Dili, 10 Abril 2025 (Média Democracia) – Moris hanesan negósiante la fasil ba ema hotu atu hala’o, maibé ida ne’e esforsu husi ema ida-idak nian foin bele hetan susesu ne’ebé buat tenke luta maka’as hasoru dezafiu oioin foin bele hetan ai-han pedasuk ida hodi sustenta ba nesesidade loron-loron nian.
Tuir Carmelita da Silva ho idade 49 husi Munisípiu Viqueque, daudaun ne’e hela iha Munisípiu Dili Postu-Administrativu Dom-Aleixo Suku Bebonuk, hodi kria atividade negósiu ki’ik iha dalan ninin hodi satan netik ekonomia familia loronn-loron nian.
“Ha’u kria negósiu ki’ik ne’e komesa iha fulan Juñu tinan 2022 nia laran to’o agora. Durante ne’e ha’u fa’an modo tahan hanesan aifarina-tahan, mostarda mutin no metan, aidila-nurak, kanko, tomate, aimanas, lis mutin no mean, lakeru-dikin, fehuk-dikin inklui pipinu. Osan lori halo negosi ki’ik uza ha’u nia osan rasik no la tama iha grupu ruma impresta osan hodi halo negósiu.” Dehan Carmelita da Silva
Nia hatutan durante ne’e kria atividade negósiu, dadersan tuku 3.30 tenke ba ona merkadu Tasibesi, nune’e bele hola modo tahan ne’ebé ema lori husi Munisípiu Ainaro no Aileu tanba modo hirak ne’e mesak baratu hodi ba fa’an tutan fali
“Ha’u kria negósiu ida ne’e sente hanesan todan tebes maibé tanba nesesidade nia obriga tenke esforsu-aan nune’e bele hetan oasan ituan hodi satan ba familia nia presiza. Tempu dadersan ha’u tenke hader sedu hodi prepara-an ho oan mane, nune’e ba hola modo bainhira ita ba tarde ita sei la hetan modo tanba ema barak mak ba hein entaun ita tenke hadau malu foin bele hetan modo.” Dehan nia
Nia salienta osan ne’ebé kada loron lori ba hola modo hamutuk $40.00 dolar ne’e lori ba hola hotu kedas modo tahan $ 5.00 dolar lori motor tigaroda hodi tula modo lori fila ba uma nune’e bele halo negósiu
“Kada loron ha’u tenke hasai osan $45.00 dolar hodi hola modo tahan no selu motor tigaroda maibé ha’u fiar katak bele hetan fila-fali osan funan. Entaun modo hirak ne’e lori mai ha’u tenke kesi fahe malu hafoin bele fa’an ho folin husi $0.50 to’o 1.00 dolar, entaun kada loron hetan osan 20 dolar karik sorte di’ak hetan to’o 25 dolar.” Nia haktuir
Nia afirma durante ne’e moris hanesan negósiante buka osan hodi sustenta ba familia nia presiza no haree oan sira nia eskola, bainhira la hatene buka osan se mak atu ajuda, ne’eduni buat hotu tenke esforsu no buka rasik, nune’e bele muda moris iha familia nia laran.
Esplika liután vida negosiante la fasil ba ema hotu maibé ne’e esforsu rasik ema ida-idak nian foin bele hetan osan hodi sustenta ba familia nia presiza. Maske durante halo negósiu sempre hasoru dezafiu oioin maibé hanesan negósiante nafatin fiar-aan ba futuru sei moris di’ak liután iha parte oioin.
Reportajen : Nelfiano
Foto : Nelfiano
Editor : Jp.Costa