Dili, 22 Outubru 2024 (Media Democracia)- Junizio ho idade sanulu-resin-ualu (18) loro-loron sempre fahe tempu halo negósiu hanesan dudu karosa tuir dadan ninin hodi faan hudi tasak lori selu rasik osan eskola no uma koos kada fulan
Tuir negósiante Junizio Campos Xavier hatete durante mai hela iha sidade Dili komesa hanoin ona atu halo negósiu nune’e bele selu rasik Uma-koos
“Ha’u husi Munisípiu Viqueque Postu Administrativu Lacluta Suku Ahik no daudaun ha’u hela iha Merkadu Taibesi no hala’o estudu iha eskola sekundariu Nobel da Paz iha 11 klasse. Iha tempu ha’u sempre halo negósiu fa’an hodi tuir dalan ninin nune’e bele hetan osan hodi sustenta ha’u nia presiza loro-loron nian no balun haruka ba inan-aman iha Munisípiu.” Dehan Junizio Campos Xavier
Nia hatutan hudi tasak ne’ebé hodi halo negósiu ne’e sempre hola mai husi Viqueque, maibé hudi hirak ne’e sosa tutan tan fali husi ema seluk nian kada sasuit lima ema faan ba $ 1.00 dolar ne’ebé kada ema ida dalaruma bele hola too 200 dolar.
“Ami atu hola hudi lori ba faan iha sidade Dili ami sempre tau hamutuk osan lori selu ba kareta komioneta ida nune’e bele tula hudi lori mai Dili. Ne’ebé kada ema ida tenke hatama osan 50 dolar maibé iha grupu laran ami hamutuk ema na’in neen nune’e tau hamutuk osan too 300 dolar hodi selu kareta nune’e bele lori mai too Dili.” Dehan Junizio
Nia salienta liután katak bainhira hudi lori too ona iha Dili nia tenke buka meius oin-oin hodi fahe tempu nune’e bele halo negósiu nian labele fó impaktu ba atividade aula nian ba prosesu aprendizajen iha eskola.
“Ha’u tama aula komesa husi oras tuku sanulu-resin-ida meudia no remata aula iha oras tuku rua lokraik liu minitu tolu-nulu 2.30, nune’e ha’u fila ba uma han tia ituan, kontinua lori hudi ba faan husi taibesi ba too Bairo-Pite liuba Bebora, Kaikoli depois fila mai uma. Tanba ha’u sai eskola lokraik entaun ha’u tenke lori de’it 25 dolar nia folin nune’e bele folin hotu. Maibé iha loron ne’ebé livre hanesan Domingo entaun ha’u lori 50 dolar tanba sai husi uma dadersan entaun lokraik folin hotu, hudi ne’ebé ha’u faan ho folin kada sasuit ida $0.50 karik sasuit boot 1.00 dolar nune’e ema bele lalais.” Hatutan nia
Nia afirma osan ne’ebé kada loron nia hetan balun lori selu uma-koos no balun selu ba eskola no balun haruka ba munisípiu hodi selu mós alin sira nia eskola
Atu esplika klean liután katak Junizio hanesan estudante ida maibé nia iha hanoin ne’ebé furak tebes hodi kria rasik atividade negósiu hanesan faan hudi tuir dalan ninin nune’e bele hetan hosi fasilita ba nia presiza no suporta alin sira nia eskola
Reportajen : Nelfiano
Foto : Nelfiano