Dili, 10 Janeiru 2025 (Média Democracia) – Sekretáriu Estadu Dezenvolvimentu Lokál sei halo servisu tolu iha tinan 2025 liga ho promosaun lokál, dezenvolvimentu Suku no dezenvolvimentu komunitária.
Sekretáriu Estadu Dezenvolvimentu Lokál, Mateus Wilfridus Talo hatete, lia hirak ne’e relasiona ho reuniaun Konsellu Ministru iha Palásiu Governu kona-ba alterasaun dekretu lei ba Programa Nasionál Dezenvolvimentu Suku (PNDS), ne’ebé delega ona ba Munisípiu sira.
“Horseik ne’e alterasaun ba dekretu lei PNDS nian tanba PNDS ita delega ona ba munisípiu ha’u hanoin atu halo de’it ajustamentu balu liliu ba kompeténsias sira ne’ebé iha Munisípiu seidauk halo.” Dehan Sekretáriu Estadu Mateus Wilfridus Talo ba Jornalista sira bainhira hola parte iha inagura edifísiu Agrikultura munisípiu Dili iha Becora (09/01/2025).
Nia informa relasiona ho Sekretáriu Estadu Dezenvolvimentu Lokál nia servisu iha pontu importante tolu hodi haree ba iha dezenvolvimemtu iha Suku to’o iha Munisípiu.
“SEDL nia servisu ha’u hanoin iha domínio servisu 3, oinsá atu haree ba ezisténsia de promosaun lokál, apoiu dezenvolvimentu suku nomos apoiu dezenvolvimentu komunitária, SEDL nia servisu iha nivél asisténsia oinsá atu haree hodi fó asisténsia tékniku ba ita-nia Autoridade Munisípiu to’o postu nomos lideransa komunitária sira oinsá atu halo sira-nia funsaun tuir lei ne’ebé iha no kompeténsia ne’ebé delega ba sira.” Nia informa
Nia afirma katak iha tinan 2025 ne’e Sekretariadu sei halo servisu hirak ne’e hahú ho dadus hirak ne’ebé iha trimestre dahuluk nian.
“Iha tinan ida ne’e ami hahú dadauk ona ho dadus sira iha primeiru trimestre ida ne’e ami sei haree oinsa atu ajuda munisípiu sira halo revizaun de planu estratéjiku dezenvolvimentu Munisipál no oinsá dadus peskiza ne’ebé avaliasaun kondisoens sira ba Munisípiu tinan kotuk ekipa SEDL halo iha janeiru ne’e ami sei halo para oinsá dadus sira ne’e atu haree apoiu ita-nia autoridade nomos lideransa komunitária sira liliu kestaun dezenvolvimentu kominitáriu.” Nia afirma
Nune’e Autoridade lokál ho membru konsellu suku sira haree ba iha prestasaun servisu no kondisaun sira iha suku.
Nia esplika katak tuir lei numeru 9/2016 Xefe Suku sira iha kompeténsia tomak atu lidera suku hodi hala’o funsaun ba servisu dezenvolvimentu iha suku rasik.
“Xefe Suku iha kompeténsia tomak agora dadaun nia membru sira konsellu suku atu hala’o nia funsaun atu haree no liga mós ba prioridade dezenvolvimentu iha suku ida-idak, ha’u hanoin dadus ne’e depois sei ajuda sira atu elabora para iha tinan hirak mai sira bele haree ona kada suku ida nia prioridade ho pontu de partilla ne’ebé iha, investimentu sira ne’ebé halo ona iha kada suku depois de restaura ita-nia independénsia.” Nia esplika
Nune’e ho dadus hirak ne’e bele halo levantamentu, oinsá haree prioridade sira iha futuru liga ba dezenvolvimentu sosio ekonómiku iha kada suku.
Iha servisu Sekretáriu Estadu Dezenvolvimentu Lokál sei haree ba efisiénsia produsaun administrasaun lokál nomos haree ba iha efisiénsia no investimemtu sira iha suku to’o ba Munisípiu.
“Oinsá atu haree funsionamentu servisu Autoridade Munisípiu to’o postu, atu haree mós ba revizaun planu dezenvolvimentu munisipál nian, ha’u hanoin servisu boot 3 ne’e sei halo, ami iha nivel estratéjiku no polítiku oinsá atu fó asisténsia ba ita-nia autoridade tun to’o lideransa komunitáriu sira atu halo servisu hodi nune’e tinan hirak tuir mai bele iha ona planu ida ne’ebé integradu.” Nia dehan
Servisu hirak ne’e halo melloramentu de’it atu nune’e ajuda halo identifikasaun ba prioridade husi asembleia Suku, Konsellu Suku to’o iha nivel Munisípiu, liu-liu iha konsellu koordenasaun Munisipál nian.
Sekretáriu Estadu ne’e informa mós kona-ba Suku foun sira ne’ebé foin eziste sei hein orientasaun husi Ministériu Administrasaun Estatál hodi tun ba baze atu fó asisténsia ba Suku 15 ne’ebé sei halo eleisaun iha tinan ida ne’e, hodi fó prioridade ba sira, nune’e husi diresaun nasionál apoiu Suku sei halo planu no polítika hodi aselera eleisaun iha tinan 2025.
Reportajen : Estefania
Foto : Estefania