Dili, 09 Dezembru 2024 (Média Democracia) – Fokupers hamutuk ho World Vision Timor-Leste no Fundasaun Esperansa Enclave Oe-Cusse (FEEO), realiza atividade diálogu públiku ho tema “Hamutuk ita prevene no hapara violensia hasoru feto hodi promove igualdade jéneru no asegura feto nia direitu umanu liuhusi empoderamentu ekonomia” ne’ebé hetan apoiu fundu husi Uniaun Europeia.
Diretor Nasional World Vision Timor-Leste Jaret Berends hateten, World Vision Timor-Leste hamutuk ho parseiru dezenvolvimentu sira hanesan FEEO, realiza atividade ida ne’e hodi fahe informasaun importante relasiona ho violensia hasoru feto no labarik.
“Word Vision Timor-Leste hanesan ONG ne’ebé bazeia ba fiar iha Timor-Leste hahu 1995 iha word vision ami rekoñese katak apoiu ba Violensia bazeia ba jeneru igualidade hasoru feto no labrik feto atu kombate tuir mai kolabora ho sira seluk no membru menoridade sira hodi kombate Igualidade transforma no haburas Igualidade no Inkluzaun.” Dehan Diretór WVTL iha diskursu Salaun Delta Nova Dili
Iha projetu ne’e foka liubá empoderamentu feto liuhusi hasa’e koñesimentu feto nian hodi asesu ba servisu komersial, emprezariu no asesu ba merkadu sira, Joventude negosiante sira iha institutu apoiu dezenvolvimentu emprezariu.
“Ha’u hakarak fahe koñesimentu ba partisipante sira hodi hasa’e sira nia koñesimentu, violensia bazeia ba jeneru hamaten direitu feto no mane sira nia direitu, atu hapara numeru Violénsia hasoru feto no mane iha menoridade ida ne’e laos feto ida mesak nia servisu maibé ita hotu-hotu nia servisu hamutuk halakon Violénsia hasoru Feto no labarik feto, sai mós exemplu hodi halo mudansa iha familia no komunidade.” Nia dehan
Iha fatin hanesan Sekretária Estadu Igualdade Elvina Souza apresia ba parseiru dezenvolvimentu sira nia apoiu no komitmentu hodi apoiu projetu sira kona-ba promove igualdade Jéneru no prevene violensia hasoru feto no labarik feto, nomos ba instituisaun finanseiru BNCTL, Kaebauk no seluk tan.
“Komitmentu boot atu hasai no kore feto sira husi kiak no mukit liuhusi sira-nia atividade finanseiru sira hodi empodera feto iha vida ekonomia, nomos autoridade lokál sira ita presiza fó apresiasaun ba sira, tanba sira mak front-line iha sosiedade nia leet hodi sai mata dalan loos iha sira nia suku bainhira hetan problema no sira sai hanesan mata dalan ba sira-nia kominidade atu empodera fero sira.” Dehan Sekretária Estadu Elvina
SEI nafatin apresia ba entidade hotu tanba liuhusi atividade sira seluk mós priense iha loron 16 ativismu violensia kontra feto no labarik feto ne’ebé sei remata iha loron aban.
“Sosiedade sivil liña ministeriais sira ho esforsu tomak promove atividade sira la’os iha Dili de’it maibé iha munisípiu sira atu bele nafatin fó hanoin hasa’e konsiénsia kona-ba importánsia husi hamenus no halakon kualker tipu violénsia hasoru feto no labarik feto nomós empodera feto iha ekonomia husi setor hotu-hotu.” Nia dehan
kampaña loron 16 ativismu kontra violensia hasoru feto no labarik feto mós hanesan kampaña internasional ne’ebé Timor-Leste hola parte ona desde uluk hodi foti asaun no determinasaun firme kontra violensia hasoru feto no labarik feto, hahú husi uma laran, iha instituisaun sira no fatin públiku sira seguru, ba ita-nia inan aman liliu ba feto no labarik feto sira, grupu vulneravel sira hanesan mós maluk portadór defisiénsia sira no Komunidade LGBTQI+.
Diretora Ezekutiva Fokupers Domingas Afonso Amaral hateten, atividade ohin loron atu selebra loron 16 ativismu ba kontra violénsia hasoru feto no labarik feto ba tinan 2024 nian liga ho tema ne’ebé atu ko’alia kona-ba atu prevene no hapara violensia hasoru feto no labarik.
“Ita hotu hatene katak ita-nia tema nasional ba iha loron 16 tinan 2024 nian ho tema “hamutuk prevene no hapara violensia hasoru feto no labarik feto iha Timor-Leste” entaun iha ámbitu ida ne’e Fokupers servisu hamutuk ho organizasaun world vision Timor-Leste no Fundasaun Esperansa Enclave Oe-Cusse (FEEO), ne’ebé ninia fundus finansiamentu husi Uniaun Europeia, ita konsege realiza ita-nia atividade ida bolu naran dialogu públiku.” Dehan Diretora Fokupers ba jornalista sira iha salaun Delta Nova, Dili
Nia informa atividade diálogu públiku ne’e nia alvu prinsipál mak joven no foinsa’e sira iha munisípiu Dili tanba joven mak sai hanesan autór prinsipal ba luta atu hapara violénsia hasoru feto no labarik nomos empodera ekonomia feto no promove direitu feto.
“Diálogu publiku ida ne’e maioria joven foin sa’e sira, estudante universitáriu sira nomós eskola oioin iha Dili laran, entaun ita mós la sees husi parseiru interasante sira hanesan organizasaun nasional no organizasaun international, lider komunitária sira tanba ita hotu hatene katak sira mós foti papél importante iha sosiedade hodi hapara violensia liliu empodera feto no ema vulneravel sira.” Nia informa
Nia afirma matéria importante atu koloka iha atividade refere mak empoderamentu ekonomia feto ema vulneravel no sobrevivente sira.
“Tanba ita hotu hatene katak bainhira feto ida nia hetan empoderamentu ba iha nia ekonomia, nia mós komesa kontribui ona ba dezenvolvimentu nasaun ida ne’e, liliu komesa kontribui ba iha paz no dame iha ninia familia uma-laran sira haruka oan sira bele ba eskola no hetan rendimentu atu bele dezenvolve nasaun ida ne’e, nomós kria fini sira ne’ebé bele promove igualdade jéneru.” Nia afirma
Fokupers iha orsamentu naton hodi implementa programa durante tinan-tolu nia laran, durante iha kampaña loron 16 ne’e Fokupers kontinua halo sensibilizasaun liuhusi fó mensajen pozitivu iha média sosial, atividade semináriu, Realiza Bazár no atividade seluk ne’ebé hola parte iha laran hanesan violénsia hasoru feto lo labarik feto sira.
Reportajen : Estefania
Foto : Estefania