Letefoho, 25 Novembru 2024 (Média Democracia) – To’os na’in kafé kada tinan sempre halerik ba kafé nia folin tanba laiha presu kafé ne’ebé fiksu, tinan 2024 ne’e foin to’os na’in sira kontente tanba presu sa’e ba kilo ida 0.50 sentavus.
Xefe suku Catrai-Craik Carlos Soares hateten presu kafe iha suku Catrai-Craic sai hanesan difikuldade ba iha komunidade kada tinan to’os-na’in sempre halerik ba kafé nia folin tanba kafé nia folin la permanente hola na’in sira fó folin haree ba produsaun kafé barak kafé nia folin tun.
“Nia problema mak ne’e tinan-tinan mai laiha presu kafé ida ne’ebé fiksu, nia presu ne’e tinan-tinan sempre muda, kompañia ka hola nain sira ne’e haree ba iha produtu kafé ninian, sira haree tinan ne’e kafé fuan barak folin ne’e sira hatun fali, iha tinan ida ne’e komunidade sira sente kontente oitoan tanba nia presu ne’e komesa husi 0.50 sentavus, tanba kafé nia produsaun menus, tinan-tinan sira ba kotuk nia folin mak koko ida 0.25 to’o 0.35 sentavus.” Dehan Xefe Suku Catrai-Craik ba Jornalista sira iha sede Suku Catrai-Craik kinta ne’e (21/11)
Impaktu husi kafe nia folin tun ne’e ida mós depende ba mudansa klimátika ne’ebé afeta ba produsaun kafé tun, nune’e hamate kafé nia folin ba komunidade sira.
“Kada tinan populasaun sira sempre triste hela ba kafé nia folin ne’e tanba laiha merkadu ida atu fó biban ba kafé nain atu sira hatene loos presu ne’e hira ba kada tinan, produsaun menus tanba impaktu husi ba-iloron naruk halo kafé nia produsaun, kuandu udan ho anin mai makas liu halo kafé nia fuan sai namtate hotu tanba ne’e mak kada tinan nia impaktu ba produsaun kafé menus.” Dehan xefe suku Carlos Soares
Aleinde ne’e kafé nia folin tun haree mós ba impaktu husi Estrada ne’ebé difikulta ba komunidade sira labele lori kafé ba iha merkadu tanba dalan husi aldeia no suku ba merkadu at tebes.
“Tanba impaktu ba estrada-at, komunidade sira labele lori sira-nia produtu ba iha merkadu hodi hetan osan ruma hodi suporta sira-nia oan nia estudu, problema barak la halimar ho nesesidade familia nomos dook husi vila, entaun nia problema ne’e mak estrada, estrada komesa di’ak oitoan ona maibé seidauk bele to’o ba iha aldeia sira.” Nia dehan
Autoridade lokál ne’e informa kada tinan autoridade lokál sira sempre enkontru iha nivel munisipál hodi deskuti kona-ba kafé nia folin, maibé Ministériu Comérsiu Indústria dehan kafé nia folin sei tama iha merkadu livre.
“Hanesan lideransa komunitária ami sempre enkontru kada tinan iha munisipal, MCI kuandu bolu ami ba ne’e, ami Ermera tomak sempre kestiona beibeik kona-ba kafé nia folin ne’e maibé nia resposta mak dehan ita-nia lei ne’e adopta hela sistema merkadu livre, depois kafé nia folin ne’e seidauk iha definisaun ida ba presu kafé ho loloos.” Dehan Xefe Suku Catrai-Craik Ba jornalista sira iha sede suku Catrai-Craic kinta feira ne’e (21/11)
Nia dehan nu’udar autoridade lokál preokupa tebes ba kafé nia folin tanba komunidade Munisípiu ermera maioria moris ho kafé.
“Tanba ne’e mak ami preokupa loloos hela kafé nia folin tanba maioria populasaun Ermera moris ho kafé mas kuandu ho kafé nia folin tun sa’e, presu seidauk loos hanesan ami komunidade liuliu to’os nain kafé sira hanesan ita kuda maibé sei sai hanesan tan hela, tanba tinan-tinan kuda hela kafé, hamoris kafé duut, kuidadu kafé mas ita nafatin sai atan hela ba iha kompañia ka hola-na’in sira.” Nia dehan
Nia informa iha suku refere iha kompañia tolu mak tama iha área refere hodi hola kafé hanesan NCBA, Timor Corp, Timor Global, no tinan ne’e kafé Atsabe mós hola kafé iha suku Catrai-Craic.
Iha biban ne’e sosa na’in Marcel de Deus nu’udar funsionáriu iha National Cooperative Bisiness Association (NCBA) hateten, kafé nia presu ne’ebé fó ba agrikultura ne’e bazeia ba presu merkadu internasional, kompañia labele fó folin arbiru tanba laiha lei hodi deside ba folin kafé.
“Molok ami sosa kafé ne’e, kafé nia presu ami haree ba merkadu internasional, ami la fó folin tuir ami-nia hakarak bazeia ba presu husi merkadu, ami labele desidi nia folin tanba ami laiha lei hodi deside kafe nia folin, ami bazeia ba merkadu internasional, ezemplu ami husi ne’ebá fó presu 0.50 sentavus ami fa’an tuir ida ne’e, ami labele fó liu husi ne’e.” Dehan Marcelo ba jornalista sira iha Sede Suku Catrai-Craic.
Kona-ba folin kafé ne’ebé kompañia seluk sosa ho folin ás tanba sira uza rasik osan sira-nian hodi aumenta kafé nia folin ba 0.50 kada kilograma ida.
“Nia folin ne’e hanesan sira husi kompañia seluk nia bolsu de’it hanesan ami fó ba sira 0.50 sentavus sira mai sosa aumenta ho folin 0.52 sentavus ka 0.55 sentavus, sira lori ida ka rua liu mai ami, ami fó 0.50, ne’e tanba ami iha kafé oan, ami iha viveirus fahe ba sira, rai metan, ai oan ba agrikultor sira, ami mós iha klínika ba halo tratamentu gratuita.” Nia dehan
Entretantu programa média Tour ne’e realiza tanba Asosiasaun Jornalista Timor-Leste (AJTL) Servisu Hamutuk ho Oxfam iha Timor-Leste ne’ebé hetan fundu husi Oxfam Hongkong.
Reportajen : Estefania
Foto : Estefania