Viqueque, 15 Novembru 2024 (Média Democracia) – Prezidénsia Repúblika liuhusi unidade assesoria Fraternidade Humana ne’ebé lidera husi asseór Nuno Horta kontinua sosializa dokumentu Fraternidade Humana ba estudante sira husi eskola Ensinu Báziku Sentrál 01Viqueque no Ensinu Sekundáriu Jerál 04 de Setembru iha Postu-Administrativu Viqueque, Munisípiu Viqueque, durante loron 14 to’o 15 fulan ne’e.
Tuir Nuno Horta, importánsia husi atividade ne’e atu fó hanoin ba foinsa’e sira kona-bá moris sosiál iha era agora atu moris nu’udár maun-alin iha família no sosiedade.
Assesór ne’e esplika liután, dokumentu ne’e, sita mós kona-bá tahan no bali labarik sira, katak la bandu maibé kontrola labarik sira iha ransu livre, iha eskola no vida loron-loron iha família atu nune’e labarik sira moris iha ambiente ne’ebé bele garante ba sira nia futuru liu-liu assesu ho livre ba edukasaun no moris tuir valór kulturál no direitu humanus.
“Dokumentu ne’e husu mos atu taun-matan ba Katuas no Ferik sira, ema kbi’it laek no ema ho difisiénsia sira iha sosiedade inklui ema ne’ebé hetan presaun moris husi ema seluk. Dokumentu Fraternidade Humana ne’e mós assina husi Papa Francisco no Grande Imame Al-Azhar iha loron 04 Fevereiru 2019 ho objetivu fó hanoin hikas ba ema hotu atu bolu malu nu’udár maun-alin atu tane justisa no dame iha mundu no respeita direitus humanus no liberdade relizioja.” Afirma Nuno Horta
Timor-Leste adopta dokumentu Fraternidade Humana nu’udár dokumentu nasionál iha tinan 2019 liuhusi aprovasaun Parlamentu Nasionál no tuir planu iha tinan 2025 sei sai nu’udár kurrikulum ida iha ensinu báziku no ensinu sekundáriu.
Entretantu, tuir adjuntu diretór eskola 04 de Setembru Viqueque, observa katak sosializasaun ne’e di’ák tambá sai matéria ida, atu bele kria amizade no halo sosiedade moris iha trankuilidade. No konsidera dokumentu ne’e importante tau iha kurríkulu eskolár tanba matéria ne’e liga barak liu kona-bá kuda sentimentu Patriotízmu no nasionalízmu ba estudante sira.
Reportajen : Tomas
Foto : Media PR Unidade assesoria Fraternidade Humana