Dili, 23 Outobru 2024 (Media Democracia) – Dorafania Martins Colo, ho idade sia (9) eskola iha primaria Roti klase (3) husi munisípiu Oecuse, durante iha tempu ferias fahe nia tempu ho nia apa mai Dili hodi halo negósiu
Tuir Dorafania Martins Colo hateten, durante eskola ferias iha semana rua nia laran deside ho apa mai dili hodi halo negósiu ki’ik hanesan fa’an haas no kafé tuir dalan nian nune’e bele hetan netik osan ituan hodi responde ba presiza nian
“Daudaun ne’e ami hela iha Bebonuk, loron-loron sempre halo atividade negósiu hanesan fa’an haas no kafé tuir dalan ninin. Maibé haas ne’ebé ami fa’an tenke hola fali husi ema seluk nian, lori ba uma ami tenke koa halo ki’ik nune’e ense fila fali ba plastik no tau hamutuk iha Toples hafoin lori ba fa’an.” Dehan Dorafania iha Jardím Farol
Nia hatutan liután katak haas ne’ebé nia fa’an kada plastik rua ho sentavu 0,25 nune’e fasil ba ema atu hola lalais tanba jardín Farol, Motael, Palacio nia oin too Largo Lecidere iha ne’ebá negósiante barak mak halo negósiu tuir dalan ninin
“Durante eskola ferias ha’u ho apa mai Dili semana rua nia laran ona nune’e ha’u deside loron-loron ha’u tenke fa’an haas de’it kada loron ha’u fa’an hamutuk $6.50 ne’ebé dadersan ami matabisu hotu husi oras tuku 8.00 ualu dadaer ha’u komesa lao ona ba fa’an haas husi Bebonuk liuhusi tasi ibun Pante-kelapa nian ba too largo Lecidere nune’e haas ne’ebé ha’u fa’an kada loron sempre folin hotu nune’e osan ne’ebé ami hetan balun lori selu ba Ro hodi fila ba Oecuse balun fó Ama-Apa bele fasilita ba nia presiza loron-loron nian .” Dehan nia
Nia salienta tan katak maske fa’an haas lao ain de’it maibé nia la senti kolen no baruk tanba haas ne’ebé kada loron nia fa’an sempre folin hotu no la hetan estragu nune’e sente kontente tebes, bainhira eskola tama tenke fila ba Oecuse nune’e tuir fali prosesu aprendizajen hanesan tempu baibain nian
“Ami iha maun-alin na’in haat feto rua no mane rua maibé ha’u iha mehi ne’ebé furak tebes ba futuru ha’u hakarak sai dotora nune’e bele falsilita pasiente sira iha Ospital. Maske dadaun ne’e ami ho familia simples maibé nafatin esforsu aan atu aprende iha eskola no fatin seluk tanba atu sai di’ak tenke hasoru dezafiu oioin.” Hatutan nia
Esplika kle’an liután katak Dorafania hanesan oan feto datoluk husi maun -lin nain haat maibé nia gosta ajuda nia Apa hodi halo atividade negósiu nune’e bele hetan osan ituan hodi fasilita ba presiza loron-loron nian
Reportajen : Nelfiano
Foto : Nelfiano