Dili, 15 Novembru 2024 (Média Democracia) – Prezidente Republika José Ramos-Horta, ofisialmente abertura ba edisaun daruak Sci-Tech EXPO 2024 iha Palásiu Prezidensiál Nicolau Lobato. Eventu loron rua ne’e hala’o husi loron 15 to’o 16 fulan-novembru, marka pasu signifikativu iha viajen Timor-Leste nian ba avansu teknolójiku no inovasaun.
Sci-Tech EXPO 2024 nu’udar parte ida iha Programa Promosaun Turizmu Timor-Leste nian iha tinan 2024 ho tema “Siénsia, Teknolojia & Inovasaun : Dalan ba Transformasaun no Dezenvolvimentu Sustentável iha Timor-Leste
Eventu ne’e halibur hamutuk partisipante na’in 36, inklui instituisaun ensinu superiór, ajénsia internasionál, kompañia telekomunikasaun, no empreza teknolojia prinsipál sira. Espozisaun loron rua ne’e hatudu programa ida ne’ebé komprensivu inklui espozisaun siénsia no teknolojia, feira ensinu superiór, kompetisaun estudante, no atividade kulturál sira.
“Espozisaun ida-ne’e la’ós de’it hatudu teknolojia ida-ne’e inklui ita-nia nasaun nia kompromisu atu halo inovasaun sai hanesan katalizadór ba dezenvolvimentu sustentável. Liuhusi investe iha edukasaun siénsia no teknolojia, ita la’ós de’it harii infraestrutura, ita investe iha mehi no kapasidade ita-nia joven sira-nian ne’ebé sei lori Timor-Leste ba futuru.” Afirma Prezidente Ramos-Horta
Eventu ne’e ho objetivu atu estimula interese iha siénsia no teknolojia enkuantu promove solusaun teknolójia prátika sira ne’ebé adapta ba kontestu úniku Timor-Leste nian. Ida-ne’e serve hanesan plataforma ida atu hatudu projetu peskiza, haburas parseria edukasionál sira, no dezenvolve abilidade krítiku ba estudante sira.
Sci-Tech EXPO 2024 nakloke ba públiku no iha atividade lubuk ida ne’ebé hatudu nasaun nia kompromisu ba progresu iha setór oioin.
Reportajen : Domingas
Foto : Media Officer PR