Dili, 28 Outobru 2024 (Média Democracia) – Marcelina Oleveira ho idade sia (9) mai husi Munisípiu Lautem no daudaun ne’e hela iha Pante-kelapa, Eskola Premaria Lurumata klase (4) iha tempu ferias sempre halo atividade negósiu ki’ik hanesan fa’an haas tuir dalan ninin.
Tuir Marcelina Oleveira hateten duarante tempu eskola ferias iha semana rua nia laran kada loron sempre fa’an haas tasak tuir dalan ninin bele hetan osan ituan nune’e bainhira tama fila-fali eskola bele hodi selu mikrolete no balun bele hola fali sasan sira seluk.
“Haas tasak ne’ebé loro-loron ha’u fa’an sempre lori $2.00 dolar nia folin, plastik rua $0.25 nune’e fasil ba ema atu hola hotu lalais. Tanba ema barak fa’an haas tasak tuir dalan ninin no ema hirak ne’e mesak idade boot ne’ebé dalaruma ami nia haas folin la hotu tanba ema hirak ne’e hatene fa’an tuir fatin ne’ebé ema bele hola lalais.” Dehan Marcelina Oleveira
Nia hatutan liután katak haas ne’ebé nia fa’an kada plastik rua ho folin $0,25 nune’e fasil ba ema atu hola lalais tanba jardím Farol, Motael, Palacio nia oin too Largo Lecidere ema barak mak halo negósiu kiik hanesan fa’an haas tasak.
“Durante eskola ferias semana rua nia laran ha’u deside loron-loron ha’u tenke fa’an haas tanba haas ne’ebé ha’u fa’an ami nian rasik, nune’e iha tempu dadersan ha’u nia Apa ku’u entaun ha’u tenke hili tuir depois lori ba fase halo moos nune’e bele koa halo ki’ik hotu hodi ense ba plastik laran, kada plastik ida iha haas baluk lima iha nia laran, hafoin hada fali ba toples mamuk nune’e bele lori ba fa’an tuir dalan ninin.” Dehan nia
Nia salienta iha dadersan matabisu hotu, entaun iha oras tuku 9.00 dadaer liu komesa lao ona ba fa’an haas, husi uma kampu-alor ba too iha largo Lecidere bainhira folin hotu entaun fila ba uma, karik folin la hotu kontinua fa’an ba fatin seluk nune’e bele folin hotu.
Esplika kle’an liután katak Marcelina hanesan oan feto daruak husi maun alin nain neen maibé nia gosta halo negósiu ki’ik hanesan fa’an haas tuir dalan ninin nune’e bele hetan osan hodi selu mikrolete ba eskola, tanba nia iha mehi ne’ebé furak iha futuru hakarak sai parteira
Reportajen : Nelfiano
Foto : Nelfiano