Dili, 10 Abril 2025 (MédiaDemocracia) – Asosiasaun Arbitrajen Futebol Timor-Leste (AAF-TL) Realiza Komunikadu Imprensa liga ho dezentendimentu entre Komisaun Organizadora Tasa Avo Nana 2025 ne’ebé daudaun sai polimika iha publiku, Komunikadu imprensa ne’e realiza iha salaun Xanana Sport Center.
Prezidente Asosiasaun Arbitrajen Futebol Timor-Leste (AAF-TL) Nivio da Costa hateten, iha Komunikadu Imprensa Konsidera nu’udar membru ba Federasaun Futebol Timor-Leste (FFTL) ne’ebé goza tuir nia estatutu no rejimentu interna rasik.
“Asosiasaun Arbitrajen Futebol Timor-Leste (AAF-TL) nu’udar organizasaun ida ne’ebé sai mahan ba ekipa arbitrajen hotu iha tentoriu Timor laran tomak.” Dehan Prezidente Asosiasaun Arbitrajen Futebol Timor-Leste Nivio da Costa
Nia hatutan involvimentu ekipa arbitrajen iha kompetisaun ofisiäl sira iha teritoriu rai laran, hahu husi nivel suku, Postu-Administrativu, Munisipiu, Nasionál inklui Liga Nasional sira ne’ebé realiza, kabe ba kompetensia AAF-TL
“Asosiasaun Arbitrajen Futebol Timor-Leste (AAF-TL) hakotu akordu servisu hamutuk ho Komisaun Organizadora ba Kompetisaun Tasa Rotativa Avo Nana Nasional 2025.” Dehan nia
Nia haktuir Komisaun Organizadora Tasa Avo Nana tinan 2025 nunka konsidera katak Asosiasaun Arbitrajen Futebol Timor-Leste (AAFTL) mak nu’udar organizasaun ida ne’ebé iha kompetensia tomak hodi organiza, kapasita no valida arbitrajen hodi lidera kompetisaun ofisial sira ne’ebé realiza iha Timor-Leste. Situasaun ne’e akontese husi kedas tinan kotuk 2024.
“Ho attitude ne’ebé sita iha leten, lori Prezidente Komisaun Organizadora ho inisiativa halo aprosimasaun individu ba kada arbitu sira hodi bele asegura abertura Tasa Avo Nana iha tinan 2024 no 2025 ne’ebé tuir lolos Komisaun Organizadora tenke iha akordu servisu hamutuk ho AAFTL, nune’e bele difini direitu no dever husi parte rua.” Nia haktuir
Nia Afirma AAFTL la iha koñesimentu kona-ba enkontru tekniku sira ne’ebé tuir lolos nu’udar momentu importante ida ba AAFTL hodi halo aprezentasaun ba mudansa regulamentu jogu sira, infelismente situasaun ne’e la akontese.
“Akordu servisu hamutuk foin bele asina hafoin Abertura Tasa Avo Nana iha Gleno Ermera, ne’e hatudu Komisaun Organizadora la tau importansia involvimentu ekipa arbitrajen iha kompetisaun Tasa Avo Nana 2025.” Nia hateten
Nia relata akordu ne’e asina, ekipa arbitrajen hala’o nia kna’ar ho responsabilidade no kontinua husu parte Komisaun Organizadora atu asegura kompetisaun liuhusi pedidu apoiu PNTL, nune’e kompetisaun ne’e bele susesu, infelismente proposta ne’e ladun tau atensaun husi Komisaun Organizadora.
“AAFTL konsidera katak Prezidente Komisaun Organizadora iha konflitu interes iha kompeisaun sira ne’ebé iha ligasaun ho Klube FC LALEIA ne’ebé iha ligasaun emosional direta ho Prezidente Komisaun Organizadora.” Nia afirma
Nia dehan AAFTL konsidera katak laiha separasaun poder husi Prezidente Komisaun Organizadora Tasa Avo Nana, tanba nu’udar Prezidente Komisaun Organizadora bele halo funsaun hanesan dirijente ba Klube FC Laleia no ate bele hola papel nu’udar Asistant refere iha loron 6 Abril 2025.
Esplika liután Asosiasaun Arbitrajen Futebol Timor-Leste durante ne’e kolaborasaun di’ak ho FFTL no hetan apoiu masimu husi Prezidente Federasaun Futebol Timor-Leste iha atividade no kna’ar hotu-hotu ne’ebé hala’o. Ami iha kompromisu atu servisu nafatin tuir regulamentu no regra síra ne’ebé hatuur ona husi FFTL, hodi nune’e bele kria futebol ida ne’ebé ho kualidade, justu no transparente liu iha nasaun Timor-Leste.
Reportajen : Nelfiano
Foto : Nelfiano
Editor : Jp.Costa