Dili, 11 Abril 2025 (Média Democracia) – Dioseze Dili liuhusi Arsebispu Metropolitana, Dom Virgílio Cardeal do Carmo da Silva selebra misa krismál hamutuk ho Amu Lulik sira hodi halo renovasaun promesa saserdotál no halo bensaun ba mina Santu sira.
Dom Virgílio Cardeál do Carmo da Silva hateten, razaun misa krismál ba Amu Lulik sira iha kinta feira antes tama semana santa ne’e tanba Padre barak mak iha fatin dook.
“Razaun pastorál ne’e katak amu lulik barak iha dook ne’e duni sé misa iha kinta-feira dadér sira labele to’o fila-fali ba sira-nia parókia hodi selebra misa kinta-feira santa ninia, tan ne’e mak sai tiha ona tradisaun ida iha Dioseze Dili nian tinan barak ona misa sempre halo iha kinta-feira, antes tama kinta-feira santa.” Dehan Bispo Dom Virgílio ba Jornalista sira iha Igreja Sé Katedral Dili Kinta ne’e
Tanba ne’e Kinta-feira ohin loron ne’e sai hanesan tradisaun ona iha Dioseze Dili nian, ne’ebé Amu Bispo hamutuk ho Amu Lulik sira konsagra ba Mina Krisma (Óleo Crisma) nian, nune’e mós fó Benze Óleo ba Ema Moras nomos Óleo Katekumu ninian.
“Depois iha misa ne’e nia laran mós sai momentu ida Amu Lulik sira hafoun fila-fali sira-nia promesa ne’ebé sira ida-idak halo iha loron ordenasaun lulik, tinan-tinan iha loron ida ne’e mak amu lulik sira halibur hamutuk hodi Bispu renova sira-nia kompromísu ida ne’e atu fiél nafatin ba sira-nia vokasaun nu’udár amu Lulik.” Dehan Cardeal Dom Virgílio
Tanba ne’e mak razaun ba ohin Amu Lulik sira halibur hamutuk, konsagradus, konsagradas, katekista, Zela, Seminarista hamutuk mós ho leigos, sarani lubuk ida ne’ebé ohin partisipa iha selebrasaun ohin nian.
Iha biban ne’e Arsebispo Metropolitana Dili, Dom Virgílio Cardeal do Carmo da Silva, haktuir katak, Domingo mai ita tama ba Domingu Ramus tanba ne’e hakarak konvida sarani hotu atu prepara-an hodi selebra semana Santa ne’e ho di’ak.
“Semana Santa mak semana ida ne’ebé boot liu hotu, semana ida ne’ebe importante liu hotu mai ita sarani sira, tanba sa semana Santa ita lao hamutuk Jesus nia terus Jesus nia mate no Jesus nia moris hias, ida ne’e mak festa ida boot liu hotu ba ita sarani sira.” hateten Arsebispu Metropolitana Dili, Dom Virgilio Cardeal do Carmo da Silva, SDB iha Katedral Dili, Kinta ne’e (10/04/2025).
Tanba iha kuaresma durante loron 40 nia laran sarani sira halo peniténsia, orasaun, jezun no karidade mak dalan sira hodi hatudu meius ba ema hotu no sarani ida-idak atu fila-fali iha loron 40 ne’e.
“Sarani idak-idak atu fila-fali iha loron 40 ne’e, atu ema hatene hodi halo di’ak, reza, hatene kontrola-aan ho hahalok ne’ebé moos, atu ema hotu fó biban hodi selebra didi’ak mistériu boot nain Jesus Kristu nian.” Bispu haktuir
Tanba hanesan Bibi Atan Uma Kreda, fó hanoin nafatin ba sarani sira katak, maske ema hotu iha rai ne’e iha idak-idak nia viagen, terus, ksolok, maibé ida ne’ebé esperansa boot liubá ema kriatura mak Jesus nia moris hias.
“Tanba ne’e Festa Santa Paskua ne’e sai momentu ida importante liubá ita, hakarak konvida sarani hotu kiik, boot, foinsae katuas ferik, ema idak-idak hatene ita-nia obrigasaun, nune’e sira ne’ebé seidauk konfesa hakbesik ba Amu Lulik sira, ba Parókia sira prepara imi-nia aan atu selebrasaun Paskua ida ne’e sai duni momentu dala ida tan ba ita idak-idak bele renova ita-aan.” Nia dehan
Atu nune’e bainhira selebra paskua sai duni momentu furak ba ema hotu, Jesus nia moris hias halo ema mós hafoun dala ida tan, fuan foun, moris foun, hahalok foun, komportamentu foun nomos hanoin foun hodi serví di’ak liután família, instituisaun no rain.
Reportajen : Estefania
Foto : Estefania
Editor : Jp.Costa