Dili, 10 Dezembru 2024 (Média Democracia) – Asosiasaun Jornalista Timor-Leste (AJTL), servisu hamutuk ho Asia Foundation realiza treinamentu ba jornalista sira tantu média Imprimi, Online no Audio visuál, hodi hasa’e no kapasita koñesimentu ba iha área kobertura Direitu Umanu nian.
Antes ne’e AJTL fó ona formasaun etapa dahuluk ba jornalista Radiu Komunidade sira, iha etapa daruak fó ba jornalista média online sira hamutuk 23 ne’ebé kompostu husi feto 13 no mane 10 iha loron 29-30 fulan Novembru 2024 liubá, nune’e iha etapa datoluk fasilita ba jornalista feto sira iha loron 6-7 fulan Dezembru AJTL kontinua fasilita formasaun etapa daruak ba jornalista feto hamutuk 25, ne’ebé termina ona iha loron Sábadu (07/12) iha Salaun Fokupers Farol, Dili.
Prezidente Asosiasaun Jornalista Timor Leste (AJTL), Zevonia Viera hateten AJTL hetan fundu husi Asia Foundation hodi fó formasaun kona-ba direitu Umanu hodi kapasita jornalista sira bainhira kobertura iha terrenu.
“Oinsa ita-boot sira iha koñesimentu kona-ba halo kobertura ba feto sira ne’ebé hetan abuzu seksuál, kona-ba liberdade espresaun imprensa, lei sira ne’ebé liga ho jornalista sira nia direitu, kona-ba direitu dijital, oinsa halo kobertura jornalismu inkluzivu, kona-ba defisiénsia, relijiaun nian, oinsa mak sira atu hatudu istória sira ne’ebé la sees husi ema-nia direitu.” Dehan prezidente AJTL Zevónia ba jornalista sira iha loron sesta-feira (06/12)
Nia dehan AJTL enkoraja membru sira atu kapasita kualidade koñesimentu kona-ba prespetiva direitu umanu tanba ne’e nu’udar direitu fundamentál ema-nian.
“Ema hotu presiza komprende oinsá atu defende, halo protesaun no prevene ba asuntu sira ne’e no oinsá hasa’e kobertura sira liga ho asuntu sensitivu sira, entaun AJTL enkoraja partisipante sira depois de formasaun ida ne’e espera katak liuhusi imi nia produsaun notísia, liuhusi audiu vizual radiu, online no jornal sira ne’e imi bele hakerek artigu no istória sira ne’ebé importante loos ba ema sira atu lee.” Nia dehan
Liliu ba estadu, Governu, Sosiedase Sivil no sosiedade hotu atu komprende katak asuntu importante ne’ebé presiza mak entidade hotu tau matan liga ho problema violénsia doméstika, abuzu seksuál ka ssuntu sensitivu sira ne’ebé hamosu injustisa ka violasaun hasoru ema.
Nia esperansa, liuhusi treinamentu refere jornalista feto sira iha ona kapasidade hodi hakerek notísia ka istória di’ak.
“Liuhusi treinamentu ne’e liliu jornalista feto sira iha ona kapasidade hodi hakerek di’ak, bainhira hakerek di’ak ho kualidade ne’e públiku orgullu ho imi no istória ne’ebé imi prodúz, espera katak treinamentu ne’e inspira imi atu hasa’e imi-nia matenek, sai jornalista ida ne’ebé kualidade iha Timor.” Nia afirma
Nia informa katak iha tinan ne’e nia laran jornalista balu komesa sai vítima ba sira-nia papél bainhira ba kobertura iha fatin públiku.
“Ita haree katak jornalista feto nain 2 ne’ebé hetan intimidasaun no ameasa husi ukun-na’in sira no polísia konsege detein jornalista sira, signifika ita-nia liberdade imprensa ne’e monu, ita iha globál rengking 10 mas agora tun ba 20, ida ne’e ameasa ida ba ita, tanba ne’e liuhusi treinamentu ida ne’e haree katak oinsa imi komprende jornalista sira-nia direitu, oinsa ita hotu luta hamutuk ba iha ita-nia liberdade imprensa no espresaun ba iha kobertura sira.” Nia informa
Embora kona-ba asuntu importante sira, Jornalista bele ko’alia ho nia prespetiva direitu umanu, bainhira haree jornalista sira sai vítima iha kobertura ba notísia refere katak liberdade, tanba estadu no konstituisaun RDTL garante hela liberdade imprensa, bainhira jornalista sai vítima tenke tau interese no tau prespetiva direitu umanu iha ne’ebá.
Tanba ne’e AJTL sente triste oituan ho situasaun barak ne’ebé jornalista komesa hetan Intimidasaun iha plataforma dijital sira.
Iha biban ne’e mós partisipante Joanina Casimiro agradese ba Asia Foundation tanba servisu hamutuk ho AJTL hodi realiza treinamentu kona-ba direitu umanu, nune’e nu’udar jornalista bele hatene kona-ba direitu kobertura.
“Agradese tanba bele partisipa iha treinamentu kona-ba Direitu Umanu no Jornalizmu, ba ami jornalista sira, liuhusi formasaun ne’e ita bele hatene kona-ba direitu kobertura jornalista nian iha terenu liga ho asumtu Direitu uma, nune’e ita bele hakerek notísia no prodúz istória sira ho kualidade liuliu atu sensivel ba iha direitu ema nian.” Dehan Joanina iha Salaun Fokupers sabadu ne’e (07/12)
Tanba ita hatene katak estadu RDTL adopta sistema Democracia katak sidadaun hotu-hotu livre atu goja sira nia liberdade sein hetan presaun husi ema seluk, liuliu liga ba iha Jornalizmu nian katak Liberdade Imprensa no liberdade espresaun nian ne’ebé konsagra iha konstituisaun ne’e rasik.
Nia informa katak liuhusi treinamentu refere bele loke ona hanoin uza direitu nu’udar jornalista hodi bele foti informasaun sira ho krédibel no justu.
“Ita hatene katak jornalista nia servisu la halai ses husi kodigu etika jornalizmu nian, tanba ne’e liga ho asuntu direitu umanu ami bele foti imformasaun no halo kobertura ba iha sosiedade no governu sein julga fontes ka sosiedade relevante sira, liliu asuntu sira liga ho violasaun direitu ema nian.” Nia informa
Iha treinamentu refere Jornalista feto sira mós aprende kona-ba matéria sira hanesan asédiu seksuál, oinsa atu halo auto defeza ba sira-nia an bainhira halo kobertura iha terenu, tanba jornalista feto sira sai risku ba iha servisu jornalista nian bainhira halo kobertura, aleinde ne’e partisipante sira mós simu matéria sira kona-ba direitu Dijital liga ho servisu jornalista nian.
Reportajen : Estefania
Foto : Estefania