Dili, 04 Dezembru 2024 (Média Democracia) – Sekretariadu Estadu Komunikasaun Sosial (SEKOMS) liuhusi Konsellu Imprensa hamutuk ho Unicef Timor-Leste realiza atividade kona-ba orientasaun ba media sira relasiona ho Mudansa Klimatika no Étika Reportajen ba Labarik no Feto no Papel Partisipasaun Labarik iha Media, atividade ne’e realiza iha salaun JL-villa Fatuhada, Tersa semana ne’e
Presidente Konsellu Impremnsa Otelio Ote, liuhusi diskursu hateten, iha tinan inisiu 2004 isu kona-ba direitu labarik ba konsentrasaun Unicef durante tinan rua-nulu nia laran to’o mai ona iha 2024 liuliu ba radiu komunidade ba ativu teb-tebes atu ezamina informasaun kona-ba direitu labarik, tanba sempre koopera hamutuk ho UNICEF nu’udar parseiru ida ne’ebé sustentavel.
Nia hatutan koalia kona ba mudansa klimátika ne’e liga ba labarik, labarik sira sai vitima ne’e koalia kona-ba direitu ba protesaun, ba iha Media importansia mak oinsa atu hakarak konteudu kobertura kona-ba labarik ho nia direitu nomos labarik feto sira, kuñese didi’ak oinsa halo reportajen kona-ba labarik.
“Ha’u hanoin média barak mak iha ne’e paratisipa ona formasaun husi UNICEF etika kona-ba kobertura labarik Radiu komunidade sira rasik programa kona-ba labarik nia lian inklui mós RTTL iha ona progarama ida ne’e ha’u hanoin laiha duvida, maibé jornal sira no TV streaming sira ne’ebé foin mosu karik sira presija atu banati tuir tanba isu labarik dalaruma mós sai husi konsentrasaun iha kobertura.” Presidente Konsellu Impremnsa Otelio Ote
Nia salient direitu ba labarik dalaruma jornalista la ukupa saida los mak direitu báziku ba labarik nian, direitu haat ne’ebé ita kuñese, tanba ne’e mak haree konsentrasaun planu kobertura atu sai konteudu ne’ebé importante atu sai notisia sira ba plataforma oi-oin ladun atensaun dalaruma labarik ida sofre ona akontesementu ruma.
“Ha’u agradese tebes UNICEF tanba asina Memorandu ho SEKOMS atu kaer asuntu kona ba labarik, KI nu’udar parseiru estratejiku ho SEKOMS atu akompaña kona ba oinsa servisu hamutuk hodi eleva kapasidade teknika liliu kona ba kobertura atu eleva kapasidade profissional no intelektual no mós KI tau matan ba ida ne’e atu akompaña produtu jornalistiku ne’ebé publika ona iha plataforma ida idak nian.” Dehan nia
Nia ikresenta Ita hatene iha departamentu ida ba monitorin kona-ba analiza konteudu media sempre akompaña ita boot sira nia produsaun no media balu hetan ona xamada ba atensaun kona ba utilizasaun termu sira ne’ebé lamerese fó sai iha notisia sira kona-ba labarik.
“Ha’u hanoin formasaun ida ne’e importante tebes kona-ba materia mudansa klimátika reportajem ba labarik no feto hanesan baibain Radiu komunidade sira besik los ho asuntu ida ne’e, maibé diretor sira tenki servi ba staf sira iha terenu, tanba ha’u komprende ita boot sira Laos servisu permanente maibé balu bele servisu too fulan tolu too neen depois bele muda ona, no materia sira ne’e presija investe didi’ak ba staf sira ne’ebé foin hamutuk ho imi.” Nia haktuir
Prezidente KI informa jornal, televisaun no radiu privadi sira seluk, Laos radiu komunidade ita boot sira mos tenki tau atensaun ba materia labarik no feto, tanba isu labarik ne’e isu global tanba ne’e mak UNICEF sempre konsistensi iha Timor-Leste sempre dezenvolve instituisaun no parseria hotu hotu atu lori isu labarik no feto sai kultura ba iha Media no mos iha ema hotu hotu nia moris no inklui ita nia nasaun.
