Dili, 02 Dezembru 2024 (Média Democracia) – Fundasaun Hadomi Timor (FHT) hamutuk ho Tic Timor realiza diskusaun kona-ba importánsia, lei krimi sibernétiku, protesaun dadus, privasidade, no komérsiu online. atividade ne’e realiza iha salaun Alfela Villa-Verde Dili
Tuir Diretór Ezekutivu Hadomi Timor Abarao Monteiro hateten, liuhusi diskusaun ida ne’e oinsá bele konverse ba nai ulun sira fó importánsia ba lei krimi sibernétiku no protesaun dadus, tanba iha nasaun sira seluk ema ko’alia dadaun ona lei ne’ebé avansadu liután, lei sira ne’ebé bele regula kona-ba atividade ba iha Arhficial Intelligence (AI) no Timor-Leste (TL) sei nafatin aumenta lei krimi sibernétiku protesaun dadus.
“Lei krimi sibernétiku no protesaun dadus ida ne’e automatikamente tenke iha ona maibé Timor-Leste, ita seidauk fó importánsia ba lei ida ne’e, ita-nia líder sira seidauk fó importánsia ba lei krimi sibernétiku mesmu sira mós hatene katak iha timor iha Violénsia lubuk ida ba iha utilizasaun teknolojia ninian, iha mós vitima barak ona ba iha utiliza teknolojia nian, maibé ita-nia nai-ulun sira seidauk hanoin lei ida ne’e.” Dehan Diretór Ezekutivu Abarao Monteiro
Nia hatutan iha Diskusaun ida ne’e bele fó importánsia ba lei krimi sibernétiku no protesaun dadus, atu Governu bele aselera lalais konsellu Ministériu aprova lei ida ne’e no lori bá Parlamentu atu nune’e bele hahú funsiona lei krimi sibernétiku ne’e depois tinan ida rua mai bele ajusta ona lei refere
“Fulan hira liubá ami enkontru hamutuk ho Polísia Sientífika I Investigasaun Kriminal (PSIK) no Providor Diretos Humanus i Justisa (PDHJ) kona-ba keiza lubuk ida ne’ebé sira simu liga bá asuntu Teknolojia no dijital nian. Iha ami nia observasaun lubuk ida maka ema barak maka sai vitima no funsionariu lubuk ida maka hato’o sira-nia preokupasaun bá ami.” Haktuir Diretór FHT
Diretor salienta liután, haree ba observasaun ne’e hahu ona ameasa entaun hakarak ka lakoi ezizi ba Governu tenke kria ona lei krimi sibernétiku no protesaun dadus, nune’e bele haree problema ne’ebe akontese iha online.
“Iha diskusaun ne’e ami hakarak hetan informasaun husi ita-nia sosiedade sira katak, saida maka durante ne’e sira sente no observa, sira-nia ideia ne’e tau hamutuk nune’e garantia katak lei krimi sibernétiku ne’e importante duni no kaer dadus ne’e mós hodi bele halo advokasia ba ita-nia nivel altu sira li-liu Ministériu Justisa (MJ), Tecnologias de la información Y la Comunicatión (TIC) no instituisaun ne’ebé relevante ba iha dezenvolvimentu teknolojia sira nian ne’e atu bele asegura lalais lei krimi sibernétiku.” Diretor ne’e salienta
Iha fatin hanesan Xefe Departamentu Diresaun Nasionál Infranstrutura Komunikasaun (DNIK) Paulo da Costa informa, lei krimi sibernétiku ne’e importante tebes tanba ho lei ida ne’e bele regula atividade ne’ebé liga ho online nian, tanba haree tempu agora iha mundu avansadu ho teknolojia
“Lei krimi sibernétiku ida ne’e importante ba nasaun Timor-leste (TL), tanba ho lei ne’e mak ita bele regula atividade ne’ebé ligadu ho online sira. Governu nia prioridade atu tau importánsia ba lei ida ne’e, nune’e bele implementa iha terrenu.” Dehan Paulo da Costa.
Esplika klean liután katak relasiona ho Diskusaun ne’e partisipa mós Tecnologias de la información Y la Comunicatión (TIC), Prokurador Jerál da Repúblika(PJR), Diresaun Nasionál Infranstrutura Komunikasaun (DNIK), Polísia Sientífika I Investigasaun Kriminal (PSIK) nomos estudante husi Instituto Siénsia da Saúde (ICS)
Reportajen : Nelfiano
Foto : Nelfiano