Dili, 02 Dezembru 2024 (Média Democracia) – NGO ba Futuru servisu hamutuk ho UN-Women no Kolabora ho Ministériu Interior Fasilita workshop durante loron 3 ba organizasaun Sosiedade Sivil sira hamutuk 15 kona-ba ‘Hakbiit Sosiedade Sivíl Ba Feto, Paz no Seguransa, hodi hametin kolaborasaun no asaun iha Timor-Leste
Emanuela Nadia Sequeira Ribeiro, Jestór Programa NGO Ba Futuru hateten, atividade ne’e realiza hodi fó treinamentu kona-ba Planu Asaun Nasionál 1325 nian haree ba iha asuntu feto, Paz no Seguransa.
“Feto paz no seguransa faze daruak nian ba iha organizasaun sosiedade sivil sira, ida ne’e hanesan parte ida lidera husi NGO ba Futuru rasik, treinamemtu loron 3 ne’e sosiedade sivil sira sei hakle’an sira-nia koñesimentu di’ak iha PAN 1325 nian, nomos sira sei dezenvolve planu asaun ne’e parte aspeitu importante.” Dehan Jestora Programa Emanuela Sequeira ba Jornalista sira iha Salaun Tower Segunda ne’e (02/12/24)
PAN 1325 ne’e hala’o durante loron 3 nune’e sosiedade Sivil sira bele haree kona-ba estratéjia no mekanismu hodi implementa atividade refere ba iha komunidade liliu feto no labarik feto sira.
Nia informa katak iha atividade refere NGO Ba Futuru la servisu mesak maibé hetan apoiu husi UN-Women nomos kolabora ho Ministériu Interior hodi habelar ba Asosiasaun sira ne’ebé durante ne’e apoiu ba programa refere.
“Ida ne’e prosesu ne’ebé antes ne’e ami ho Ministériu Interior no UN-Women fasilita ona treinamentu balun ba iha staff sira husi Ministériu Interior nomos ba iha staff tékniku sira, karik ita bele dehan koñesimentu ne’e labele rai de’it iha parte balun maibé hakle’an tan ba parte sira ne’ebé durante ne’e kontribui makas iha PAN 1325 nian.” Nia informa
Nia afirma katak PAN 1325 ne’e servisu besik ho Ministériu Interior maibé nia aspeitu husi programa mak haree ba iha asuntu haforsa feto sira.
“Entaun iha ne’ebá iha mós treinamentu hanesan lideransa transformativu entaun ida ne’e mos ami servisu hamutuk ho MNEC atu fó treinamentu haree liubá iha lideransa transformativu ba ita-nia lideransa feto sira, entaun ida ne’e inklui mós ba iha NAP ne’e rasik, ami mós fó treinamentu ba polisia iha parte polisia feto, lideransa seluk liliu kargu diretora ka sira ne’ebé iha papél importante ba iha kontribuisaun NAP ne’e no ba iha ema ne’ebé foti desizaun.” Nia afirma
Nia dehan programa ne’e sei kontinua tanba atu haree oinsá hasa’e no haklean koñesimentu iha PAN 1325 ne’e hodi haforsa feto sira liliu ba makfoti desizaun feto sira.
“Entaun iha 2025 sei kontinua ho atividade hanesan hasa’e koñesimentu nomos espera ho iha workshop ida ne’e ita-nia organizasaun sosiedade sivíl sira bele kria ona sira-nia planu asaun no sira bele implementa ho di’ak, no ida ne’e sei hala’o iha tinan oin, espera ho ida ne’e sira mós bele foti saida mak aprende ona iha durante treinamentu, katak ne’e intensivu, foti buat ne’ebé iha hodi kontinua implementa no kontinua servisu hamutuk.” Nia dehan
Nia espeta katak ho planu ne’e bele halo kolaborasau metin entre Organizasaun Sosiedade Sivíl, Governu nomos Ajensia sira, nune’e atu bele servisu makas ba promove Igualdade Jéneru di’ak no bele elabora di’ak liutan PAN 1325.
Iha fatin hanesan reprezentante husi Fundasaun Codiva Fey de Carvalho Pereira Espresa sentimentu haksolok tanba partisipa iha workshop refere, tanba atividade refere ko’alia kona-ba Asuntu feto no Labarik feto.
“Ha’u sente kontente tanba bele partisipa iha atividade ida ne’e, no bele hetan esperénsia balun husi NGO Ba Futuru, ne’ebé liga ba iha feto vulnerável, feto ne’ebé hetan Violênsia doméstika, no oinsá sira bele hetan sira-nia direitu.” Fey Espresa
Nia informa katak atividade ne’e importante, tanba bele hetan informasaun liliu kona-ba sosiedade sira ne’ebé kontribui ba normas sosiais hirak ne’ebé eziste iha Timor Leste.
“Agora ita iha maluk barak mak kontra normas sosiais ne’ebé eziste iha Timor-Leste, NGO ba Futuru nomos husi apoiante NGO ba futuru ne’ebé ko’alia kona-ba feto ba paz, ida ne’e importante, Oinsá para atu gia feto sira labele hetan violénsia doméstika no labele trauma ba iha Violênsia sira.” Nia informa
Nia esperansa ba iha futuru, oinsá feto hotu bele hetan liberdade no bele hetan paz.
“Hau nia esperansa ba futuru mak feto hotu bele hetan liberdade no bele hetan paz no dezigualdade ne’ebé justu.” Nia Dehan
Enkuantu organizasaun Codiva ne’e Foku ba iha direitu umanu nomos foka ba komunidade LGBTI sira nune’e bele hetan justisa ne’ebé justu iha estadu direitu Demokrátiku RDTL. Entretantu Iha worshop refere hala’o durante loron 3, organizasaun ne’ebé partisipa iha eventu ne’e husi Organizasaun Sosiedade Sivíl 15.
Reportajen : Estefania
Foto : Estefania