Dili, 18 Novembru 2024 (Média Democracia) – Moris iha mundu ema hotu hakarak hetan buat di’ak iha sira-nia moris hodi bele responde ba nesesidade loron-loron nian, maibé Rosalinda Pinheiro de Jesus ho idade haat-nulu (40), Deside buka moris hodi leba ai-fuan sira hanesan Hudi, uvas, haas no seluk tan hodi bele sustenta ba nesesidade familia nian liuliu ba oan nain ualu (8), feto na’in neen (6) no Mane na’in rua (2), dadaun ne’e hela iha Manleuana, no mai husi Suku Fahi-Soi, Postu-Administrativu Remexio, Munisipiu Aileu.
Rosalinda Pinheiro de Jesus haktuir katak, Deside buka moris liuhusi dalan leba ai-funa sira hodi bele responde ba nesesidade familia nian, tanba husik malu ho laen durante tinan barak nian laran.
“Ha’u nu’udar ai-leba nia oan hodi luta ba moris ne’e senti lá fasil ba ha’u, senti todan tebes, maibé tanba deit nesesidade obriga ha’u tenki halo servisu ida ne’e, ha’u hahú fa’an sasan hirak ne’e durante tinan barak ona, hahú husi tinan 1999 too agora hodi luta ba moris ida ne’e. Ha’u ho nia kaben husik malu durante tinan barak ona no soe hela ha’u ho oan na’in Ualu (8) no na’in Ualu ne’e na’in rua (2), mak asesu ba edukasaun no na’in neen (6) lá asesu na edukasaun tanba ha’u mesak forsa la to’o atu suporta oan sira seluk hodi asesu ba edukasaun, tanba ha’u mesak mak buka osan hodi sustenta oan sira, nune’e ha’u kontinua leba ai-fuan sira hodi fa’an tuir dalan no tasi-ibun sira, hodi bele hetan netik bukae balun hodi responde ba nesesidade familia nian liuliu ba oan sira.” Dehan Rosalinda Pinheiro iha Tasi ibun Palasiu.
Nia esplika liutan katak, atividade loron-loron ne’ebé halo tenki simu realidade tanba deit buka moris, nune’e labele depende ba ema seluk, no oinsa atu responsabilidade ba familia nu’udar inan no aman dala ida deit.
“Loron-loron ha’u nia servisu mak tenki leba ai-fuan tuir dalan ninin, ai-fuan sira ne’e ha’u hola iha merkadu Taibesi, Dadersan ha’u tenki preprara aan sai husi uma Manleuana hodi ba iha merkadu Taibesi hodi hola ai-fuan sira hanesan hudi, uvas, haas, saburaka, no seluk tan, ai-fuan sira ha’u hola ne’e tuir presu hanesan, husi sasuit ema fa’an ba $1 entaun ha’u hola fali no fa’an fila-fali ho presu $1.50, sorti di’ak ema hola hotu, entaun loron ida bele hetan too $50 $60, maibé kuando ema la hola hotu, loron ida bele hetan $30 dolar de’it, no ai-fuan sira ne’e han no estraga deit. Osan hirak ne’ebé ha’u hetan ne’e rai hamutuk hodi hola hahan no balun rai hodi selu ona na’in rua nia eskola.” Dehan Nia
Nia hatutan liután katak la baruk la moe hodi esforsu buka moris atu leba sasan hodi fa’an, senti katak leba ne’e hanesan servisu mane nian, maibé nafatin esforsu no brani hodi halo servisu ida ne’e. Se bainhira la halo servisu, oinsa atu bele hetan osan hodi sustenta ba nesesidade loron-loron nian, maske hetan rendimentu oituan nafatin agradese hodi luta nafatin ba moris ne’e no responsabilidade ba oan sira-nia moris.
Reportajen : Tomas
Foto : Tomas