Dili, 18 Abril 2025 (Média Democracia) – Arkidioseze Metropolitana Dili, Dom Virgílio Cardeal do Carmo da Silva, halo konferénsia imprensa relasiona ho selebrasaun paskua tinan 2025 nian.
Arsebispu Metropolitana Dili, Dom Virgílio Cardeal do Carmo da Silva hato’o ksolok Paskua ba sarani hotu iha Teritóriu tomak liuhusi ksolok moris hias Jesus nian ne’e konvida Timor-oan hotu no sarani ida-idak atu foti ulun no loke matan.
“Konvida ita Timor-oan sira hotu-hotu, sarani ida-idak atu foti ulun no loke ita matan hatene haree buat ne’ebé nia folin boot, a’as, furak no diak liu iha moris, ida ne’e mak ksolok ida mai husi Mate no Moris Hias Nian.” Dehan Dom Virgílio Cardeál do Carmo da Silva ba jornalista sira iha Câmara Eclesiastica Lecidere, Dili Kinta ne’e
Arsebispo Metropolitana Dili dehan, liu espíritu Jesus moris hias nian hakarak hato’o Boas Festa Paskoa tinan 2025 ba sarani hotu-hotu.
“Boas Festas Paskoa 2025 ba sarani hotu-hotu, liliu ba Timor-oan sira hotu la’ós de’it iha rai laran maibé iha mós sira ne’ebé tanba servisu no estudu namkari lemorai iha mundu.” Dehan Bispo
Lidér Katólika Timor-Leste hateten, Haksolok iha Jesus Moris Hias tanba nia (Jesus) Hadomi Ó, “tan sa o buka iha mate sira leet, ema ne’ebé moris hela? Nune’e o mós buka atu hadomi nafatin, hamriik metin nafatin no laran metin nafatin ba Maromak.
Antes halo konferénsia imprensa Dom Virgílio Cardeal do Carmo da Silva haklake tuir evangelhu hodi dehan, “tan sa imi buka tha mate sira leet, ema ne’ebé moris hela?
“Feto sira ho tauk, hakruk ba rai, wainhira ema sira dehan: “tan sa imi buka iha mate sira leet, ema ne’ebé moris hela? Nia moris hias ona! Imi la hanoin buat ne’ebé nia dehan ba imi bainhira nia sei tha imi leet?.” Hateten Dom Virgílio Cardeal do Carmo da Silva iha konferénsia imprensa
Feto sira ne’e ba buka fali Jesus iha mundo mate sira nian, Jesus la iha ne’ebá. Feto sira ne’e tauk no hakruuk ba rai. Husi rai sira sei la hetan resposta ba buat ne’ebé mai husi leten. Ida ne’e mós pergunta ne’ebé ita halo wainhira ita lakon ema ne’ebé ita hadomi. Hanesan feto sira ne’ebé iha Jesus nia rate, ita mós la iha korajen atu foti ita nia ulun, nune’e ita sei la hetan resposta ida ne’ebé diak.
Ne’eduni laos hakru’uk maibé “Foti Ulun” no hateke ba leten, hateke ba Lalehan. husi leten mak sei mai resposta.
“Tan sa imi buka tiha mate sira leet, ema ne’ebé moris? Nia ema moris, moris iha nia no iha nia iha moris ida ne’ebé la hatene mate. Mate la iha tan kbiit atu sobu moris ne’ebé iha nia, tanba nia iha kbiit ida Eternu no Imortal. Imi la hanoin buat ne’ebé nia dehan ba imi, wainhira nia sei iha imi leet? Los duni feto sira ne’e nia neon nakloke ba Jesus nia lia-menon, “Maromak oan ema sei saran ba ema a’at liman, imi sei hodi nia ba kruz, liu tiha loron tolu nia sei moris Hias.”Dehan Dom Virgílio Cardeal do Carmo da Silva
Feto sira ne’e mós hanoin fali buat ne’ebe nia dehan, “Moris ne’ebé saran tanba Domin, sei la dodok no sei la aat, maibé moris ba nafatin.
Nia mai liuhusi mundu ida mate nian, atu hamamuk mundu ida mate nian ho mundo ida Maromak nian, wainhira nia tama iha mundo mate sira nían, Nia hatama moris ida “Immortal”, katak, mate la iha tan ona kbiit, agora iha deit mak mundo ida Maromak nian.
Mai ita hanoin fali Jesus nia lia fuan, ema ne’e hakarak soi nia moris, sei lakon nia, maibé ema ne’ebé lakon nia moris tanba jesus sei hetan nia. Ema manan saida los hodi manan mundo tomak, maibe lakon nia moris? Ka nia bele troka nia moris ho salda?” (Mt 16,25-26)
Ema ida ne’ebé ita hotu buka no hadomi tebes mak ida ne’ebé iha moris, Nia mak Kristu, Nia mak kauza no razão ba ema sarani ida Nia ksolok, tan ne’e iha loron ha’at-nulu ita hadera-an (jejun no abstenência), halo diak ba maluk (karidade) sira no halo orasaun (harohan) mak dalan ba ita sarani atu hola parte iha festa boot, Jesus nia moris hias mak ita hotu nia esperança,
Maluk doben sira dala ida tan, ksolok ne’ebe los ne’e hetan iha ne’e, ita haksolok laos tanba buat ne’ebé ohin o iha no aban sei naben maibé tanba laran metin iha Maromak, Nia mak ita nia esperança no Esperança la bosok.
Reportajen : Estefania
Foto : Estefania