Dili, 08 Outobru 2024 (Media Democracia ) – Movimentu Universitariu Timor-Leste (MUTL) realiza komunikandu imprensa relasiona ho desizaun Parlamentu Nasional atu sosa kareta ba deputadu 65 iha uma fukun Parlamentu nasional. Atividade ne’e realiza iha jardin 5 de maio Colmera Dili
Haktuir porta-vóz Cristiano José Trindade (Mau-raku) hateten Orgaun lezislativa IX governu Konstitusional membru Parlamentu Nasional loron kurta-feira 18 de setembru 2024 debate programa ba sesaun plenaria extraordinaria Parlamentu Nasional aprezenta proposta hodi sosa kareta foun ba deputadu sira.
“Proposta sosa kareta luxu ba deputadu hanesan programa ida ne’ebé aprezenta kada periodu maske povu ida ne’e kontra bebeik sira nafatin sosa iha kada periodu, ohin loron IX Governu konstitusional Orgaun Parlamentu Nasional nafatin produz lei hodi aprezenta ba programa sosa kareta luxu maske gasta osan povu nian ne’ebé sira aprova iha loron 18/09/2024 ho montante osan 40 mil millões hodi utiliza tuir sira nia hakarak iha povu ida ne’e nia terus leten, dadaun ne’e Timor-Leste iha krize ekonomia ho debe ne’ebé barak husi banku federal no banku husi nasaun sira seluk, ho nune’e ohin loron Timor-Leste sei nakonu ho numeru kiak, mukit no mall nutrisaun hahu husi labarik to ferik no katuas.” Dehan Porta-vóz Mau-kura
Nia hatutan tan katak MUTL hamutuk ho povu tomak la konkorda no konsidera desizaun politika ida ne’ebé injustu ka korupsaun legal husi deputadu 65 iha parlamentu nasional halo no fó ameasa ba estadu Timor-Leste, nune’e bele utiliza de’it sira nia salariu
“Movimentu Universitariu Timor-Leste (MUTL) husu ba deputadu sira atu anula no kansela hikas proposta lei n˚4 viaturas e trasportes dos deputados ka sosa kareta foun ba deputadu sira ne’ebé ho votus maioria absoluta iha 18/09/2034 ho konsiensia no husu ba Presidente Republika atu veta ka kansela lei refere tanba fó bokur ba grupu balun maibé laos interese povu nian, husu ba deputadu sira atu utiliza de’it salariu tanba ho montante boot laos atu explora de’it povu no utiliza osan la tuir povu nia hakarak, MUTL hamutuk ho povu Timor-Leste kontra desizaun reprezentante povu iha uma fukun parlamentu nasional no konsidera nu’udar hahalok korupsaun, nune’e bele salva lalais futuru nasaun nian” Hatutan Porta-voz
Afirma tan katak husu ba reprezentante povu presiza tetu didiak antes foti desizaun tanba povu balun moris kiak no mukit presiza haree, tanba nesesidade baziku foin aas tebes iha merkadu hodi fó impaktu ba nesesidade povu kiik sira nian.
Iha fatin hanesan Amino Lunturu salienta tan katak MUTL la konkorda ba desizaun politika Presidente Republika bazeia ba programa sosa kareta luxu ba deputadu sira tanba dadaun ne’e povu barak mak sei halerik hela ba dezemvolvimentu.
“Situasaun ne’ebé presidente deklara ne’e afavor ba povu nia hakarak, tanba situasaun Timor-Leste agora grave tebes, problema barak mak povu infrenta iha saude, edukasaun, ekonomia. Aprova osamentu hodi sosa prado, nusa la aloka deit osan ba halo manutensaun ba kareta ne’ebé dadaun ne’e sira uza, serake povu ida ne’e moris la dignu no sofre durante tinan 20 ona maibé ita-nia lideransa sira laiha fuan ba sira nia povu rasik no posizaun ne’ebé sira asumi, povu depozita sira komfiansa atu trata povu ba moris diak, dadaun ne’e povu infrenta nesesidade bazika no setor agrikultura hakdasak,” Tenik Lunturu
Movimentu Universitariu Timor-Leste (MUTL) la konkorda ho aktu ne’ebé deputadu sira hatudu iha uma fukun parlamentu nasional nomos dezaun politika Presidente Republika, nune’e MUTL sei firme nafatin bainhira laiha desizaun no mantein hodi sosa, MUTL komprometidu halo asaun manifestasaun hodi blokeia total portaun parlamentu nasional nune’e husu atu kansela ba programa sosa kareta prado ba deputadu sira
Reportajen : Basilio
Foto : Basilio