Quelecai, 08 Novembru 2024 (Média Democracia) – Governu liuhusi Sekretária Estadu ba Igualdade realiza komemorasaun loron nasionál feto ba dala 48 hamutuk ho komunidade sira iha suku Laculiu Postu-Administrativu Quelecai, Munisípiu Baucau hodi hanoin hikas Heroina sira-nia mate iha tempu pasadu liliu Maria Tapó ne’ebé fó nia vida tomak ba luta autodeterminasaun ba independénsia. Atividade ne realiza iha loron 07 Novembru 2024
Tinan ne’e Sekretaria Estadu ba Igualdade selebra Loron Nasionál ho Tema “ Feto Iha Prosesu Dezenvolvimentu Nasionál Depois Tinan 25 Konsulta Populár”, antes ne’e mós sekretaria Estadu ba Igualdade servisu hamutuk ho Ministeriu Saude hodi realiza atividade publiku Doasaun Ra’an iha Timor Plaza iha loron 25 Outubru 2024 ho Tema “Ra’an Turuk Ida Bele Salva Inan Ida Nia Vida”.
Iha Diskursu Sekretária Estadu ba Igualdade, Elvina Sousa hato’o parabens ba Feto Tomak iha Timor-Leste ne’ebé selebra loron nasional Feto ba dala-48 hanesan parte importante ida hodi fó valor ba feto no Heroina sira ne’ebé fó-aan ba mate hodi defende Timor-Leste ba prosesu luta ba ukun rasik aan.
“Loron 3 fulan Novembru hanesan loron importante ba inan feton sira, husi loron ne’e ita hamutuk hodi fó valor ba inan feton sira no Heroina sira nia didikasaun ba prosesu luta ba ukun rasik a’an, iha ne’ebé balun hetan torturasaun no intimidasaun inklui violasaun seksual.” Hateten Sekretária Estadu ba Igualidade, ne’ebé Jornalista Media Democracia asesu liuhusi Pájina Ofisiál SEI nian Sesta Feira ne’e.
Selebrasaun loron ne’e hodi fó korajen ba Feto sira no ema hotu iha Territóriu Timor laran ho sentidu Nasionalismu ba Heroina sira.
“Ho sentidu Nasionálizmu ba feto Heroina sira ne’ebé ho aten barani sakrifika-aan ba prosesu luta naruk Timor nian, Aleinde ne’e mós hodi korajen Feto maluk foinsae sira atu luta ba dezenvolvimentu hanesan ho feto maluk Maria Tapo ne’ebé barani tebes foti risku ba nia-aan hodi hamrik iha liña frente hasoru invazor sira.” Nia dehan
Nia esplika katak tinan ne’e Sekretária Estadu Igualdade hili Postu-Administrativu Quelecai hodi Selebra Loron Nasionál Feto tanba atu konsensializa ba Komunidade iha postu refere kona-ba Igualdade Jéneru, inklui hafanun feto sira hodi partisipa ativu direitamente iha dezenvolvimentu Nasionál.
Iha selebrasaun ne’e mós Sekretaria Estadu ba Igualdade (SEI), realiza mós Dialogu ho komunidade sira hodi rona prekupasaun populasaun nian kona-ba asuntu Igualdade Jéneru no Promósaun Igualdade Jéneru.
Iha biban ne’e mós Administradór Postu-Administrativu Quelecai, Paulo Jacinto Morreira Agradese ba Sekretária Estadu ba Igualdade tanba hili Postu-Administrativu Quelecai hodi selebra loron importante ne’e, ne’ebé populasaun sente orgullu tebes ba programa ne’e rasik.
Iha sorin seluk, Juvita Nia Amaral espresa nia sentimentu kontente ho prezensa Sekretária Estadu Igualdade ne’ebé hodi motiva feto sira iha postu refere.
“Kontente ho programa SEI ne’ebé bele hili Postu Quelecai sai fatin selebrasaun loron Feto Timor-Leste ba dala 48, tanba objetivu atu motiva sosiedade tomak Postu Quelecai nian hodi husik feto sira kompete iha prosesu dezenvolvimentu, tanba durante ne’e laiha planu di’ak ba eventu refere, laiha mós programa ne’ebé motiva komunidade sira.” Juvita Espresa
Reprezenta Povu Quelecai ne’e mós husi ba Sekretária Estadu Igualdade atu hakbesik nafatin komunidade sira ba iha programa Igualdade jéneru to’o iha área Remotas hodi empoodera liután feto sira iha área saúde, edukasaun Agrikultura no seluk tan. Tanba komunidade sira iha baze seidauk iha koñesimentu oinsá mak fó livre ba feto atu partisipa iha dezenvolvimentu.
Entretantu iha selebrasaun refere Grupu Benefisiáriu husi fundu hadular Re-entrega hikas Fundu ba Asosiasaun Prezidente Asosiasaun Feto Hadomi Baucau Ba Dezenvolvimentu (AFEHABAD), Grupu ne’ebé etrega hikas fundu mak hanesan Grupu Muda ba Moris enterga osan ho montante hamutuk $2000.00, Prepara ba Futuru enterga osan ho montante hamutuk $2000.00.
Enkuantu kreditu Uniaun Bina Remaja enterga osan ho montante hamutuk $1500.00, HABERS enterga osan ho montante hamutuk $1500.00, HAMELALE enterga osan ho montante hamutuk $1500, OSCA enterga osan ho montante hamutuk $2000.00, ESTRELA enterga osan ho montante hamutuk $2000,00, no Roman Lorosae. enterga osan ho montante hamutuk $2000.00 maibé Entrega uluk $1000.00.
Iha atividade ne’e marka prezensa mós husi Embaixador Uniaun Eropeia, Repezentante Embaixador Australia Iha Timor-Leste, Care InterNasionál, Mercy Corps, Plan InterNasionál, Administrador Postu 6, Autoridade Lokal husi Postu 6, Reprezentante husi Liña Ministeriu sira, PNTL no Fenenima husi instituisaun F-FDTL nomos Populasaun sira husi suku 15 husi postu-Administrative Quelecai.
Embora selebrasaun loron nasionál feto ne’e iha mós misa agradesementu no tau ai-funan iha Simiteriu Masacre Lacudada 1979.
Reportajen : Pájina Ofisial SEI
Foto : Pájina Ofisial SEI