne’e hodi haree Amu Papa tanba ida ne’e mak ita simu bensaun ikus husi nia, tanba ita la hatene bainhira tan mak Amu Papa atu mai fali ita-nia rai hodi ita simu tan nia bensaun.” Nia dehan
Iha fatin seluk Domingas Beli hateten, sente kontente bele hola parte iha vizita Sua Santidade Papa Francisco lori nia oan feto hodi simu bensaun husi Papa.
“Ha’u senti kontente tebes bele partisipa iha vizita Sua Santidade nian, liuliu ha’u lori ha’u nia oan ne’ebé hanesan defisiénsia mai hakarak hasoru nia hodi hetan bensaun tunba ha’u nia oan karik ho grasa Maromak nia bele di’ak.” Dehan Domingas Beli iha jardim Bebora
Nia informa katak iha dadersan tuku 08.00 sai husi Becora ho nia oan feto hodi hein Santu Padre iha dalan ninin hodi halo despedida no hetan bensaun ikus husi Sua Santidade.
“Hela iha Becora ne’ebá, ohin dadersan nia apa tula ami sai mai iha ne’e jam 08.00, mai iha ne’e hodi hein Amu Papa fila fali husik hela ita sarani Timor, sente hanesan despedida ikus ho ita, entaun ohin loron ami mai fali iha ne’e hodi hein atu nune’e ha’u nia oan bele hetan bensaun ikus husi Papa.” Nia dehan
Domingas afirma nia oan naran Febrianti Benevides ho idade 5, kondisaun defisiénsia fízika iha parte ain, ne’ebé ho antuziasmu hakarak tebes atu haree Santu Padre tanba ne’e iha dadersan de’it mai ona iha jardim Bebora hodi hein iha dalan ninin.
Reportajen : Estefánia
Foto : Estefánia