Dili 26 Setembru 2024 (Media Democracia) Autoridade Protesaun Civil (APC) asina no entendimentu ba kooperasaun entre Cruz Vermella Timor-Leste (CVTL) atu servisu hamutuk hodi responde ba dezastre naturais ne’ebé akontese iha Timor-Leste. Atividade ne’e realiza iha Salaun APC Caicoli Dili. Kuarta-feira semana ne’e.
Iha diskursu Sekretariadu Autoridade Protesaun Sivil (APC) Domingos Mariano Reis, apresia tebes ho prezensa CVTL nian tanba ita hatene katak mudansa klimatika sai preokupasaun mundial, nune’e governu servisu hamutuk ho parseiru sira hodi bele responde ba dezastre ne’ebé sempre akontese iha Timor-Leste.
“Ita hatene mudansa klimatika no dezastre naturais sai preokupasaun mundial, nune’e IX governu konstituisional apresia ba asaun ne’ebé CVTL halo, tanba dezastre ne’ebé akontese iha teritoriu Timor-Leste nune’e organizasaun ne’ebé servisu hamutuk ho APC mak CVTL. Governu delega ona kompetensia ba sekretariu Autoridade Protesaun Sivil atu planeia, kordena no implementa politika governu nian, kompetensia ne’e atu hametin kooperasaun entre APC ho parseiru nasional no internasional, importante tebes tanba governu rasik sei menus ho rekursu umanu atu responde ba nesesidade hotu-hotu, nune’e ita tenke hametin kooperasaun ho parseiru sira, tanba akontese dezastre naturais sira mak sei fó apoiu.” Dehan Sekretariadu Autoridade Protesaun Sivil (APC) Domingos Mariano Reis
Nia afirma asinatura ne’ebé APC ho CVTL halo bele garantia no sustentabilidade ba dezemvovimentu nasaun nian, nune’e ita sei seguru ba dezastre naturais liuhusi planu no asaun sira ne’ebé APC halo, tanba ne’e hanesan pilar datoluk husi sitema nasional mai ho nia programa rua ne’ebé importante tebes hodi asegura sistema seguransa nasional no dezemvolvimentu instituisional.
Iha sorin seluk Sekretariu Cruz Vermella Timor-Leste (CVTL) Luis Pedro Pinto, iha diskursu hateten servisu hamutuk ho APC atu hametin liutan komunidade ida ne’ebé rezilensia presiza tebes ema hotu nia kontribuisaun tanba Timor-leste vuneravel tebes ba eventu dezastre sira hanesan udan-boot, anin-boot, Bai-loro naruk, inundasaun no seluk tan.
“Timor-leste sai hanesan vunerabel relasiona ho peritu barak no fó ameasa ba ita nia nasaun no ema sira, haree ba topografia ne’e no infraestrutura ne’ebé akontese husi eventu sira hanesan udan-boot, anin-boot, bailoron-naruk ,inundasaun no seluk tan ne’e akontese bebeik iha Timor-leste nomos sustentavel ba iha rai-nakdoko no tasi-sa’e maske la akontese bebeik. Atu hametin nafatin gestaun risku ba dezastre ba komunidade sira ne’ebé rezilensia presiza tebes ita nia servisu hamutuk.” Dehan Sekretariu CVTL, Luis Pedro Pinto
Nia hatutan tan katak orgullu tebes tanba APC asina nota entendimentu hodi servisu hamutu ho CVTL nune’e kompromete katak sei prepara di’ak liutan bazeia ba misaun no vizaun ne’ebé iha hodi reduz risku dezaste iha Timor-leste.
“Ami CVTL apresia ho APC nia kolaborasaun ida ne’e, CVTL prontu servisu hamutuk ho ekipa APC hodi hala’o misaun no vizaun hodi promove no harii komunidade ne’ebé reziliente iha Timor-leste liuhusi servisu hamutuk ho parseiru sira hodi reduz risku dezastre iha Timor-Leste. CVTL kontente tebes hodi asina nota entendimentu ida ne’e hodi eleva ami nia parseria iha nivel tuir mai, nune’e CVTL kompromete atu MANTEIN servisu hamutuk ho APC. Tanba iha nota ida ne’e ita foka liubá preparasaun no oinsá halo rezilensia ba komunidade inklui halo kooperasaun iha asuntu dezastre no krize umanitaria.” Hatutan Nia
Nia esplika liután katak ema hotu nia hamutuk mak bele priense problema sira ne’ebé akontes, tanba ita konsiente katak iha dezafiu barak mak ita infrenta, nune’e APC no CVTL fiar metin katak servisu hamutuk mak dalan ne’ebé di’ak hodi ultrapasa obstakulu hotu ne’ebé akontese, CVTL nia kolabrasaun ho parseiru sira iha nasional no internasional hodi prepara atu responde dezastre emerjensia ne’ebé akontese Timor-Leste.
Reportajen : Basilio
Foto : Basilio