Letefoho, 22 Novembru 2024 (Média Democracia) – Relasiona ho mudansa klimátika ne’ebé akontese globál hodi fó impaktu ba bailoron naruk inklui illa Timor-Leste ne’ebé halo udan monu rai la tuir nia tempu, hodi afeta ba bailoron loron naruk.
Mudansa klimátika nia afeta ba bee maran halo atividade agrikultura la lao, tanba ne’e komunidade iha aldeia Hohulu, suku Lauana, Postu-Administrativu Lete-foho Munisípiu Ermera, hamutuk ho lia-nain sira hala’o atividade ritual hodi bolu udan been.
Atividade ritual bolu udan ne’e komunidade hamutuk ho lia-nain iha aldeia Hohulu Bidau, tebe, haklala no hú-karau nia dikur tuir kultura aldeia Hohulu lisan Leldu nian hodi ba vizita no kuru Bee matan 4 lori mai tau iha lisan Leldu hodi bolu udan been.
Lian nain Uma Lisan Hohulu Leldu, Manuel Colisala haktuir ritual bolu udan ne’e tanba haree ba bailoron naruk halo udan monu rai la tuir nia tempu, hodi fó impaktu ba ema nia vida nomos animal no ai-horis
“Objetivu husi kultura ida ne’e ami halo hodi bolu udan, banhira udan la mai halo bailoron naruk no fó impaktu ba ami nia moris, Ami bolu udan mai para halo modo sira buras, ai horis sira no fó moris ba animal ho ita ema, tanba banhira udan la mai modo sira ami kuda la moris hotu.” Dehan Lia-Na’in Manuel Colisala, ba jornalista sira iha Aldeia Hohulu, suku Lauana Kuarta-Feira ne’e
Nia informa knu’ua ne’ebé partisipa iha serimónia kultural bolu udan ne’e mak lisan Leldu, Komluli, Dasu Mau, Mau Libu, Letelu ho Bihahi, ne’ebé knu’ua hirak ne’e nia lisan boot mak Leldu ne’ebé uluk Uma nain 27 iha suku Lauala.
“Mudansa klimátika, desde avo beiala sira hanorin katak kuandu bailoron naruk demais ami tenki halibur malu hodi bolu udan, bolu udan ne’e atu fó matak malirin ba ema hotu-hotu, tanba udan la mai entaun ami halo’o ami nia kultura hodi bolu udan mai.” Lia-nain Esplika.
Nia hatutan, kultura bolu udan ne’e sempre akontese tanba eziste desde Avó bei-ala sira-nia tempu ne’ebé husik hela ba oan no bei-oan sira hodi hatutan nafatin ritual ne’e hodi ba vizita bee matan 4.
“Iha be’e matan ha’at naran Soi Laka, Fahi-luha, Hurtelesu no Binumata, sei husu iha ida primeiru ne’e udan la mai, ba husu ida kedua mak la mai, ba tan husu ida terseiru, husu ida terseiru la mai tan ikus liu maka ba husu ida kuartu ne’e udan been tenki mai ne’e prinsipiu husi avo sira nia kultura no ami la soe, kada tinan ami sempre halo ida ne’e.” Nia hatutan
Iha Fatin hanesan, reprezentante Komunidade Aldeia Hohulu, Hipolito Soares haktuir, ritual bolu udan ne’e realiza kada tinan ho objetivu atu bolu udan been ho lia dadolin suku Lauana nian.
“Prosesu kultural ida ne’e kada tinan sempre akontese tuir Avo beiala sira-nia tempu, bainhira udan monu rai, no ami iha ne’e iha bee matan 4, no Agora dadaun avo sira lao husi uma lisan desde horseik no deskansa iha fahi Luhan, hodi bolu udan ho lia dadoli nian.” dehan Hipolito.
Objetivu prinsipal husi atividade kulturál ne’e atu halo prevensaun ba mudansa klimátika, tanba komunidade la respeitu ba kultura ne’e bele fó impaktu udan, rai monu no rai halai, maske kada tinan governu aloka osan barak maibé dezastre kontinua akontese.
“Ha’u rekomenda ba estadu tau importansia ba ita-nia kultura, tanba xave importante ba nasaun nian mak kultura, nune’e estadu tenke tau matan nafatin ba kultura hodi apoiu buat ruma, atu ami komunidade sira bele hadi’ak bee matan sira no halo prevensaun ruma atu rai labele halai beibeik.” Nia dehan
Enkuantu eventu kultural bolu udan been ne’e, sempre akontese iha kada tinan molok udan monu rai halai, no partisipa maximu husi bei-oan sira uma lisan ne’ebé pertense iha Aldeia Hohulu no Ainapa Mregi nomos apoiu maximu husi joventude sira iha aldeia Hohulu, Autoridade lokál no Autoridade Seguransa.
Entretantu, informasaun hirak ne’e Jornalista asesu liuhusi partisipa iha atividade media tour, ne’ebé Asosiasaun Jornalista Timor Lorosa’e (AJTL) servisu hamutuk ho OXFAM Iha Timor-Leste no hetan apoiu fundus husi Oxfam Hongkong.
Reportajen : Estefania
Foto : Estefania