Letefoho 29 Novembru 2024 (Média Democracia)- Komunidade iha Aldeia Leubasa suku Lauana kontente tebes ho konservasaun bee ne’ebé halo husi grupu TILOFE tanba bele fó moris ba bee matan ne’ebé komesa menus dadaun nune’e komunidade bele asesu bee maske ho distánsia ne’ebé dook. Lia hirak ne’e hato’o husi xefe aldeia Leubasa Alfredo Maia Pires ba Jornalista sira iha aldeia Leubasa.
Xefi Aldeia, Alfredo Pires, agradese ba grupu Tilofe ho nia programa konservasaun bee matan hodi ajuda komunidade sira bele asesu bee moos tanba durante tinan naruk nia laran komunidade sira iha área refere susar tebes atu asesu bee moos tanba distánsia ne’ebé dook husi bee matan.
“Iha tempu uluk komunidade sira lahatene oinsá bele asusu iha bai-loron naruk no durante ne’e komunidade sira sente difisil atu asesu bee moos hodi uza ba nesesidade loror-loron nian, bainhira programa Tilofe nian la’o kona-ba halibur bee, agora bee ne’e komesa ona fó benefisiu ba komunidade sira no to’o agora komunidade sira kontinua uza bee, uluk iha fulan Agostu Setembru ne’e bee maran ona, maibé agora tama ona mai Novembru mós bee seidauk maran”. Dehan xefe aldeoa Alfredu iha Aldeia Leubasa kuarte ne’e (20/11/24)
Nia afirma antes ne’e komunidade iha Aldeia Leubasa susar tebes atu asesu bee moos tanba laiha koñesimentu kona-ba konserva bee maibé ho prezensa grupu Tilofe nian halo programa kuda bee debu nune’e komunidade sira iha área refere bele asesu bee moos.
“Grupu Tilofe seidauk halo programa kona-ba bee debu ne’e ami seidauk hatene kona-ba konserva bee ne’e rasik entaun ami labele halo konservasaun bee, maibé programa ne’e iha ona, komunidade sira hatene bee debu bele fó ajuda ba komunidade sira, nune’e to’o ohin loron bele fó moris fali ba bee matan sira ne’e hodi bee matan laran to’o agora.” Nia afirma
Bee ne’ebé durante konserva liuhusi konservasaun udan been ne’ebé tun hodi infiltra ba rai nune’e bele fó moris ba bee matan seluk atu nune’e bele oferese ba komunidade sira iha Aldeia 4.
Iha biban ne’e, Abrão Maia, nu’udar xefe Juventude Movimentu haktuir atividade konserva bee ne’e inísia husi grupu Tilofe hahu husi tinan 2021 tanba hetan formasaun husi Permatil nune’e implementa iha suku no aldeia refere.
“Inisia husi tinan 2021 to’o agora atividade sira ne’e ami hetan formasaun husi Permatil asaun konservasaun bee ne’e servisu hamutuk ho Tilofe, objetivu husi konservasaun bee ne’e atu halo prevensaun husi risku degradasaun erosaun inklui inundasaun sira, tanba ne’e vantajen ba halo konserva bee ne’e hodi hamoris fali bee matan sira seluk nune’e komunidade sira bele asesu be’e ho di’ak ba sira nia moris no komunidade sira bele uza be’e sira ne’e iha tempu bailoron naruk nia laran.” Abão Maia haktuir
Nia informa movimentu konservasaun bee ne’e kompostu husi joven na’in 17 hodi halo atividade konservasaun bee kona-ba baze hidrodika ka bee debu natural hosi infiltra ba bee matan sira.
“Ami husi Juventude Movimentu Konservasaun Bee kompostu husi ema na’in 17, durante ne’e bee ne’ebé ami konserva mak udan been ka kolleita udan been no ita ko’alia kona-ba baze hidrolodika ne’e iha fatin tolu mak hanesan primeiru debu natural, segundu mak tasi, terseiru mak atmosfera. Ita ko’alia kona-ba baze hidrolodika mak debu natural sira, ne’e kapta udan-been sira husi foho lolon hodi inflitra tama ba debu laran nune’e bele fó moris fali bee matan sira iha okos.” Nia informa
Enkuantu debu natural ne’ebé halo konservasaun ne’e hamutuk 9, debu ne’ebé kria foun ‘arte visial’ hamutuk 74 totál debu hamutuk 88. Aleinde konserva bee grupu juventude ne’e mós servisu hamutuk ho Tilofe hodi konserva bee kuda mós Ai-Kakeu, Au, Onu ho Hali ba bee matan ne’ebé konserva hanesan bee matan Saren, Aipun, Tuhuguan, Kolimauhahi Biguru Haehbehan inklui Rehein Manpnian bee matan hirak ne’e, fó moris husi bee matan Alosai.
Esplika liután komunidade husi Suku Leu-Bassa Suku Lauana, Posto-Administrativo Letefoho, Munisípiu Ermera husi Uma-Kain hamutuk 116, habitante 468, kompostu husi mane 250 no feto 218.
Entretantu informasaun ne’e jornalista asesu liuhusi partisipa iha programa media tour ne’ebé Asosiasaun Jornalista Timor-Leste (AJTL), Servisu hamutuk ho Oxfam iha Timor-Leste no hetan apoiu fundu husi Oxfam Hongkong.
Reportajen : Estefania
Foto : Estefania