Dili, 14 Novembru 2024 (Média Democracia) – Joven foin-sa’e hamahan-aan iha sentru haburas movimentu Diretus Umanu Ajar realiza komunikadu imprensa ho tema “Mai Ita Hamoris No Haburas Sentimentu Patriotismu No Unidade Nasional”. Iha diálogu ne’e joventude sira levanta mós preokupasaun importante, hanesan seguransa no protesaun, konflitu, kna’ar militarismu, partisipasaun, akuntabilidade no igualdade jeñeru, komunikadu ne’e realiza iha Kampaun HAK Faról Dili
Iha konferensia porta-voz, Silvino dos Santos haktuir, bazeia ba rezultadu peskiza husi joventude sira durante hala’o implementasaun FGD iha Munisipiu Ainaro, Baucau, Bobonaro, Viqueque, Covalima, Manu-Fahi, Manatutu, Likisa, Aileu no Lautem. FGD ne’e rasik hala’o husi estudante Direitu Umanu no Justisa Sosiál (AJAR) ho objektivu, atu buka hatene kle’an kona-ba kodisaun real ne’ebé joventude sira infrenta iha terenu. Liga ho hanoin ne’ebé kritiku, analitiku no reflektivu ba situasaun atual durante joventude sira preokupa iha períodu independénsia.
“Ami hanesan joventude sei lahases husi lidun direitu umanus. konsekuensia seguransa interna no externa, dezempregu estrutural, no implementasaun politika públika. Baibain ema konsidera joven maka ema ida ne’ebé tama ba faze adultu lolos nian. Maske hakerek nanis ona iha polítika nasionál ba Joventude nian, define meta no tarefa sira hanesan direitu, reponsablidade no obrigasaun.” Dehan porta-voz Silvino dos Santos
Nia hatutan maibé, durante iha FGD nota katak, Timor-Leste nian auto-determinasaun liu ona dekade rua, maibé joventude Timor sei nafatin moris iha liña dezempregu no edukasaun la balansu ho nune’e joventude sira mo’ut iha konsiénsia falsu, prinsipiu mamuk no fasil tebes monu ba korente konflitu nian.
“Ami joventude kestiona husi tinan 2002 hetan independénsia, Timor enfrenta krize lideransa no krise politika militar hodi resulta krise regionalismu, 2006 to’o ba krise arte marsiais no rituais iha tinan 2008, situasaun hirak ne’e mosu tanba makaer ukun sira ignora objetivu luta libertasaun povu no prinsipiu konstituisaun nian ne’ebé previstu iha art. 6 (objektivu estadu)1, no art. 19 (klosan sira) aliña B2. Elite Politiku sira laiha prinsipiu ba demokrasia sentralismu, arogansia polítika lider sira nian buras, ikus mai, hamosu krize ne’ebé estruturadu, sistemátiku no mássivu lha dekade rua-nia laran.” Dehan nia
Nia salienta jerasaun foun anota katak, egoismu elite sira nian mak ideia historia to’o hada’et no naksulik ba guerra psikologia joventude sira (odlu, stres, pesimismu, ilusaun, hakdasak, frustadu no estagnadu iha fatin) iha Estadu RDTL. Kestaun sira ne’e halo joventude sira kontinua konflitu no provoka malu iha fatin-fatin, hatun malu iha plataforma dijitál, estraga reputasaun ema nian, hamihis unidade nasional entre joventude sira, degradasaun moral ba joventude sira kontinua naksulit no buras iha sosiedade nia le’et.
“Ami observa mós katak dala-barak lider boot sira esklui jerasaun foun ba peritu tékniku sira husi desizaun boot sira. Tamba lider sira politikamente politiza ekonomia rai laran, baibain, divizaun politiku maka liga ho interese ekonómiku, jeopolitiku no ideolójiku. Ami konsidera nu’udar konsekuensia husi situasaun politika neʼebé hahoris deskriminasaun, deskripansia sosial ou inkonsistensia sosial, abuzu poder iha instituisaun demokratiku, korupsaun pasivu no ativu, nepotizmu.” Haktuir Porta-voz
Nia informa durante iha dialogu ida ne’e nota ona katak kondisaun sosiu-ekonomia familia nian bele mós afeita ba joventude sira, tanba estimulasaun rendimentu ekonomia menus tebes-tebes ho nune’e mak halo joventude sira desmoraliza, la obidensia ba normas no tradisaun hanesan sidadaun Timor-Leste.
“Ami ho pozisaun klaru, katak violénsia neʼebé akontese konsekuensia mak sei haluan grupu elit ne’ebé forte, joven barak kontinua 1 Aliña b) garante no promove sidadaun sira nia direitu no liberdade fundamentál no respeitu ba estadu nian prinsipiu kona-ba direitu demokrátiku. 2 Estadu sei fó buat hotu-hotu ne’ebé nia bele, atu tulun edukasaun, saúde no formasaun profesional ba klosan sira, dezempregu, edukasaun formal Timor nian la tulun joventude sira iha libertasaun no sosiedade kontinua fó estigmasaun ne’ebé kruel ba juventude sira katak joven maka sala autor ba violénsia.” Nia realsa
Nia esklarese joventude barak preokupa ho asuntu dezempregu, wainhira dezempregu ne’e aas iha Timor, maka ninia konsekuensia hanesan resiste-an, ataka, destrutivu, defensivu no konsidera ema seluk hanesan inimigu. Iha Timor-Leste asuntu dezempregu sai ona nu’udar problema boot ba governu no estadu iha nasaun foun ida ne’e. Hahu Timor-Leste hetan nia restorasaun total 2002, problema dezempregu sai ona kestaun ida neʼebé seriu ba governu tanba numeru dezempregu kada tinan aumenta ba bei-beik, laiha kampu de servisu ne’ebé halo juventude barak mak sai frustradu.
Porta-voz esplika katak joventude nu’udar ajente ba mundansa, ho ne’e tenke kria politika publika ida ne’ebé dignu no kualidade ba joven sira, atu nune’e ema hotu bele iha partisipasaun ativu ba asuntu publiku. Governu tenke iha ona planu atu hasa’e ekonomia rai laran no promove ekonomia makro hodi fó espasu ba joventude sira ba kampu servisu no governu tenke kria politika ekonomia makro iha rai laran hodi bele emprega joven sira iha sektor produtivu hanesan Agrikultor, Merkadoria no Industria.
Reportajen : Nelfiano
Foto : Nelfiano