“Agradese ba UNICEF tanba fasilita programa ida ne’e koopera ho SEKOMS no hein katak iha 2025 se bele formasaun ba asuntu Direitu mudansa klimatika reportajen ba labarik no feto halo programa ne’e sai sustentavel no bele halo programa ne’e ba fulan tolu ka haat hanesan ne’e. “ Dehan prezidente KI
Iha sorin seluk Reprezentante Pais UNICEF Timor-Leste, Patrisia Digiovanni, iha diskursu katak privilejiu tebes ba Sekretariadu Estadu Komunikasaun Sosial (SEKOMS), ne’ebé lidera worshop Nasional Promosaun no Dezenvolvimentu Komunikasaun Sosial Lokal, hodi kolabora ho UNICEF hodi organiza workshop loron rua ne’e, kona-ba Mudansa Klimatika, Étika Reportajem kona-ba Labarik no Feto no papel Partisipasaun Labarik iha Media
“Ami rekoñese tebes katak média sira iha papel importante atu halo reportajem kona-ba injustisa hasoru labarik-sira, hasa’e konsiénsia públiku kona-ba kestaun sira ne’ebé afeta labarik-sira, no enkoraja esforsu sériu atu alkansa mudansa pozitivu reál iha labarik sira-nia moris. Media mós hetan kréditu hodi promove oportunidade ba labarik sira-nia lian atu ema seluk rona no tau-matan ho sériu ba labarik sira-nia lian.” Haktuir Reprezentante Pais UNICEF Timor-Leste, Patrisia Digiovanni
Nia hatutan kona-ba razaun hirak ne’e mak UNICEF kontinua servisu hamutuk ho media hodi hatutan ami-nia apoiu balun ba Governu Timor-Leste, inklui ami-nia kontribuisaun ba emerjénsia sira hanesan COVID-19 no inundasaun.
“UNICEF mós apresia tebes servisu estasaun rádiu komunitária sira-nian, ne’ebé serbisu maka’as atu sustenta programa rádiu “Labarik Nia Lian”, ne’ebé produz husi labarik-sira no ba labarik sira, atu hatutan sira-nia lian no advokasia ba direitu labarik. Ha’u fiar katak ita-boot sira hotu rona ona kona-ba oinsá tendénsia globál mudansa klimátika ne’e afeta modelu klimátiku sira iha mundu no ambiente, ne’ebé ita simu husi ita-nia bei’ala sira.”Dehan Reprezentante Pais UNICEF Timor-Leste
Nia salient iha mundu tomak, kuaze labarik hotu-hotu ohin loron hetan impaktu husi perigu klimatiku no ambiental hanesan loron manas, siklone, poluisaun aereu, inundasaun, no falta bee. iha mos aumentu signifikativu iha akontesimentu klimatiku extremu sira ne’ebé relasiona ho klima iha rejiaun Azia Leste no Pasifiku, inklui aumentu alarma dala 11 kona-ba inundasaun, hanesan inundasaun ne’ebé akontesementu foin lalais ne’e iha Vietname, Myanmar, Laos no Tailandia.
“Indise vulnerabilidade ND-GAIN nian, medida global ida kona-ba vulnerabilidade nasaun ida-ne’e nian ba perturbasaun klimätiku, Timor-Leste okupa númeru 111 husi nasaun 181, ne’ebé signifika katak ita-nia vulnerabilidade ba epidemiku klimatiku aas, maibé ita-nia protidaun atu responde sei kiik tebes.” Dehan nia
Nia informa iha Timor-Leste, inundasaun maka’as iha fulan Abril tinan 2021 liuba, hamosu todan adisional ba familia sira ne’ebé marjinalizadu no dezenvolve ona progresu maka’as hodi hadi’a moris. Ema barak lakon sira-nia moris iha akontesimentu sira ne’ebé relasiona ho klima no labarik sira nia direitu mós la-dun hetan salvasaun.
“Kada inundasaun foun, rai-maran ka rai-manas, labarik sira nia asesu ba bee-moos, edukasaun, kuidadu saúde, ai-han no uma mahon hetan estragu no komunidade sira ne’ebé marjinalizadu, sai krize boot liután. Maske sira-nia vulnerabilidade úniku, labarik sira hetan ignorasaun ka barak mak la hetan atensaun husi resposta ba mudansa klimátika, inklui liu busi maneira que media sira halo reportajem kona-ba iventu sira relasiona ho klima.” Nia klarefika
Entertantu sorumutu loron rua ne’e nu’udar oportunidade importante ida ba ita atu hetan kompriensaun kle’an liután kona-ba siensia, impaktu no politika kona-ba mudansa klimátika, aprende oinsá atu identifika no halakon informasaun ne’ebé la loos kona-ba klima, dezenvolve abilidade atu halo dezenvolve estória bazela ba dadus no esplora dalan atu inkorpora lian no perspetiva oioin, inklui husi labarik no foin-sa’e sira
Esplika liután katak UNICEF iha kompromisu atu kontinua kolaborasaun ho parseiru média sira hodi fahe informasaun, promove direitu labarik, no fő kbiit ba komunidade sira liuhosi ita-boot sira-nia plataforma sira, UNICEF mós apresia apoiu husi parseiru dezenvolvimentu oin-oin, hanesan Governu Xina no KOICA, ne’ebé apoia intervensaun kritiku sira hodi hamenus impaktu husi mudansa klimátika ba labarik sira-nia moris. UNICEF hein katak sei iha kolaborasaun ne’ebé forte no besik liutan ho média sira.
Reportajen : Nelfiano
Foto : Nelfiano