Dili, 05 Abril 2025 (Média Democracia) – Ministru Komérsiu no Indústria halo vizita servisu ba kompaña Asarini Service, ne’ebé halo servisu ba Sofa no servis Kadeira Kareta iha Kampu-Tuti Bebonuk.
Objetivo husi visita ne’e relasiona ho polítika nonu-governu konstituisional ninian, ne’ebé promove no hakbi’it setor privadu, liuliu haree ba empreza Micro Hipnomedia.
Ministru Komérsiu no Indústria hateten, durante ne’e haree empreza sira halo sira-nia aktividade lubuk ida ne’ebé kontribui mós ba dezenvolvimentu ekonomia iha nasaun ida ne’e.
“Ita hakarak enkoraja nafatin, liuliu ita-nia joven sira atu bele hare aktividade produtivu sira hanesan ne’e liga ba oportunidade negosiu ne’ebé iha, ba ita ninia nasaun iha formasaun oioin ho skill ne’ebé sira iha hodi bele aproveita kria empregu ba sira-nia-aan no kria negosiu ba sira-nia-aan.” Dehan Ministru ba jornalista sira iha Asarini Service Kampu-Tuti Sexta ne’e (05/04)
Nia dehan atu nafatin promove espíritu emprendedorismu mak importante atu nune’e bele hahoris emprezáriu foun hirak ne’ebé hahú ho eskala ki’ik.
“Kompaña ASARINI ne’e empreza Kiik, ASARINI Service Sofa, durante ne’e sira-nia aktividade la’o di’ak maske sei dehan katak depende ba iha orderan mai husi kliente sira tanba ne’e, Ami haree katak importansia husi saida mak sira halo ona no sira mós dehan katak sira iha duni rejistu serve hodi kontribui mós ba iha reseitas nasaun ninian.” Dehan nia
Nia afirma katak kompaña refere iha planu di’ak atu aumenta tan kualidade produsaun, nune’e ba oin kompaña ne’e bele sai boot.
“Ho hanoin dehan ita atu promove signifikan governu mak sai hanesan parseiru estratejiku lao hamutuk ho setor privadu hamutuk ho kompaña ki’ik sira, entaun ita buka dalan, dalan ida mak ita buka informasaun, dalan ida tan mós promove sira nia produtu ne’e, no dalan ida mak fó kreditu ba sira para bele espanda tan sira nia negosiu.” Nia afirma
Tan ne’e tenke enkoraja nafatin sira, maske dezafiu barak sira hasoru kona-ba material ne’ebé ladún sufisiente, fatin ne’ebé presiza hadia, jestaun ba administrasaun, jestaun ba finanseiru, atu nune’e bele hatene jestaun kursu operasionál no manán hira no gastu hira, oinsá bele rai mós iha banku para bele sustenta nafatin atividade refere.
Nia informa katak kompaña sira presiza hakle’an tan koñesimentu hodi nune’e bele asegura produtividade nomos se karik iha empreza ki’ik balu hakarak halo hanesan Asarini Service, entaun sira tenke garante sira-nia kualidade hodi nune’e bele kompete nafatin ho empreza seluk.
Governante ne’e nafatin enkoraja Timor-oan hotu ne’ebé iha empreza ki’ik atu nafatin iha vontade no espiritu hodi kompete ho kompaña sira husi rai liu mai halo atividade hanesan ho Asarini Service nian, aleinde ne’e bele fasilita mós sira ba programa liña kréditu.
“Ita bele fasilitas sira para aban bairua ita implementa programa liña kreditu saudavel sira bele apply ba, ne’ebé governu prepara montante orsamentu balun iha ne’ebá para bele fasilitas negosiu kiik sira hanesan ne’e.” Nia dehan
Iha biban ne’e Ferdinando de Araújo hateten kompaña Asarini Service Sofa ne’e harií iha tinan 2021, ne’ebé sira hasoru dezafiu barak iha momentu ne’ebá.
“Uluk iha rai kotuk ami halo iha ne’ebá, haree komesa lao ladún di’ak, entaun dadaun ami mai loke fali iha ne’e no ida iha kraik ne mak to’o agora, Problema barak mak ami hasoru hanesan ekipamentus sira, dalaruma sasan sira ne’e ami tenke ba sosa iha loja mak ami lori mai.” Nia hateten
Nia dehan tan, bainhira ekipamentu ne’ebé presiza ba haree iha loja laiha, entaun sira labele halo no bainhira kliente servis tuir nia kor ne’ebé sira hakarak.
“Ami sempre falla mak iha ne’e, ami nia difikukdade mak iha ne’e, tanba sira mai hakarak kor ida ne’ebá, ami ba buka iha loja iha entaun ami tau, sé laiha ami tenke ba buka hetan duni maibé kuandu laiha ami tenke pasensia deit ona, tanba dalaruma kliente sira la komprende sira sempre trata ami no dalaruma sira lakohi.” Nia haktuir
Enkuantu rendimentu ne’ebé sira hetan la permanente, depende ba kliente sira-nia orderan, fulan ida sira labele garante rendimentu as tanba depende ba kliente sira.
Reportajen : Estefania
Foto : Estefania