Dili, 04 Dezembro 2024 ( Média Democracia) – Sekretariadu Estadu Komunikasaun sosial SECOMS kria formasaun hakerek imprensa ba média iha liña ministerial sira hamutuk tolu-nulu resin-hitu (37) durante loron rua, formasaun ne’e realiza iha salaun MNEC
Iha entrevista ho Diretor Geral Sekretariadu Estadu Komunikasaun sosial SECOMS Florindo da Costa hateten, formasaun ida ne’e SECOMS halo atu fó kapasitasaun ba media officer sira iha liña ministerial, tanba haree katak dalabarak media officer sira hakerek seidauk tuir padraun jornalista nian, tanba sira hanesan funsionariu publiku de’it, entaun balun seidauk iha koñesementu ba hakerek imprensa nian
“Ita bele akompana katak publikasaun sira kona-ba atividade ministeriu sira nian ne’e importante tebes atu fó hanoin ba publiku katak saida mak ita-nia ministeriu sira hala’o, tan ne’e ministeriu sira nafatin esforsu liu-liu media officer sira atu halo publikasaun ba iha atividade sira ne’ebé ministeriu sira hala’o, nune’e sosiedade labele hanoin katak ministeriu ne’e la hala’o nia servisu, entaun husi ne’e mak SECOMS hakarak kria formasaun hakerek impresa ne’e hodi fasilita kapasitasaun ba iha media officer iha liña ministerial sira, nune’e bele publika hela de’it atividade sira ne’ebé ministeriu iha no hakerek tuir padraun jornalista nian.” Dehan Diretor Geral Sekretariadu Estadu Komunikasaun sosial SECOMS Florindo da Costa
Nia hatutan formasaun ida ne’e nafatin kontinua hodi fasilita nafatin media officer sira atu hadia sira-nia hakerek bainhira halo publikasaun ba atividade ministeriu sira nian nomos formasaun ne’e la’os ba media officer de’it maibé ba mós jornalista sira.
“SECOMS iha Diresaun ida ne’ebé prepara formadores sira hodu fahe formasaun ba iha fatin ne’ebé de’it mak presiza formasaun. Formasaun loron rua ne’e iha sesaun dalarua primeiru nian mak kona-ba hakerek imprensa no loron daruak nia mak kona-ba videografia nomos Fotografia nian, husi atividade loron rua ne’e espera media officer sira bele aprende diak liu hodi implementa iha sira nia servisu fatin.” Hatutan Diretor Geral Sekretariadu Estadu Komunikasaun sosial SECOMS
Iha fatin seluk hatutan husi Formanda Veronica de Oliveira Ximenes media officer husi Sekretariadu ba eletrisidade água no saenamentu hateten, atividade ohin ne’e importante tebes, tanba hanesan media officer oinsa atu kapasita no hakerek imprensa ida ne’ebé diak iha liña ministerial ida-idak nian
“Hanesan Formanda sente formasaun ida ne’e importante tebes no oinsa atu bele fasilita ami hakerek imprensa ida ne’ebé diak no tuir padraun jornalista nian, tanba hatene katak media officer balun antes ne’e jornalista no balun la’os jornalista entaun husi formasaun hanesan ne’e bele fasilita no kapasita diak liután ami iha servisu fatin.” Lia-hirak ne’e hato’o husi Formanda Veronica de Oliveira Ximenes media officer Sekretariadu ba eletrisidade água no saenamentu
Nia hatutan esperansa husi atividade loron rua ne’e bele aprende diak liután, tanba formasaun ne’e sei iha sesaun rua loron ohin mak kona-ba hakerek imprensa no loron-daruak nia mak kona-ba videografia nomos Fotografia nian.
Reportajen ; Domingas
Foto : Domingas