Dili, 28 Outobru 2024 (Média Democracia) – Ministériu Saúde iha komprimitidu sei reforsa ba implementasaun Programa Planeamentu Família hodi foku ba fó Espasu oan tinan 3, hodi hamenus Mortalidade Materna no salva Bebé nia Vida.
Lia hirak ne’e hato’o husi Vise-Ministru Fortalesimemtu Instituisional ba Saúde bainhira hola Pozisaun iha Lansamentu Kampaña Nasionál Planeamentu Família foku ba fó Espasu Oan tinan 3, ne’ebé realiza iha jardim BJ. Habibie Sesta Feira ne’e (25/10/2024)
Vise-Ministru Fortalesimemtu Instituisional ba Saúde José Dos Reis Magno hateten, Ministerial saúde kumprimitidu reforsa ba implementasaun atividade hodi aloka orsamentu jerál estadu ba programa Saúde Materna infantil.
“Minsiteriu saúde sei aumenta alokasaun orsamentu jeral do estado ba programa saúde materna-infantil hodi tulun no eleva prestasaun servisus essensiais ba saude ho kualidade no efikáz, Ministériu mós sei investe ba kapasidade rekursu umanu saúde hodi aloka orsamentu no fó formasaun ba profisional saúde sira atu hasa’e sira nia abilidade no koñesimentu tékniku atu fó atendimentu ho kualidade no dignu ba komunidade sira.” Dehan Vise-Ministru José Dos Reis Magno bainhira halo Diskursu
Nia afirma Ministériu Saúde sei kapasita formasaun ba pesoál saúde sira nune’e bele fahe informasaun ba komunidade sira.
“fahe informasaun ba komunidade sira hodi tulun no eleva sira nia koñesimentu kona-ba benefisiu husi servisus familia planeada atu halo desizaun ne’ebé informadu kona-ba sira nia saúde reprodutiva.” Nia afirma
Ministériu Saúde mós sei servisu hamutuk ho konviksaun relijioza sira atu prepara foin sa’e sira ne’ebé hakarak forma família ho planu sira nia família ho preparasaun ne’ebé di’ak.
Nia hatutan sei halo alargamentu ba iha servisu integradu saúde reprodutiva iha tempu emerjénsia.
“Sei alarga servisus integradu ba servisu saúde reprodutiva iha tempu emerjénsia, hametin Espasu Seguru ba sobrevivente violénsia bazeia ba Jeneru, sei hametin no haforsa dadus kona-ba mortalidade materna ho perinatal.” Nia hatutan
Nune’e mós sei harii infraestrutura ba servisus KEMON BÁZIKU iha fasilidade 20 ne’ebé hetan apoiu husi guvernu Japaun hamutuk miliaun 7 no husi guvernu Australia hamutuk miliaun 2 resin.
Ministériu Saúde sei la husik ema ida iha kotuk ka “leaving no one Behind” katak Ministériu Saúde iha komprimísiu atu fornese asisténsia saúde ba populasaun ho idade reprodutiva iha Timor laran tomak inklui ema ho defisiénsia, joven feto no mane, liliu ba sosiedade ne’ebé hela iha área Remotas.
Reportajen : Estefania
Foto : Pajina UNFPA Timor-Leste