Dili, 19 Novembru 2024 (Média Democracia) – Relasiona ho akontesimentu ne’ebé espalla iha media sosial xefe suku bebonuk deklara asaun ne’e la’ós la gosta joven suku bebonuk maibé ida ne’e hanesan asaun ida xefe suku halo hodi fó motiva ba joven sira atu labele diskrimina malu iha suku ne’e, maibé tenki kria paz no domin iha suku bebonuk rasik.
Iha entrevista ho xefe suku Bebonuk Alfredo da Costa hateten, hanesan xefe suku foin hetan tomada pose iha loron 9 fulan jullu tinan ne’e foin hala’o mandatu hanesan xefe suku iha bebonuk fulan lima antes atu ukun, iha kampaña koalia ona katak mai atu hamutuk ho komunidade suku bebonuk atu hadia bebonuk no mai atu halibur hamutuk komunidade sira la’ós mai atu destroi komunidade sira ka atu halo diskriminasaun ba iha komunidade suku Bebonuk Postu-Administrativu Dom-Aleixo Munisipiu Dili.
“Relasiona ho akontesimentu ne’ebé horiseik esplla iha media sosial ha’u hanesan xefe suku bebonuk foti desizaun ba joven nain hitu (7) husi aldeia meti 3 no aldeia 2 inklui mós aldeia meti 4 tanba joven nain hirak ne’e hela kahur malu de’it hodi hakne’ak iha bandeira hun, asaun ne’e hanesan meius ida hodi hanorin joven sira la signifika katak ha’u la gosta sira ka halo diskriminasaun ba sira maibé husi asaun ida ne’e ho objetivu rasik katak oinsá atu fó hanoin ka motiva joven sira atu sai ema ne’ebé labele halo problema hela de’it, tanba ita hanesan nasaun demokratiku iha 12 de novembru ita-nia joven barak fó sira nia-an ba mate, sira la haree ba kor no sira sai ema ida de’it hodi hamutuk luta ba iha libertasaun ba nasaun ida ne’e.” Lia hirak ne’e xefe suku hato’o iha nia servisu fatin sede suku bebonuk.
Nia hatutan joven sira ne’ebé horiseik halo problema iha aldeia hirak ne’ebé ohin mensiona ona ne’e sira rasik mak mai entrega an ba iha xefe suku iha sede suku bebonuk rasik, tanba sira konsidera katak xefe suku mak sai aman ba iha suku bebonuk rasik, entaun sira mai entrega-an, suspeitu nain hitu nomos vitima nain rua ne’ebé hetan tuda, vitima ida suku pontu neen no ida seluk kona iha tilun-hun nian, sira lakoi ba entrega an iha polisia maibé sira mai iha xefe suku no suspeitu nain hirak ne’e prontu atu resolve no hetan sansaun saida de’it mak xefe suku fó ba vitima na’in rua, nomos vitima nain rua prontu resolve ho suspeitu sira.
“Suspeitu nain hitu ne’e mai deklara katak sira mak tuda duni vitima nain rua ne’e no ha’u mós husu ba sira tanba saida maka imi lakoi lori malu ba iha polisia, tanba imi hatene katak tuda malu no ema ran ne’e krime maibé sira hatan, lae xefe suku ami mak hakarak lori malu mai iha sede suku, tanba xefe suku hanesan ami nia aman iha suku ne’e depois la’ós sira nain hirak ne’e mesak mai, maibé sira lori inan-aman mai hotu hodi resolve depois atu foti asaun ida ne’ebé horiseik haruka sira hakneak ne’e, la’ós hau mesak maibé iha mós Ministeriu Interior nia ema ne’ebé destakadu iha postu nian mai hotu no parte vitima protu atu resolve ho sira.” Nia informa
Xefe suku bebonuk salienta asaun hirak ne’e la’ós desizaun mesak husi xefe suku maibé husu konkordansia mós husi vitima atu fó sansaun saida ba iha suspeitu sira, entaun parte vitima hateten katak xefe suku sira kura ami nia kanek nomos sira hakne’ak iha bandeira-hun, entaun xefe suku la’ós hatan de’it maibé sei husu ba parte suspeitu konkorda ka lae ho sansaun ne’ebé iha no suspeitu sira prontu, entaun sira hakne’ak iha bandeira hun no kura vitima sira nia kanek, asaun hirak ne’e la’ós xefe suku la gosta joven sira lae, maibé hadomi joven sira atu labele kria problema, atu nune’e bele hadomi malu no hamosu paz iha suku bebonuk rasik.
Reportajen : Domingas
Foto : Nelfiano