Dili, 15 Abril 2025 (Média Democracia) – Asistente Vítima Zizelma Maria de Fátima Verdial Gonçalves, Eustaquio Guterres hatama ona rekursu ba Tribunál Judisiál Primeira Instánsia Dili (TJPID), maibé depende fali ba tempu husi parte kompetente, hodi bele hasae prosesu ba Tribunál Rekursu.
“Ohin ita hatama rekursu, iha ami nia rekursu ami fundamenta desizaun ne’ebé aplika bá arguidu MSDC ne’e ho pena multa tinan tolu, suspende bá tinan haat, tanba ne’e ami iha razaun no fundamentasaun hodi hatama rekursu.” Dehan Asistente Eustaquio Guterres liuhusi Via mensajen Whatsapp segunda (14/04).
Estaquio afirma, iha rekursu refere sita mós motorizada ne’ebé kondúz husi Arguidu ho dokumentus falsu, sapa matrikula la hanesan uza fali motor ONG nia Sapa Matrikula, nune’e mós ho video ne’ebé durante ne’e viral ona CCTV besik iha fatin akontsimentu.
“Nune’e ha’u konsidera kirme ida tan bá falsifika dokumentu, maibé buat hotu ne’ebé relasiona ho akontsimentu liu-liu ho asidente ne’ebé rezulta vitima Zizelma to’o lakon vida ne’e, ida ne’e aprezenta hotu iha rekursu laran.” Afirma nia
Nia parte la simu desizaun ne’ebé Tribunál hatun ba arguidu MSDC, hodi aplika de’it pena tinan tolu no suspende tinan haat (4), ne’e konsidera la justu, tan ne’e mak Asistente ne’e halo rekursu ba TJPID.
Enkuantu kona-ba troka Prokuradora Benvinda do Rosário, ne’e kompeténsia Prokurador Jerál Repúblika (PJR) nian, embora Estaquio hanesan asistente ba família Matebian Zizelma nian, nia halo tuir de’it nia kna’ar hodi halo rekursu, tanba haree ba iha desizaun tribunal la justu no la edukativu hodi fó pena tinan tolu, suspende tinan haat.
“Maibé ita hotu-hotu hein depois tribunál rekursu nia haree bá ami nia rekursu ne’e halo oinsá, ami nia fundamentasun ne’ebé ami hasae ona bá rekursu, ne’e komforme tribunál rekursu maka haree, depois maka sira hili tun mai.” Nia dehan
Nia haktuir, Kona-ba prazu loron no fulan hira, depende ba desizaun husi tribunál rekursu, kona-ba rekursu ba matebian Zizelma ne’e, nia husu bá família Zizelma atu pasensia hodi hein desizaun tribunál ninian.
Tanba Rekursu ne’e la’ós asistente de’it maka halo, maibé tuir informasaun ne’ebé iha, katak Prokurador Jerál Repúblika sei nomeia fali prokurador seluk hodi troka fali Prokuardora Benvinda do Rosário.
“Signifika PJR mós la aseita ho desizaun Tribunál Judisiál Primeira Instansia, ne’ebé ha’u hanoin katak Prokuradór mós agora prepara hela hodi hato’o rekursu, ne’e duni ha’u husu bá kolega Jornalista sira karik presiza hatene liu informasaun bele husu took PJR.” Nia haktuir
Entretantu iha loron 18 Fulan Marsu Tribunál Judisiál Primeira Instánsia Dili liuhusi Juiz José Gonsalves hatun ona despaixu hodi aplika tinan tolu, suspende tinan haat ba arguidu MSDC ne’ebé deskonfia soke mate Zizelma Maria de Fartima Verdial Gonçalves iha área Delta bainhira ultrapasa Zebra Croz iha loron 13 fulan Marsu tinan ne’e.
Antes ne’e, asistente Estaquio Guterres hateten, nu’udar asistente ba matebian Zizelma Maria Fatima Verdial Gonsalves agora dadaun kondena ona ho Ministeriu Públiku (MP) prepara hela rekursu hodi kontesta desizaun Tribunal Judisial Primeira Instansia Dili ne’ebé aplika pena prizaun tinan tolu suspende ba tinan haat ba arguidu MSDC ne’ebé soke mate vitima Zizelma Maria Fatima Verdial Gonsalves iha area Delta, Funan Buras iha loron sesta (13/3) fulan kotuk.
“Sai hanesan asistente ba vitima sira, desizaun sai tiha ona, ha’u simu ona notifikasaun ligadu ho despaixu Tribunal nian ba kazu Zezelma Maria Fatima Verdial Gonsalves, Despaixu Tribunal ne’e foin notifika ha’u no despaixu ha’u simu tiha ona nune’e ha’u sei kordena ho Ministeriu Publiku (MP), no ami hanesan asistente ba vitima aban ami sei hatama rekursu hodi kontesta ba iha desizaun Tribunal Judisial Primeira Instansia Dili.” Hateten Asistente Eustaquio Guteres ba jornalista iha edifisiu TJPID Caicoli, Tersa-feira (01/04/2025)
Asistente ne’e hateten, hanesan asistente ba vitima Zizema prepara ona rekursu no hein atu submete de’it.
“Ami iha prazu loron 30 nia laran para aprezenta rekursu no ha’u sei kordena ho Ministeriu Publiku (MP) ne’ebé hanesan nain ba iha prosesu ida ne’e, atu halo rekursu ba iha desizaun ne’ebé Tribunal deside.” Nia afirma
Asistente ne’e konklui tan katak, lakohi fundamenta kona-ba saida mak nia deskreve iha rekursu ne’e.
“Rekursu agora prontu ona hein ami subemete hodi kontesta idesizaun Tribunal.” Nia konklui
Rekorda fali katak, matebian Zizelma Maria Fatima Verdial Gonsalves soke husi arguidu MSDC ho motorizada Honda Beat iha area Delta Funan Buras iha loron sesta (13/3) tuku-ualu kalan fulan kotuk.
Iha asidente trafegu ne’e rezulta matebian Zizelma Maria Fatima Verdial Gonsalves hakotu iis, nune’e ho asidente trafegu ne’e polisia detein kedas suspeitu MSDC iha sela detensaun oras 72.
Nune’e iha loron (28/7) liuhusi prosesu sumariu, Juiz Titular José Gonsalves deside aplika pena prizaun tinan tolu suspende ba tinan haat ba arguidu MSDC no selu indeminizasaun sivil ba danu patrimonial ba vitima Zizelma Maria Fatima Verdial Gonsalves nia familia ho valor $5000, tanba arguidu nia hahalok halakon ona vitima Zezilma nia vida.
Ho desizaunTribunal nian ne’e, mosu dezentedimentu entre familia vitima no arguidu sira iha Tribunal Judisial Primeira Instansia Dili, tanba familia vitima la satisfas ho desizaun Tribunal nian to’o rezulta arguidu MSDC nia feton hetan pankada grave tanba ema balu ho helem to’o monu fatin no agora sei halo Testamentu iha Hospital Nasional Guido Valadares.
Reportajen : Estefania
Foto : Estefania