Dili, 13 Dezembru 2024 (Média Democracia) – Autoridade RAEOA hamutuk ho Ministériu Solidariedade Soaial, Grupo Mulher Parlamentar Timor-Leste (GMPTL), no membru Asosiasaun Feto Potensial RAEOA hala’o abertura ba iha Seremonia Kongresu Rejionál Datoluk Asosiasaun Feto Potensiál Região Administrativa Espesiál Oe-cusse Ambeno (RAEOA) ho tema ’’Haforsa Asosiasaun Feto RAEOA, Hodi Kontribui ba Desentralizasaun no Poder Lokál’’ Atividades ne’e hala’o iha Salaun Dominikana, Sanane Pante Makasar.
Sekretaria Estadu ba Igualdade Em Ezersisiu, Atual Vice-Ministra Solidaridade Sosiál no Inkluzaun, Céu Brites Sente onra ida lori Sekretária Estadu Igualdade nia naran hodi partisipa iha asembleia jeral Asosiasaun Feto Potensiál Rejiaun Administrativa Espesiál Oe-cusse no Ambeno hodi halo abertura no atu hasoru malu ho feto forte sira.
“Feto sira ne’ebé servisu iha liña frente hodi kombate ki’ak, kombate diskriminasaun, esterio tipu sira, violénsia oin-oin luta hasoru anafabetismu, luta hasoru moras daet sira hanesan HIV-SIDA, Tuberkolze, Covid-19, Ribes nomos Mudansa Klimatika ne’ebé afeita ba família no komunidade nia moris liu-liu feto, labarik-feto, ferik katuas no rma ho defisiénsia sira.” Dehan Vise MSSI, Ceu Brites iha Komunikandu imprensa ne’ebé Media Democracia asesu liuhusi Pájina ofisiál SEI iha loron sesta feira ne’e (13/12)
Nia dehan asemblei jerál ne’e tenki sai plataforma, aleinde selebra susesu hamutuk, rekoñese mós kontribuisaun lideransa no esforsu husi feto potensiál sira hotu.
“Inklui família no parseiru ne’ebé ita-boot sira nia susesu durante tinan 4 ka 5 nia laran, susesu no progresu sira ne’e tanba servisu makas, servisu hamutuk husi ita-boot sira hotu, ita-boot sira maka luta atu hasa’e partisipasaun feto iha nivél aldei no suku, esforsu hodi empodera ekonomia feto, hodi hasa’e rendimentu ekonomia ba feto, labarik-feto no ba família.” Nia dehan
Aleinde ne’e kontribui mós ba programa Governu nian liuhusi idak-idak nia papél profisionál hodi kontribui no hamenus taxa di’ak, kombate Mall Nutrisaun no inseguransa ai-han hodi prevene hamlaha liu-liu iha tempu bailoron naruk.
Governante ne’e mós hato’o parabéns ba Feto Potensiál Regiaun Espesiál Oe-cusse Ambeno nomos ba estrutura tomak papel instituiasaun feto importante hodi kontinua valoriza atituidade umana liuhusi atitude sosiál ne’ebé dignu, respeitadu, promove no proteze direirtu feto sira nian, espera Asosiasaun Feto Potensial RAEOA no estrutura tomak kontinua servisu hamutuk iha mandatu ba periodu tinan lima mai, trasu programa ne’ebé empodera kapasidade no promove lideransa feto RAEOA liuhusi programa oin-oin.
Iha fatin hanesan Seketária Grupu Mulher Parlamentares Timor-Leste (GMPTL), Shanca Tilman hateten bazeia ba tema ne’ebé konvida entidade hotu atu halo avaliasaun ba atividade ne’e liu ona atu nune’e iha futuru bele envolve feto sira seluk.
“Maibé atu hateten de’it laos bai ta-nia feto maluk sira de’it, maibé husu mós ita-nia apoiu, ita-nia mane maluk sira atu bele fó suporta ba ita-nia feto maluk sira hodi hala’o ita-nia atividade, nune’e hodi prense ba dezenvolvimentu ba sustentavel rai ida ne’e nian, tanba ita ko’alia de’it feto sein apoiu husi ita-nia mane maluk sira mós, ida ne’e buat ne’ebé ita hare’e ladun la’o di’ak.” Dehan Sekretária GMPTL iha RAEOA
Sekretária ne’e husu ba mane sira atu servisu apoiu malu ho feto sira, tanba feto ho mane iha direito no devér hanesan.
