Dili, 02 Dezembru 2024 (Média Democracia) – Jornalista kompostu husi Mane sanulu (10) no Feto sanulu resin-tolu (13) husi Média online, Imprime Jornal, no Televizaun Hamutuk nain (23) partisipa treinamentu konba-ba Direitus Umanus ne’ebé fasilita husi Asosiasaun Jornalista Timor Lorosa’e (AJTL) no Asia Foundation durante loron rua husi loron 29 to’o 30, iha salaun fokupers Farol, Dili
Iha entrevista ho Prezidente Asosiasaun Jornalsita Timor Lorosa’e (AJTL) Zevonia Vieira hateten, AJTL hala’o kolaborasaun ho Asia Foundation ne’ebé liga ho direitus umanus misaun ho vizaun AJTL nia iha ne’eba klaru katak oinsa promove liberdade imprensa no liberdade espresaun tanba ne’e haree ba iha liberdade imprensa no espresaun ne’e hanesan parte fundamental ida husi AJTL nian haree ba iha prespetiva direitus umanus, tan ne’e AJTL iha hanoin katak jornalista hotu-hotu iha intelektualidade presiza iha hanoin ida ho perspetiva direitus umanus nian iha sira ninia servisu, tanba jornalista rasik mós luta hela ba iha sira nia liberdade imprensa nomos espresaun liuhusi kobertura no opiniaun ne’ebé hato’o liuhusi espasu siviku nomos espasu digital
“Treinamentu ida ne’e sai hanesan prinsipiu ida AJTL hakarak fahe ba ninia membru sira atu hasa’e sira nia koñesementu no komprende di’ak liu kona-ba saida mak direitus umanus no bele komprende mós bainhira ita foti asuntu social balun liga ho feto, labarik, no ema ho difisiensia, liga ho direitus, entaun ita-nia kobertura la sees husi materia hirak ne’ebé ohin jornalista sira aprende husi treinamentu refere no tulun jornalista sira hanoin kritiku komprende lei sira ne’ebé governu sira viola ema sidadaun sira nia direitu, oinsa atu halo protesaun haree ba asuntu sira hanesan ne’e liuliu ba iha kobertura ne’ebé haree ba iha abuzu seksual, husi materia hirak ne’ebé jornalista sira aprende husi treinamentu loron rua ne’e atu sira bele komprende di’ak liután kona-ba ema hotu nia direitus umanus.” Lia hirak ne’e hato’o husi Prezidente AJTL Zevonia Vieira
Nia hatutan AJTL nia prinsipiu klaru katak atu ajuda ninia membru sira hodi hasa’e sira nia kapasidade ka koñesementu kritiku haree liubá iha kobertura nian, nune’e direitus umanus la’o ho di’ak iha nasaun ida ne’e, husi treinamentu ida ne’e bele ajuda mós estadu Timor-Leste atu respeita ema ida-idak nia direitu iha moris, tanba konstituisaun RDTL ne’e garantia iha ne’eba oinsa direitus umanus sai prinsipiu fundamental.
“AJTL kolabora ho Asia Foundation hodi realiza treinamentu ida ne’e, tanba ita hotu hatene katak iha nasaun barak hetan kontrolu makas husi estadu, entaun ema barak lakon sira nia direitus sidadaun, liu-liu ba iha jornalista sira, tanba jornalista barak hetan kaer no hetan oho bainhira hala’o investigasaun hetan ameasa, entaun husi treinamentu ida ne’e ajuda ona ita-nia jornalista sira atu komprende bainhira iha intimidasaun ka preokupasaun kona-ba kobertura ne’e, no oinsa maka ita atu relata, proteje, no prevene situasaun hirak ne’ebé ita hasoru no labele sai vitima ba iha violasaun direitus umanus ne’ebé akontese.” Tenik Prezidente AJTL Zevonia Vieira
Nia salienta formasaun ida jornalista sira partisipa ne’e etapa segundu, etapa primeiru ne’e partisipa maioria husi jornalista sira ne’ebé mai husi Radio komunidade sira de’it no etapa segundu ne’e kompostu husi jornalista sira mai husi Media Online no televizaun nomos sei iha etapa terseiru ne’e sei fó treinamentu ba liu feto sira de’it, tanba atu fahe espasu ba iha jornalista feto sira atu koalia asuntu sensitive sira ne’ebé karik jornalista feto sira hasoru bainhira hala’o kobertura iha terenu no etapa ida ikus ne’e sei fó treinamentu ba iha xefe redasaun kada media nomos ba iha editor sira tanba sira mós iha responsabilidade importante halo editor ka revisaun ba iha notisia sira ne’ebé jornalista sira ba kobertura, ne’e mak treinamentu ne’ebé AJTL halo iha tinan ida ne’e.
“AJTL mós iha planu ba 2025 nian hamutuk ho Asia Foundation sei produs matadalan direitus umanus nian ba jornalista lee, oinsa maka matadalan ne’e bele ajuda ita-boot sira hanesan jornalista iha kobertura ne’ebé sei ba liu iha terenu liuliu haree ba iha asuntu hirak ne’ebé importante hanesan feto, religiaun, LGBT, ema ho difisiensia nomos kona-ba lei sira ne’ebé bele ajuda ita atu komprende bainhira kobertura karik husu konfirmasaun ba governu oinsa ita bele hetan resposta husi sira, ida ne’e hanesan matadalan ikus husi projetu ne’e, nomos ikus husi programa ne’e ita sei hala’o meza redonda ho instituisaun barak hanesan jornalista akademiku, sosiedade sivil, governu atu fó sira-nia perspetiva kona-ba importansia direitus umanus no direitus digital iha Timor-Leste, oinsa jornalista sira luta hodi promove direitus umanus sidadaun sira nian.” Hakotu prezidente AJTL
Hatutan husi Jornalista Media Online One Timor Lurdes Soares Fernandes hateten, treinamentu ida ne’e importante tebes ba iha jornalista sira oinsa atu hatene kona-ba kobertura iha asuntu direitus umanus iha terenu husi treinamentu ida ne’e hanesan AJTL fó oportunidade ida ba jornalista sira atu aprende hodi hasae sira nia koñesementu kritiku liga ho asuntu sira ne’ebé viola ema ida-idak nia direitu inklui mós jornalista sira nian direitu iha nasaun ida ne’e.
“Ha’u hanesan jornalista feto ida sente katak ida ne’e hanesan oportunidade ida ba ha’u atu hasae kapasidade nomos koñesementu haree liubá iha asuntu sira ne’ebe liga ho direitus umanus nian, tanba dalabarak jornalista sira sempre hetan violasaun iha terenu liuliu ba iha maluk jornalista feto sira tan ne’e husi treinamentu loron rua ne’e hanesan jornalista aprende materia barak tebes liga ba iha direitus umanus lei sira nomos ba iha asuntu sensitive sira tan ne’e hakarak agradese ba AJTL nomos asia foundation ne’ebé fasilita ona treinamentu ida ne’e mai jornalista sira.” Lia hirak ne’e hato’o jornalista media online One Timor Lurdes Soares Fernandes
Nia hatutan husi materia sira ne’ebe aprende espera katak ba oin sei aplika iha instituisaun ida-idak ne’ebé servisu ba, nomos haree ba iha asuntu kobertura nian, husi materia hirak ne’e bele komprende ona oinsa atu kobertura haree liubá iha direitus umanus nian iha nasaun Timor-Leste.
Reportajen : Domingas
Reportajen : Domingas