Ermera, 30 Dezembru 2024 (Média Democracia) – Komunidade Postu-Administrativu Atsabe preokupa ho kondisaun estrada ne’ebé aat husi postu letefoho to postu atsabe, nune’e komunidade husu governu atu bele hadia estrada ne’ebé sai hanesan preokupasaun ba iha komunidade sira liuliu iha komunidade postu atsabe.
Iha entrevista ho komunidade Postu-Administrativu atsabe Clarita Gonçalves Monteiro hateten, sente triste tebes tanba estrada ne’e aat kleur ona susar tebes atu komunidade sira halo viajen tanba tempu udan estrada sai hanesan tahu dodok tan ne’e husu ba iha parte governu liuliu ba iha nai ulun sira atu bele resolve kondisaun estrada ne’e.
“Hau hanesan komunidade durante ne’e hala’o viajen ba Dili dalaruma iha tempu udan bus sira ne’ebé halai ermera ba dili ne’e susar los dalaruma mós kareta balun mout tanba kondisaun estrada ne’ebé aat. Estrada ne’e laos foin aat iha tinan ida ne’e maibé kada tinan kuandu udan monu rai entaun estrada kotu nomos estrada balun sai hanesan tahu dodok entaun susar atu halo viajen.” Lia hirak ne’e hato’o husi Clarita Gonçalves Monteiro hafoin entrevista ho jornalista media democracia iha merkadu atsabe villa.
Nia hatutan husu ba governu atu bele hare netik kondisaun estrada ne’e tanba kada tinan Postu atsabe sempre hakilar ba iha estrada tanba kondisaun ne’ebé aat tebes no dalaruma mós kareta sira sempre mout iha estrada tan deit estrada sai fali tahu dodok, tan ne’e espera katak tinan oin governu bele realiza promesa ne’ebé iha ona, atu hadia estrada liga postu letefoho to atsabe nian
Iha sorin seluk Administrador Postu-Administrativu Atsabe Manuel Oliveira hateten, koalia kona-ba estrada ne’ebé ho kondisaun aat ne’e agora daudaun parte obras publiku halo ona atendementu emerjensia ba dalan kuak sira ba iha suku no aldeia sira, maibé koalia ba iha estrada boot liga ba iha postu rua ne’e sei tuir prosesu legal husi parte governu no sei halo estrada tuir planu ne’e iha tinan 2025 no 2026
“Preokupasaun komunidade sira nian ne’e klaru tanba estrada ne’e aat tebes nune’e sei tuir prosesu hanesan ohin ha’u koalia ona katak ne’e sei tuir planu ne’ebé governu iha ona bele realiza no ita mós hateten ona ba parte governu katak bainhira grande projetu konstrusaun estrada publiku ninian no obras publiku agora daudaun hala’o hela servisu emerjensia hanesan sira taka ona dalan kuak sira ne’ebé difikulta tebes komunidade sira atu halao viajen dili mai atsabe nomos fila-fali.” Lia hirak ne’e hato’o husi Administrador Postu Administrativu Atsabe Manuel Oliveira iha knaar fatin atsabe villa
Nia hatutan fiar katak ho preokupasaun hirak ne’e iha tinan oin planu ne’ebé governu iha ona bele hadia estrada tanba ne’e nesesidade tebes ba povu atsabe bele uza tanba estrada postu letefoho liga atsabe ne’e tama ona ba iha sistema planu governu nian katak tinan 2025 no 2026 estrada liga postu rua ne’e governu sei hadia hahu husi Gleno mai to’o Letefoho no kontinua mai to iha Postu-Administrativo atsabe nian
Reportajen : Domingas
Foto : Domingas