Dili, 09 Dezembru 2024 (Média Democracia) – Centro Nasional Chega CNC sigla portugesa enkontru regular hamutuk ho parseiru Internasional no Nasional iha Timor-Leste hodi atualiza kona-ba benefisiu servisu durante tinan ida-nia laran, atividade ne’e realiza iha salaun Centro Nasional Chega
Tuir Diretor Ezekutivu Centro Nasional Chega (CNC) Hugo Maria Fernandes hateten, ohin enkontru regular entre Centro Nasional Chega ho parseiru dezenvolvimentu Internasional nomos parseiru entidades publika sira iha Timor-Leste
“Servisu ida ne’e halo tanba dekretu lei ne’ebé fó kompetensia mai Centro Nasional Chega iha implementasaun mandatu sira CNC bele halo kooperasaun ho entidades governu nian ho Organizasaun Sosiedade Sivil no parseria dezenvolvimentu internasional sira.” Diretor Ezekutivu Centro Nasional Chega (CNC), Hugo Maria Fernandes
Diretor hatutan durante tinan hitu CNC hamrik realiza servisu hamutuk ho parseiru nasional nian maibé hetan mós husi parseiru dezenvolmentu internasional nian tuir lei centro chega nian nune’e bele estabele ho nia parseira sira
“Iha tinan haat ikus nian Centro Nasional Chega iha nia progresu ne’ebé di’ak parseria ho doador sira komesa hetan apoiu balun husi embaixada Australia, Alemanha, Universidade Internasional, COICA, Unesco nomos governu alemanha kooperasaun internasional GIZ-HOW, koopersaun Fransa, sira ne’e durante fó apoiu.” Dehan Diretor Ezekutivu (CNC)
Nia salienta tan katak parseiru dezevolvimentu fó apoiu iha asuntu iha importante rua ida haree kona-ba prezervasaun memoria liu-liu apoiu ba prezervasaun arkivu CNC nian , rua haree liubá parte edukasaun, istoria direitu umanu no edukasaun ba paz inklui formasaun ba profesores
“Ami nia enkontru regular ida ne’e atu aktualiza kona-ba benefisiu servisu durante hala’o hodi aprezenta ba malu hodi hetan sujestaun no komentariu balun husi parseiru dezenvolvimentu sira nune’e CNC bele hadia liután parseira ne’ebé di’ak iha futuru.” Dehan nia
Iha fatin hanesan reprezentante parseiru Koordenadora Projetu UNESCO, Hye Young Kim hateten, Unesco servisu hamutuk ho Centro Nasional Chega, Ministeriu Edukasaun no Infordepe komesa husi 2021 to’o agora, nune’e ohin realiza enkontru reguler hodi aprezenta progresu servisu ba malu
“Unesco servisu hamutuk Centro Nasional Chega, Ministeriu Edukasaun no Infordepe durante tinan tolu nia laran ona maibé projetu ne’ebé ami hala’o foka liubá edukasaun ba paz no istoria iha komponente tolu ida haree prezervasaun istoria Timor-Leste, rua foka ba edukasaun halo kolaborasaun ho ministeriu edukasaun, tolu koalia kona-ba servisu parseiru nian iha nivel nasaun rejiunal nomos internasional.” Dehan reprezentante parseiru Koordenadora Projetu UNESCO, Hye Young Kim
Nia hatutan tanba iha tinan oin Timor-Leste sei tama ba iha membru asean entaun Unesco hakarak promove di’ak liután parseiru Centro Nasional Chega nomos instituisaun seluk iha Timor-Leste ba nasaun Asean nian iha area edukasaun no paz rekonsiliasaun.
Reportajen : Nelfiano
Foto : Nelfiano