Dili, 25 Novembru 2024 (Media Democracia) – Timor-Leste nia Avaliasaun Esterna Konjunta (JEE) daruak konklui ho susesu ekipa hosi peritu internasionál na’in 22 ne’ebé elojia nasaun nia progresu iha preparasaun ba hasoru emerjénsia saúde enkuantu trasa rekomendasaun xave sira hodi hadi’a liután. JEE antes ne’e hala’o iha 2018, JEE avalia kapasidade nasaun ida nian atu prevene, detekta, no responde ba emerjénsia saúde sira tuir Regulamentu Saúde Internasionál (IHR, 2005), iha loron-sesta semana ne’e
Vise-Ministru Saúde ba Fortalesimentu Institusionál, José dos Reis Magno, informa iha semana ida nia laran, ekipa halo avaliasaun fatin xave sira, inklui Aeroportu Nicolau Lobato, Portu Dili, Portu Tibar, HNGV, laboratóriu nasionál no animál sira, INSP-TL, Servisu Saúde Munisípiu Dili no sentru saúde oioin.
“Avaliasaun ne’e kobre área téknika 19 no indikadór 56, ne’ebé foka ba vijilánsia moras, sistema laboratóriu, resposta emerjénsia, seguransa ai-han, moras zoonótika, bioseguru no bioseguransa, rezisténsia antimikrobiál, no seluk tan. Peritu sira haree filafali protokolu sira, analiza dokumentu sira, no engaza ho reprezentante lokál sira.” Dehan Vise-Ministru Saúde ba Fortalesimentu Institusionál, José dos Reis Magno
Nia hatutan rekomendasaun preliminár sira sublina nesesidade atu adota aprosimasaun One Health, hametin área sira ne’ebé laiha rekursu hanesan saúde veterinária no ambientál no hasa’e koordenasaun intersetoriál liuhosi investimentu no responsabilizasaun ne’ebé klaru. Peritu sira elojia Timor-Leste nia progresu signifikativu iha área téknika 19 nia laran. Sira nota katak enkuantu prátika di’ak sira eziste, balun presiza institusionalizasaun. Sira subliña atu transforma susesu boot sira hosi Covid-19 ba sistema no polítika multi-setoriál ne’ebé dura. Ekipa elojia Timor-Leste tanba koloka médiku sira iha kada fasilidade saúde no aumenta reprezentasaun jéneru iha knaar lideransa nian.
“Vise-Ministru Saúde ba Fortalesimentu Institusionál, konsidera deskobrimentu sira hosi JEE “Foin boot tebes” durante aprezentasaun iha loron-sesta. “Ida-ne’e fornese mai ami matadalan ida ne’ebé klaru atu hametin ami-nia kapasidade seguransa saúde nian, aliña ho prioridade nasionál sira no obrigasaun internasionál sira. Ami nia objetivu la’ós de’it kumprimentu ka kumpre padraun internasionál sira maibé atu harii saúde ida ne’ebé sistema reziliente .” Hatutan nia
Iha fatin hanesan Reprezentante OMS nian ba Timor-Leste, Arvind Mathur, hatete bolu JEE nu’udar “marku” ida hodi hametin kapasidade sira IHR nian.
“Seguransa saúde ne’e responsabilidade ida ne’ebé fahe, Dr. Mathur husu envolvimentu ativu hosi setór hotu-hotu, hosi agrikultura no ambiente to’o alfándega, imigrasaun, kontrolu fronteira, no importante liu, komunidade sira.” Dehan Arvind Mathur
Nia hatutan subliña importánsia atu tau rekomendasaun sira ba polítika no programa sira ba mudansa signifikativu, enkuantu OMS kompromete hodi apoiu ba implementasaun.
Iha sorin seluk Xefe ekipa ba misaun JEE, Karen Sliter, sublina atinjimento sira no progresu konsideravel sira ne’ebé halo ona iha Timor-Leste dezde JEE ikus iha 2018. Iha 2024, uza ona JEE 3, versaun atualizadu ne’ebé evolui ona hosi ida ne’ebé uza iha 2018.
“Feramentu ida-ne’e hasa’e ona padraun no fornese diresaun sira ne’ebé maka’as liu atu hametin nasaun nia kapasidade. “Maske nune’e, importante atu hanoin katak valor ne’ebé sira mesak la hadi’a seguransa saúde, maibé presiza tau énfaze ba asaun prioridade sira.” Nia hatete.
Aleinde ne’e mós Reuben Samuel, ko-líder hosi ekipa JEE, esplika katak aprosimasaun JEE nian ne’ebé bazeia ba konsensu garante nasaun uma-na’in nia envolvimentu tomak iha akordu kona-ba valor/score sira, asaun prioridade no relatóriu finál.
“Kada área téknika hetan klasifikasaun hosi 1 (laiha kapasidade) to’o 5 (kapasidade sustentável). “Ezbosu relatóriu ne’e sei fahe ho nasaun hodi halo konsultasaun atu asegura katak reflete loloos sira-nia kapasidade.” Nia hateten.
Esplika kle’an liután katak ekipa JEE fornese asaun prioridade tolu to’o lima ba kada área téknika, ne’ebé sei sai hanesan fundasaun hodi dezenvolve planu asaun nasionál ba seguransa saúde ba tinan lima oin mai.
Reportajen : Nelfiano
Foto : Média Officer