Letefoho, 22 Novembru 2024 (Média Democracia) – Relasiona ho Mudansa klimatika ne’ebé daudaun ne’e mundo infrenta liliu liga ho situasaun real ne’ebé akontese bailoron naruk iha Timor-Leste, fó impaktu la di’ak ba agrikultura kafe iha Suku Lauana Postu-Administrativu Letefoho nia produsaun kafé tun tanba bee laiha no kafé komesa tuan ona.
Xefe Suku Lauana Miguel Maia hateten, relasiona mudansa klimatika ne’ebé akontese, halo bailoron naruk afeta ba bee maran no plantasaun moris la di’ak, liu-liu plantasaun kafé sira.
“Tanba ne’e husu ba Ministériu Agrikultura Peskas Pekuaria no Floresta bele suporta Komunidade sira liuhusi parte ida hanesan rehabilitasaun kafé, atu labele para de’it, maibé tenke kontínua nune’e komunidade sira bele kuidado fali sira nia plantasaun.” Dehan Xefe Suku Lauana ba Jornalista sira iha Sede Suku Lauana Tersa ne’e (19/11).
Nia dehan tanba dezevolvimentu la’o iha área refere Afeta mós ba estragu ai-horis barak liuliu ai-samtuku.
“Entaun afeta ba ai-han no produsaun komunidade sira nia, mihis ba beibeik, tanba ida ne’e mak ba futuru ami atu husu para governu bele apoiu agrikultura sira, liuhusi rehabilitasaun, Viveirus atu bele apoiu ba komunidade sira nune’e sira bele kuda fali ai-horis no plantasaun sira ne’ebé agora dadaun maran no tuan hotu ona.” Nia dehan.
Nia esplika katak ekstensionista ne’ebé MAPPF tau iha suku sira ativu, maibé parte kompetente sira laiha planu hodi fó orietasaun ba to’os na’in sira.
“Ekstensionista sira iha ne’e ativu hela, maibé atividade ba sira atu kontinua ne’e mak la iha orietasaun mai husi diresaun sira, entaun loron-loron sira mai hamutuk ho ami la halo buat ida, pele menus Ministériu, tenke kria plano ruma para sira servisu ekipa, nune’e komunidade bele apresenta kona-ba lantasaun ne’ebé la di’ak.” Nia esplika
Governu Tenki kria ekipa tekniku hodi kontrola ba plantasaun sira, tanba ekipa hirak ne’e la hala’o sira nia funsaun ho di’ak.
“Iha tinan 2023 mosu ona rehabilitasaun atravez kompañia Asosiasaun Cafe Timor-Leste(ACTL), mai rehabilitasaun kafe komunidade sira-nian halo pagamentu lori Osan povo, lori osan governu hanaran povo nia osan mai dehan selu ho 40%, no 60% ne’e depois tinan oin mai kontínua, hadia plantasaun depois mak kompañia selu kompleta fali.” Nia dehan
Nia haktuir durante tinan ida ona governu la kumpri promesa sira hodi halo pagamentu kompleta 60% ba komunidade sira.
“Hanesan Autoridade lokál mós mosu duvidas, osan ne’e hela iha ACTL ka sei iha governu tanba to’o agora ami seidauk bele hetan esklaresidu, se karik hetan esklaresidu hanesan Autoridade lokál tenke simu karta ruma, osan 60% governu tenke aloka ona ba iha kompañia nune’e atu bele selu ba komunidade agrikultor sira.” Nia haktuir
Nia esplika Iha altura ne’eba Kompañia mai, nu’udar Autoridade sente kontente no haruka komunidade sira hamos sira kintál ho rápidu.
“Komunidade sira mós sente hanesan buat ida mai para halo badinas tiha komunidade, ikus mai habaruk fali sira, entaun ami sempre esplika bebeik katak la bele haree ba ida ne’ebá, maibé haree ba ita-nia produsaun nune’e bele hasae ka aumenta tan ita-nia produsaun sai barak.” Nia Esplika
Iha fatin hanesan Sekretáriu Suku Lauana Lúcio Soares hatutan, komparasaun mudansa klimátika entre agora ho tempu uluk ne’e iha diferénsia tebes, tanba uluk udan been tun sempre tuir nia tempu maibé agora udan been tun tarde, produtu ne’ebé komunidade sira kuda la fó produsaun di’ak.
“Ita ko’alia kona-ba mudansa klimátika ita haree diferensia boot liu, tanba iha tinan 1979 udan ne’e mai iha nia tempu, maibé ohin loron udan mai la tuir fali tempu ona no buat hotu ne’ebé mak ita kuda la iha rezultadu, atu kuda deit ai-farina ka kontas mós laiha rezultadu no impaktu makas mós ba kafe no halo kafe fuan diak.” Lúcio Hatutan
Nia informa, kafé presiza ai-mahon nune’e bele fó buras ba kafé nia produsaun, maibé ai- samtuku sira uluk ne’e komesa tuan no balu monu tanba rai halai.
“Kafé ne’e presiza mahon maibé ai-samtuku ne’ebé tuan komesa tohar no monu, entaun laiha ai seluk atu fó mahon ba kafé nomos produtu seluk hanesan Kontas no Talas, enkuantu ai-kafe ne’ebé governu fasilita ba komunidade kuda ne’e la hanesan ho Ai-samtuku tanba la dura to tempu naruk, entaun komunidade sira laiha produtu seluk atu garante ba, tanba kafe mak fó benefísiu ba komunidade.” Nia informa
Nia afirma katak maske komunidade sira halo kultura ka lia mate moris, maibe liuhusi rezultadu kafé fó benefisiu ba sira sei bele uza osan halo buat seluk.
“Kafe lori benefisiu boot ba komunidade maske komunidade sira kada tinan halo kultura barak, maibé sira nia uma halo nafatin, no uma iha ne’e mesak di’ak deit, entaun rahabilitasaun kafe ne’e nia benefisiu boot liu, tanba hahan ka buat hotu ne’ebé sira presiza atu hola ne’e liuhusi kafe tanba kafe mak sai hanesan ekonomia familia iha komunidade letefoho.” Nia afirma
Entretantu suku Lauana iha luan 52 KM kuadradu ne’ebé kompostu husi aldeia 10, totál Populasun 3.959, uma-kain 991, mane 1989 no feto 1970, no komunidade iha Suku refere moris ho vida agrikultura.
Enkuantu Progama media tour ne’e realiza tanba Asosiasaun Jornalista Timor Lorosa’e (AJTL), servisu hamutuk ho OXFAM iha Timor-Leste no hetan apoiu fundus husi Oxfam Hongkong
Reportajen : Estefania
Foto : Estefania