Lautem, 27 Dezembru 2024 (Média Democracia) – Polisia Nasional Timor-Leste PNTL liuhusi Unidade PPU nian ne’ebé sempre hala’o servisu hamutuk ho parseiru sira hodi atende ba kazu Violénsia Bazeia ba Jeneru VBJ iha Munisipiu Lautem Postu-Administrativu Lospalos
Tuir Komandante Geral Polisia Nasional Timor-Leste Munisipiu Lautem João da Costa hateten, durante ne’e polisia liuhusi Unidade PPU nian servisu hamutuk ho nia parseiru sira hodi halo atendimentu ba Violénsia bazeia ba Jeneru iha munispiu Lautem
“Ami sempre lao hamutuk atu halo atendimentu ba kazu Violénsia bazeia ba Jeneru ne’ebé akontese iha munispiu Lautem, aleinde ne’e iha loron hirak liubá ami mós hala’o kampaña aktivizmu kona-ba hapara Violénsia hasoru feto no labarik feto iha Timor-Leste.” Dehan Komandante Geral Polisia Nasional Timor-Leste Munisipiu Lautem, João da Costa
Nia hatutan iha Munisipiu Lautem implementa mós kona-ba programa kampaña aktivizmu Violénsia kontra feto no labarik feto komesa husi Janeiru to’o Dezembru tinan 2024 ne’ebé Polisia Nasional Timor-Leste ativu los servisu hamutuk ho parseiru sira hodi halo atendimentu ba kazu Violénsia Bazeia ba Jeneru iha Munispiu Lautem
“Kazu Violénsia Bazeia ba Jeneru ne’ebé Polisia Nasional Timor-Leste rejistu tuir dadus hamutuk haat-nulu resin-rua 42 relasiona ho kazu hirak ne’e prosesu hotu ba iha Ministeriu Publiku.” hatutan Komandante Geral, João da Costa
Nia salienta relasiona ho kazu hirak ne’e nia finalidade Polisia Nasional Timor-Leste seidauk hetan tanba ida ne’e segredu justisia nian maibé kazu hirak ne’e sei iha prosesu nia laran iha Ministeriu Publiku no tribunal mak sei deside lolos kona-ba kazu refere
“Kazu ne’ebé akontese ami esforsu nafatin no husu entidades sira hotu atu halo kooperasaun hodi servisu hamutuk kombate ba kazu hirak ne’e, nune’e bele hamenus numeru kona-ba kazu Violénsia Bazeia ba Jeneru iha Timor-Leste tenke halo politika ida halo deziminasaun lei ba iha komunidade hotu-hotu bele hatene tanba ita de’it mak hatene komunidade sira hela iha nivel postu no área rural menus tebes koñesimentu ne’e defisil tebes atu kombate numeru ba kazu refere.” Dehan Komandante Geral
Nia afirma relasiona ho kazu hirak ne’e iha komunidade balun mak hatene maibé maioria komunidade barak menus koñesimentu ba kazu Violénsia Bazeia ba Jeneru, tanba laiha formasaun ka treinamentu ruma ba komunidade ne’ebé hela área remotas no rural sira
Esplika kle’an liután katak iha komunidade barak mak laiha koñesimentu ba kazu hirak ne’e, entaun ita presiza halo deziminasaun lei ne’e ba to’o iha baze labele iha nivel Munisipiu de’it maibé lori ba to’o iha área rural sira, nune’e bele fahe formasaun ruma hodi servisu hamutuk kombate numeru ba kazu Violensia Bazeia ba Jeneru iha Timor-Leste.
Reportajen : Nelfiano
Foto : Nelfiano