Dili, 06 Novembru 2024 (Média Democracia) – Plan Internasionál hamutuk ho parsériu dezenvolvimentu sira realiza Diálogu Interjerasionál ba Avansa Polítika, Edukasaun, Ekonomia, Sosiál no Kulturál ho tema ‘Feto Lidera Mudansa’. Atividade ne’e realiza iha Salaun TOWER fatuhada, Kuartu-Feira ne’e.
Jerente Programa Igualdade Jéneru iha Plan International Eta Mota hateten, objetivu husi dialogu ne’e atu akumula esperiénsia entre Jerasaun tuan no jerasaun foun sira nian.
“Objetivu prinsipál husi dialogu ne’e mak ita hakarak rona no fahe esperiénsia ba malu tuir jerasaun ida-idak nian katak jerasaun uluk no jerasaun atuál ne’ebé agora iha, aleinde fahe esperiénsia ita mós hakarak haree sira-nia estratéjia luta ne’e oinsá, nomos lisan importante saida mak jerasaun foun bele aprende husi jerasaun tuan sira.” Hateten Eta Mota ba Jornalista sira iha Salaun TOWER
Diálogu refere realiza haree liubá joven sira inklui Estudante universitáriu no feto sira ne’ebé envolve iha partidu polítika, feto potensiál, nomos iha atividade ne’e oradores sira ne’ebé iha esperiénsia ba luta nian hanesan Veterana KASIAN, Milena Pires nu’udar feto ne’ebé envolve iha vida polítika no ativista feto Juvita Perreira, nune’e sira bele akumula hanoin entre jerasaun foun no tuan.
Nia dehan dadaun ne’e feto nia involvimentu másimu ona, maibé presiza hadi’ak lakunas balun.
“Ita haree katak dalaruma ita ho sistema patriarkál feto ladún iha oportunidade, maibé hakarak dehan oinsá feto ne’e iha unidade para atu bele ajuda no suporta malu, nune’e feto bele la’o ba oin nafatin, tanba nasaun ida forte tenki iha feto ho mane ida nia servisu hamutuk, Ha’u haree agora dadaun ne’e mós iha barak feto ne’ebé involvimentu iha parte ekonómia, ita haree emprezária sira ne’e maioria feto mós barak ne’ebé sai ema di’ak iha parte negósiu nian.” Nia dehan
Nia hatutan katak Plan International rasik halo atividade barak iha parte ekonómia nian, ne’ebé servisu hamutuk ho joven sira hodi halo impréstimu ba Osan no Rai osan, halo Bisnis iha parte agrikultura nomos hanorin kona-ba Jestaun negósiu liga ho merkadoria.
Projetu ne’e rasik foku uluk ba iha Munisípiu tolu hanesan Munisípiu Aileu, Ainaru no Manufahi nune’e iha futuru sei haree mós ba iha Munisípiu seluk.
Iha fatin hanesan Diretora Ezekutiva Asosiasaun Esperansa Feto ho Defisiénsia iha Timor-Leste, Madalena da Costa Agradese ba oportunidade hodi partisipa iha dialogu ne’ebé envolve joven feto no feto ho defisiénsia, hodi fó ideia ba malu hodi haree ba iha asaun foti desizaun nian.
“Ita haree dalabarak liliu ba labarik feto no joven feto sira iha foti desizaun nian tanba dalabarak ita haree katak mane sira mak iha direitu, feto nafatin hela iha kotuk, maibé ita Agradese tanba agora dadauk ita-nia governu ida ne’e komesa Promove feto hodi fó oportunidade ba feto nia direitu iha foti desizaun no bele envolve iha vida polítika.” Nia espres
Tanba dadaun ne’e Presidente Parlamentu Nasionál feto mak lidera no iha instituisaun balun mós feto asumi kna’ar, nomos iha organizasaun defisiénsia, feto ho defisiénsia mós lideransa rasik iha organizasaun, nune’e komesa iha mudansa ona hodi promove feto no haktuir katak feto no mane iha direitu hanesan.
Nia informa liuhusi observasaun nu’udar feto ho defisiénsia nota katak feto nia partisipasaun sei menus iha seitores oioin.
“Liliu iha área ekonomia no vida polítika nian, tanba iha polítiku balun dehan feto ne’e menus rekursu no feto laiha direitu, maibé agora feto komesa luta makas nomos feto Defisiénsia sira mós komesa luta makas atu ba futuru ne’e feto ho mane bele iha direitu hanesan ne’ebé ita dehan Igualdade jéneru, ita haree komesa iha mudansa feto nia luta liliu ba iha ekonomia nian no polítika nasionál.” Nia informa
Nia mós enkoraja feto sira, liliu joven espesiál ba feto ho defisiénsia sira katak labele baruk atu aprende, luta no esforsu nafatin tanba ema hotu iha direitu iha lei nia oin, signifika katak labele husik ema ida iha kotuk.
Inklui Feto no mane, labarik no feto ho defisiénsia sira iha direitu hanesan tan ne’e labele lakon oportunidade nafatin brani hodi luta ba mudansa.
Reportajen : Estefania
Foto : Estefania