“Iha servisu iha atividade saida deit ba feto mane nia apoiu, ba mane mós feto nia apoiu, ida ne’e ita husu ba kolaborasaun entre feto ho mane, nune’e husu ba mane maluk sira atu fó ita-boot nia apoiu tomak ba ami feto sira hodi hala’o ami nia atividade loron-loron, liu-liu hodi hare’e ba iha ita-nia dezenvolvimentu ba ita-nia rai ida ne’e.” Nia Hatutan
Tanba ne’e Bazeia ba tema, involvimentu feto ba prosesu dezenvolvimentu lokál iha relasaun ho jéneru importante tebes, tanba feto iha papél ba prosesu dezenvolvimentu lokál, no dezenvolvimentu ekonomia sai hanesan fatór determinante no diferensiadór iha distribuisaun servisu, rendimentu, riku soin, fatór produtivu no rekursu naturais sira seluk liu-liu iha rai leten, tanba ne’e feto nia papél importante tebes iha prosesu tomak.
Iha sorin seluk, reprezentante Prezidente Autoridade RAEOA Sekertaria Rejionál Asuntu Agrikultura, Filomena Sila, haktuir iha kongresu datoluk Asosiasaun Feto Potensiál Reziaun Administrativa Espesiál Oe-cusse Ambeno (RAEOA), ne’e importante tebes atu halibur feto sira.
“Liu-liu ita-nia maluk feto sira iha área rurál hotu tenke hatene katak, ita-nia maluk barak mak sei menus informasaun, sei menus kapasitasaun no liuhusi kongresu ida ne’e atu bele hili fila fali Prezidente Asosiasaun foun ne’e, ha’u apresia tebes Prezidente Interino Asosiasaun Feto Potensiál ne’ebé asumi ona kargu ho nia estrutura tomak hodi hala’o ona servisu durante periodu anterior.” Dehan reprezentante PAM RAEOA
Nia haktuir katak feto potensiál mak halo mudansa ba nia feto maluk sira liuhusi fó firmasaun no enkoraza sira iha situasaun saida de’it.
‘’Ita-nia maluk feto sira liu-liu iha área rurál atu bele iha mentál no brani hodi kandidata aan iha kualker saida de’it, tanba realidade hatudu katak iha RAEOA feto barak mak seidauk brani atu kandidata-aan ba Xefe Suku, no Xefe Aldeia, liuhusi ida ne’e ita bele enkoraza ita-nia maluk feto sira atu bele nafatin iha mentálidade ne’ebé di’ak no labele tauk hodi kandidata-aan ba saida de’it, liu-liu ba Xefe Suku no Xefe Aldeia.’’ Reprezentante PAM RAEOA haktuir.
Serimónia Kongresu Asosiasaun Feto Reziaun Administrativa Espesiál Oe-cusse Ambeno (RAEOA), ne’e realiza husi Asosiasaun Feto Potensiál RAEOA, no hetan apoiu finanseiru husi Sekretaria Estadu ba Igualade (SEI) ho montante orsamentu hamutuk Dolar Amerikanu Rihun-Lima ($5000.00) no Partisipa husi, Grupu Mulher Parlamentares Timor-Leste (GMPTL), Reprezentante PAM RAEOA, konsuladu Indonesia iha RAEOA, Reprezentante Komandante Polísia VPU-RAEOA, Prezidente Asosiasaun Feto Potensiál RAEOA, Autoridade Lokál, Sosidade Sivil, Reverendisima Madre Dominikana, Ekipa Tékniku husi SEI, Diretór Nasionál Dezenvolvimentu Igualdade Jéneru DNDIJ-SEI, Parseiru Dezenvolvimentu sira hanesan, BNCTL, Kaibauk, no ekipa Tékniku, Observadora, Kongresista sira hamutuk ema nain 138 ne’ebé mai husi Postu-Administrativu 4 hanesan Postu-Pásabe, Postu-Pante Makasar, Postu-Oesilo no Postu-Netibe.
Reportajen : Estefania
Foto : Media Officer SEI