Dili, 23 Setembru 2024 (Média Democracia) – Oxfam Timor-Leste servisu hamutuk ho Asosiasaun Jornalista Timor-Leste (AJTL) realiza kompetisaun ba joven kreativu sira hodi hasai foto kona-ba mudansa klimátika Iha Timor-Leste, nune’e ohin fó sai rezultadu manán-na’in ne’ebé sei ba tuir espozisaun foto iha Beijing.
Martinho Goncalves Araujo nu’udar manan-nain dahuluk agradese ba Oxfam Timor-Leste ho Oxfam Honkong ne’ebé fó fiar ba AJTL hodi loke kompetisaun.
“Ha’u agradese tebes ba Oxfam Timor-Leste tantu Oxfam Honkong ne’ebé servisu hamutuk ho AJTL iha inisiativa tomak hodi explora Joven sira hotu iha Timor-Leste hodi exsplora sira nia talentu liuhusi fotografia.” Dehan Martinho ba Jornalista sira hafoin simu prémiu iha Oxfam Hudi Laran
Nia sei ba Beijin China hodi reprezenta foin-sa’e Timor-Leste ba iha Palku internasional liuhusi Fotografia.
“Ha’u ba Beijin China Reprezenta Joven Foinsae liuliu ba kolega sira ne’ebé ami kompete ne’e hodi lori Timor-Leste ba palku internasional, no obra ne’ebé ha’u lori hanesan Fotografia 4 ne’ebé Prense kriteria husi AJTL ho Oxfam no foto seluk sei hasai iha tempu oin mai ne’ebé relasaun ho mudansa klimatika akontese iha Timor Leste.” Nia dehan
Nia husu ba Foinsae sira iha Timor-Leste atu uza talentu ho di’ak nune’e bele ba kompete iha mundu internasional hodi reprezenta valor ne’ebé iha liuliu liga ba mudansa klimátika ne’ebé akontese iha rai laran atu nune’e ema hotu hatene kona-ba situasaun di’ak no aat ne’ebé povu ida enfrenta.
Iha fatin hanesan Prezidente Asosiasaun Jornalista Timor-Leste, Zevonia Vieira Agradese ba Oxfam Timor-Leste no Oxfam Hongkong ne’ebé fó konfiansa ba AJTL hodi hala’o programa kona-ba asaun média ba justisa klimátika iha Timor-Leste.
“AJTL hetan fiar ba projetu tinan ida nian inklui liga ho kompetisaun foto ba halo advokasia liga ho Justisa klimátika iha Timor, tanba impaktu husi mudansa klimátika.” Dehan Zevonia Vieira ba Jornalista sira iha Oxfam
Nune’e ohin AJTL ho Oxfam Timor-Leste anúnsia manán-na’in ne’ebé hetan primeiru lugar hodi ba tuir espozisaun iha Hongkong.
“Ohin loron AJTL ho Oxfam anúnsia ona manán-na’in 3 ne’ebé manán primeiru ne’e sei ba Beijing hodi tuir esebisaun fotografia nian liga ho Justisa klimátika hodi reprezenta Timor kona-ba oinsá mudansa klimátika iha grupu vulneravel sira, feto, labarik, ferik no katuas sira inklui ema ho defisiénsia sira.” Nia dehan
Kompetetór sira survei hodi halo adaptasaun iha situasaun ne’ebé sosiedade sira hasoru hanesan oinsá buka bee moos ho distánsia ne’ebé dook husi hela fatin, haree ba seitór produtivu sira nia produsaun tun impaktu husi mudansa klimátika.
Iha biban ne’e Adilson da Costa nu’udar Jestór programa advokasia no influénsia iha Oxfam Timor-Leste dehan kompetisaun ne’e liuhusi programa Organizasaun Sosiedade Sivíl ne’ebé serbisu haree ba iha mudansa klimátika.
“Kompetisaun fotigrafia ne’ebé ita servisu hamutuk ho AJTL ne’e parte ida husi projetu ida ho naran média no organizasaun sosiedade sivil ne’ebé servisu ba mudansa klimátika no ita hanoin katak aleinde média no Jornalista sira nia envolvimentu iha projetu ida ne’e fó oportunidade mós ba joven sira ne’ebé iha kreatividade ka talentu halo fotografia, tanba ita hakarak Promove joven sira.” Dehan Jestór Programa Oxfam
Liuhusi kolaborasaun entre Oxfam Timor-Leste ho Oxfam Hongkong hodi apoiu fundu mai Timor-Leste hodi kria kompetisaun ba joven sira ne’ebé iha talentu ba fotografia.
“Entaun kolaborasaun servisu entre Oxfam Timor-Leste ho Hongkong liuhusi apoiu fundu ne’ebé agora dadaun sira fornese mai Oxfam Timor-Leste hodi servisu hamutuk ho AJTL ba kompetisaun ida ne’e, ita hanoin katak joven ne’ebé ohin selesionadu hanesan manán-na’in ba kompetisaun fotografia ida ne’e nia bele reprezenta joven sira iha Timor-Leste hodi partisipa iha espozisaun ne’ebé sei akontese iha Beijing.” Hatutan Jestór Programa Oxfam
Menán-na’in sei ba iha Beijing iha fulan Novembru reprezenta nia fotografia no istória sira kona-ba impaktu husi mudansa klimátika no oinsá sobrevivente sira halo adaptasaun hasoru mudansa klimátika ne’ebé akontese iha Timor-Leste.
Reportajen : Estefánia
Foto : Estefánia