Dili, 29 Outubru 2024 (Média Democracia) – Relasiona ho loron feto nasionál Timor-Leste ne’ebé monu iha loron 3 fulan Novembru 2024 mak Jestór Programa /Hamutuk ba Igualdade’ UN Women Timor-Leste Hato’o Mensajen hodi selebra loron importante refere.
Jestora Programa Hamutuk ba Igualdade Nuntana Tangwinit hato’o nia mensajen ba feto hotu iha Timor laran tomak atu jere liberdade iha nasaun ida ne’e hodi tau direitu hanesan ho mane sira.
“Liliu ba feto sira iha loron nasionál feto atu ezerse ita-nia liberdade iha Repúblika demokrátika Timor-Leste, feto sira iha liberdade no direitu hanesan ho mane, atu feto sira sente katak sira bele duni uza direitu ne’ebé konstitisaun fó ba sira hodi ezerse sira-nia liberdade nomos atu feto sira hotu bele sente katak tempu to’o ona atu sira espresa sira-nia aan, sira-nia sentimentu, sira-nia hakarak no vontade.” Dehan Nuntana Tangwinit Iha City8 Kinta feira ne’e (24/10/2024)
Nia dehan bainhira feto hotu ezerse nia liberdade bele hasa’e konfiansa ba sira-aan rasik atu nune’e sosiedade labele hanehan.
“Tanba bainhira ita ezerse ita-nia liberdade ka espresa ita-nia an, ita mós sei bele hasa’e ita-nia konfiansa ba ita-nia an no mosu ita-nia pensamentu katak tuir loloos ha’u bele no laiha ema ida ne’ebé bele hanehan ha’u, atu ha’u la ezerse ha’u nia direitu hanesan feto iha Timor-Leste.” Nia dehan
Nia haktuir katak mesmu mensajen ne’e ba feto de’it, maibé lia-menon ne’e mós dedika ba sosiedade sira ne’ebé hela iha kondisaun vulneravel no ba membru komunidade LGBTI.
“Mesmu mensajen fokus ba feto tanba loron feto nasionál maibé mensajen ne’e mós mai devia no konsidera ba ema hotu liliu ema sira ne’ebé hela iha kondisaun vulnerabilidade, ita-nia sosiedade hanesan labarik kualker labarik mesmu mane no feto, membru husi komunidade LGBTI ne’ebé mós baibain moris iha kondisaun vulnerabilidade husi prátika sosial ne’ebé dalaruma deskrimina ka la rekoñese sira-nia direitu hotu.” Nia haktuir
Entretantu ida ne’e mak mensajen badak husi Jestora Programa “Hamutuk ba Igualdade” UN Women Timor-Leste katak feto sira atu ezerse sira-nia liberdade no espresa sira-aan.
Reportajen : Estefania
Foto : Estefania