Dili, 29 Outobru 2024 (Média Democracia) – Embaixada Real Thailandia iha Timor-Leste hamutuk ho ofisiál Embaixada no espoza Selebra Loron Mate liurai Thailandia Bhumibol Adulyadej no Liurai Chulalongkorn ne’ebé realiza ho atividade voluntáriu ba doasaun nesesidade esensiál ba Feto no labarik feto sira liuhusi Fundasaun Alola.
Embaixadór Real Thailandia iha Timor Leste, Atipat Rojanapaibulya hateten, atividade voluntáriu ne’e realiza hodi hanoin hikas liurai boot rua Thailandia nian ne’ebé mate iha fulan Outobru nia laran.
“Embaixada Thailandia hala’o atividade voluntáriu ne’e atu komemora loron ‘Memória Day’ ba Sua Majestade Liurai Boot Bhumibol Adulyadej ne’ebé nia loron mate iha 13 Outobru nomos Liurai Chulalongkorn ne’ebé nia mate iha loron 24 fulan Outubru.” Dehan Embaixadór Thailandia ba Jornalista sira iha Edifísiu Fundasaun Alola Mascarinhas Tersa feira ne’e
Nia dehan embaixada ajuda liuhusi organizasaun rua ne’ebé durante ne’e servisu foka ba iha Vítima Violénsia Bazeia ba Jéneru.
“Iha okaziaun espesial ida ne’e embaixada Thailandia fó ajuda ne’e liuhusi organizasaun rua ne’ebé embaixada Thailandia konsidera hanesan organizasaun rua ne’ebé servisu ba inan feton no labarik sira ne’ebé sai Vítima Violénsia Bazeia ba Jéneru, ne’e mak embaixada Thailandia fó ajuda ne’e ba Fundasaun Alola ho Casa Vida tanba organizasaun rua ne’e servisu makas ba feto no labarik sira ne’ebé sai Vítima ba VBJ.” Nia dehan
Embaixadór ne’e afirma katak Governu Thailandia la’ós foin primeira-vez ajuda Timor-Leste, maibé halo kooperasaun ba apoiu tinan 10 ona.
“Ida ne’e la’ós foin primeira-vez embaixada Thailandia fó ajuda ba fundasaun Alola hanesan ohin señóra CEO rasik ko’alia katak embaixada Thailandia fundasaun Alola ne’e tinan 10 resin ona, ba Casa Vida foin tinan 5 ikus ne’e foin embaixada fó, ajuda ne’e foku liubá iha feto no labarik sira ne’ebé sai hanesan vítima ba Violénsia Bazeia ba Jéneru.” Nia afirma
Tanba ne’e apoiu refere tuir programa governu nian nomos Prezidente Repúblika nian ne’ebé tau prioridade ba Feto no labarik feto sira ne’ebé hasoru, nune’e embaixada mós halo tuir programa refere.
Aleinde ne’e Ajuda ne’ebé oferese hanesan sasán Báziku esensial ba Feto no labarik sira, nune’e hodi aumenta nutrisaun ba bebé no labarik, atu iha edukasaun ne’ebé di’ak hodi sai futuru ba nasaun Timor-Leste.
Embaixadór Thailandia iha Timor-Leste ne’e mós husi ba média sira atu servisu makas hodi divulga informasaun kona-ba Violénsia Bazeia ba Jéneru.
Iha biban ne’e mós Diretora ezekutiva Maria Imaculada Guterres haktuir katak Embaixadór Thailandia ho nia delegasaun mai iha Fundasaun Alola ne’e atu selebra Liurai Boot nain 2 nia loron mate liuhusi atividade doasaun sasán esensial hodi tulun feto no labarik sira.
“Nia objetivu mak atu fó materia esensial sira ne’ebé bele tulun feto no labarik feto sira iha tempu ne’ebé sira presiza entaun ami hanoin iha Alola tanba baibain ami mós atende vítima violénsia bazeia ba jéneru liliu maluk feto sira dala balun mai presiza tebes apoiu sira hanesan ne’e entaun ami bele fornese sasán refere.” Dehan Diretora Maria Guterres
Nia dehan durante ne’e Fundasaun Alola nia programa halo advokasia ba sentru akonsellamentu hodi apoiu ba vítima Violénsia Bazeia ba Jéneru.
“Tanba baibain liuhusi ami-nia programa advokasia, ami iha sentru akonsellamentu ne’e ba vítima sira ida ne’e fulan fulan sempre iha Vítima sira ne’ebé mai husi ami-nia apoiu, molok ami refere ba Ministériu Solidariedade Sosiál.” Nia haktuir
Entretantu apoiu ne’ebé Fundasaun Alola fó hanesan sasán nesesidade urjenti sira, liuhusi apoiu refere bele distribui nu’udar pakote umanitária ba vítima sira kada fulan depende ba sira ne’ebé asesu iha Sentru Alola Nian.
Reportajen : Estefania
Foto : Estefania