Dili, 22 Outobru 2024 (Media Democracia) – Prezidente no Laureadu Nobel ba Pás, J. Ramos-Horta, hahú vizita serbisu signifikativu ida ba Portugál husi loron 22 Outobru to’o 27 Outobru 2024. Vizita ida-ne’e abranje série ida husi kompromisu sira ho perfil aas ne’ebé foka ba dame, edukasaun, no relasaun internasionál sira.
Prezidente Ramos-Horta nia itineráriu nakonu ho eventu oioin no iha impaktu. Nia sei hahú ho enkontru ho estudante sekundáriu sira husi munisípiu Cascais ba sesaun Pergunta no Resposta interativu ida. Tuirmai Prezidente sei partisipa iha abertura Konferénsia Estoril nian iha Kampus Nova SBE Carcavelos, ne’ebé sentra iha tema “Tempu atu Hanoin Hikas.” Destake ida husi vizita ne’e maka Prezidente nia diskursu kona-ba Dame, iha ne’ebé nia sei ko’alia kona-ba tópiku krusiál kona-ba lidera nasaun sira ba dame ne’ebé dura. Diskursu ida ne’e sei konta ho estimadu prezensa husi Prezidente Portugal, S.E. Marcelo Rebelo de Sousa, tuir kedas ho enkontru informál entre líder na’in rua ne’e.
Prezidente Ramos-Horta nia oráriu inklui mós vizita komprensivu ida ba Kampus Nova SBE no Espozisaun Rethink Hub. Envolve ho komunidade akadémika, Prezidente Ramos-Horta sei halo entrevista ho estudante mestradu sira husi “Klube Estudante Polítika” no hasoru malu ho mídia portugés sira.
Prezidente sei iha sesaun enkontru no kumprimenta ho lideransa husi Institutu Polítika Públika Nova, hodi reforsa Prezidente nia kompromisu atu haburas kooperasaun internasionál no troka koñesimentu. Vizita ne’e konklui ho Prezidente Ramos-Horta simu Prémiu Literáriu Guerra Junqueiro iha Porto iha loron 26 kalan.
“Viajen ba Portugál reprezenta liu duké de’it kompromisu diplomátiku ida. Ida-ne’e hanesan oportunidade ida atu hametin ligasaun entre Timor-Leste no Portugál, hodi envolve ho foin-sa’e sira ne’ebé sai hanesan ita-nia futuru líder sira , no atu kontinua ita-nia diálogu ne’ebé la’o hela kona-ba dame no harii nasaun liuhusi fahe esperiénsia sira no haburas kooperasaun, ami loke dalan ba futuru ida ne’ebé pasífiku no prósperu liubá nasaun hotu-hotu.” Prezidente Ramos-Horta afirma
Vizita ne’e hatudu ligasaun forte entre Timor-Leste ho Portugál no destaka Prezidente Ramos-Horta nia kompromisu metin atu haburas pás, edukasaun, no kooperasaun internasionál.
Reportajen : Komunikadu Imprensa PR
Foto : Média Officer PR