Letefoho, 26 Novembru 2024 (Média Democracia) – Eskola Bázika Filiál nú. 238 Tata-Mailau, Leobasa menus sala de aula, Profesór sira obrigatóriu tau hamutuk estudante 5 ano ho 6 ano iha Aula ida hodi tuir ensinu aprendijazen.
Lia-hirak ne’e hato’o husi Koordenadór Jerál EBF Nú.238 Tata-Mailau, Leobasa Domingos Soares ba Jornalista sira iha nia kna’ar fatin Kuarta Feira ne’e.
Eskola EBF nú. 238 Tata-Mailau dadaun ne’e hasoru problema hanesan menus aula ba estudante sira hodi hala’o prosesu aprendijazen tanba Sala de Aula la sufisiente tenki koloka estudante kalse 1 no 2 hamutuk nune’e mós kalse 5 ho 6 anu.
“Eskola refere iha aula-tolu de’it maibé estudante sira hahu husi primeiru ano to’o sexto ano, no sala ida uza ba armajen no eskritóriu inklui sala de aula, labarik sira eskola iha sorin ami uza sorin, tanba ami menus aula ba estudante sira-nia prosesu aprendijazen, tanba ne’e aula ida primeiru ano no segundu ano hamutuk, treseiru ano quarto ano, nune’e mós quinto ano no sexto ano hamutuk.” Dehan Koordenadór EBF Tata-Mailau Domingos Soares.
Nia dehan tenki tau estudante hamutuk tanba estudante sira eskola dader hotu no totál estudante iha eskola refere hamutuk 189 estudante.
“Kompostu husi estudante feto 112 no mane 77, enkuantu professor sira ne’ebé hanorin estudante sira hamutuk na’in 7, aleinde menus aula ba estudante sira atu halo prosesu aprendijazen, ami mós laiha bee moos atu uza ba iha Nesesidade sanitária no uza ba tein merenda eskolar.” Nia haktuir
Tanba ne’e iha loron Sábadu Estudante ho profesór sira obrigatóriu tenki uza masa 5 litru hodi ba kuru bee lori mai ense iha tanke bee eskola nian hodi aguenta ba nesesidade semana ida nian.
Iha biban ne’e Xefe Aldeia Alfredo Maia Pires haktuir, Autoridade lokál iha aldeia Leobasa servisu hamutuk ho Profesór sira halo ona proposta ba iha Ministériu Edukasaun maibé seidauk iha resposta.
“Durante ne’e Xefe aldeia servisu hamutuk ho professor sira nomos inan aman husi estudante sira hodi haree ba prekupasaun ne’ebé eskola ne’e hasoru tanba ne’e ami halo ona proposta ba iha parte edukasaun maibé to’o agora seidauk iha resposta husi sira parte relevante, entaun pasensia profesór sira tenki tau hamutuk estudante klase rua iha sala ida.” Nia haktuir
Nia afirma katak bainhira estudante sira klase 2 tau hamutuk iha sala de aula ida ne’e la di’ak tanba sira aprende matéria la hanesan. Enkuantu iha eskola EBF nú. 238 Tata-Mailau ne’e aldeia 4 mak asesu iha eskola refere.
“Aldeia haat hanesan Leu-bassa, Abasai, Hatulia Lelo no Le’aba Kraik, tanba ne’e nu’udar autoridade ne’ebé hola parte iha aldeia Leobasa hakarak rekomenda ba governante liuliu Ministériu Edukasaun atu bele aumenta tan sala de aula, hodi estudante sira bele uza, tanba ita hatene katak estudante sira ne’e mak futuru nasaun nian.” Nia informa
Tuir observasaun Jornalista iha terrenu nota katak kondisaun eskola di’ak, maibé menus sala de aula difikulta ba prosesu aprendijazen estudante sira no laiha eskritóriu ba profesór sira atu uza ba halo servisu.
Entretantu informasaun ne’e Jornalista hetan liuhusi atividade Media Tour tanba Asosiasaun Jornalista Timor-Leste (AJTL) servisu hamutuk ho Oxfam iha Timor Leste ne’ebé hetan apoiu fundus husi Oxfam Hong Kong.
Reportajen : Estefania
Foto : Estefania